1 Nao taem King Amajia i kam king, hem i gat twanti faef yia, mo hem i stap rul twanti naen yia long kantri ya, mo hedkwota blong hem i stap long taon ya Jerusalem.* Mama blong hem Jehoadin, we i woman Jerusalem. 2 King ya i stap mekem ol samting we Hae God i glad long hem, be tingting blong hem i hafhaf nomo long hem. 3 Nao taem hem i stanap strong long wok blong hem, hem i kilim tufala haeman ya we tufala i bin kilim papa blong hem. 4 ✝Be hem i no kilim ol pikinini blong tufala, hem i folem ol tok we Hae God i bin talem long Loa* we i givim long Moses, we i talem se, "Bambae yufala i no kilim papa no mama from ol samting nogud we pikinini blong tufala i mekem, mo bambae yufala i no kilim pikinini from ol samting nogud we papa no mama blong hem i mekem. Man we i mekem samting nogud, hem nomo bambae i mas ded from."

5 Nao King Amajia i singaot olgeta man blong hem we oli gat twanti yia, no we oli gat antap long twanti yia, nao i tekem olgeta i kam wanples, mo i seraot olgeta blong fomemap ol kampani blong ol soldia blong hem. Hem i seraot olgeta we oli laen* blong Juda,* folem ol pikinini blong Juda mo ol smol bubu blong hem, we ol man ya oli laen blong olgeta. Mo i seraot olgeta we oli laen blong Benjamin,* folem ol pikinini blong hem mo ol smol bubu blong hem. Nao i putumap ol man blong ol grup ya blong oli komanda blong olgeta, we sam oli komanda long taosen man mo sam oli komanda long handred man. Long fasin ya, hem i gat tri handred taosen soldia blong hem we oli nambawan man blong faet, we oli save yusum spia mo sil,* mo oli rere oltaem blong go long faet. 6 Nao antap long olgeta ya, hem i tekem wan handred taosen soldia blong ol man Isrel* bakegen we praes blong olgeta we i pem olgeta long king blong Isrel i kasem samwe long totin milian faef handred taosen vatu.* 7 Be wan profet i go luk king ya, i talem long hem se, "King. I gud yu no tekem ol soldia ya blong Isrel oli go wetem yu, from we Hae God i no stap wetem ol man ya blong not. 8 Maet yu yu ting se olgeta nao bambae oli mekem yu yu strong moa long faet, be Hae God nomo i gat paoa blong mekem yu yu win, no yu lus, mo sipos yu tekem olgeta ya, bambae hem i letem ol enemi blong yu oli winim yu."

9 Be hem i talem long profet ya se, "?Be bambae i olsem wanem long ol mane ya we mi givim finis blong pem olgeta?"

Nao profet i talem se, "!King! !Hae God bambae i givim jenis blong hem long yu we i moa long hemia we yu yu spenem!" 10 Nao king i sanem ol soldia ya blong Isrel oli gobak long hom blong olgeta. Nao olgeta oli gobak we oli kros we i kros tumas long ol man Juda.

11 Nao tingting blong king ya i kam strong we hem i no fraet nating, nao hem i lidim ol soldia blong hem oli go long wan bigfala levelples long medel blong ol hil, we nem blong hem "Ples blong Tekem Sol". Long ples ya nao oli mekem faet long ol man Edom, mo oli kilim ten taosen soldia blong olgeta oli ded. 12 Mo oli holem ten taosen soldia bakegen we oli stap laef, nao oli tekem olgeta i go antap long wan hil klosap long taon ya Sela, mo oli sakem olgeta i godaon long klif, oli go bang long ol ston daon, nao oli ded evriwan.

13 Be ol soldia ya blong Isrel we hem i sanem olgeta i gobak, oli girap, oli go mekem faet long ol taon ya blong ol man Juda, i stat long Sameria* i go kasem Betoron. Nao oli kilim tri taosen man, mo oli karem plante samting i gobak wetem olgeta.

14 Nao long taem ya we king ya i winim ol man Edom long faet, hem i tekem ol god blong olgeta, i karem olgeta i kam long ples blong hem. Nao hem i stanemap olgeta, mo i stap mekem wosip long olgeta, mo i stap bonem insens* long olgeta. 15 Samting ya i mekem Hae God i kros, nao hem i sanem wan profet i kam luk hem. Nao profet ya i tok long hem, i talem se, "King. ?From wanem yu stap mekem wosip long ol god ya? !Yu luk! !Taem yu go mekem faet long ol man ya longwe, be ol god ya oli no sevem olgeta!"

16 Be King i talem long hem se, "!Sarap yu! !Mi mi no putumap yu blong yu kam advaesa blong mi! Sipos yu no stap kwaet, bambae mi kilim yu yu ded!"

Nao profet i talem se, "I oraet nomo. Naoia mi mi save se God i mekem plan finis blong spolem yu, from we yu stap mekem ol samting ya, be yu no save harem tok blong mi nating." Nao biaen hem i no moa tok.

17 Nao King Amajia blong Juda* wetem ol advaesa blong hem oli mekem plan blong go mekem faet long ol man Isrel.* Long taem ya, King Jehoas i king blong Isrel. King ya, papa blong hem King Jehoahas we papa blong hem King Jehu. Nao King Amajia i sanem tok i go long hem se, "Sipos yu ting se yu save winim mi, yu traem kam fesem mi."

18 Be king ya i givim ansa long hem long wan parabol, i talem se, "Bifo, long kantri ya Lebanon, long ples blong hil, i gat wan kasroel i stap gru, mo hem i sanem tok i go long wan bigfala sida* se, ‘I gud yu givim dota blong yu i kam, blong i mared long pikinini blong mi.’ Be biaen, wan wael buluk i pas long ples ya, i purumbut long kasroel ya, we i flatemgud. 19 King, naoia yu stap bigmaot mo yu yu praod tumas, from we yu winim ol man Edom ya finis long faet, be mi talem long yu, se i gud yu stap nomo long hom blong yu. ?From wanem yu wantem mekem trabol olsem? !Bambae yu spolem yu nomo wetem ol man blong yu!"

20 Be King Amajia i no wantem lesin long king ya nating. Mo samting ya i kamaot olsem from we i plan blong God, se bambae hem i mas lus long faet ya, from we hem i stap mekem wosip long ol god ya blong ol man Edom. 21 Nao hem i gohed i mekemrere blong go mekem faet, mo King Jehoas wetem ol man blong hem oli kam blong faet long hem long taon ya Betsemes, long Juda. 22 Be long faet ya, King Amajia wetem ol man blong hem oli lus, mo ol man blong hem oli ronronwe, oli gobak long ol hom blong olgeta. 23 Be hem, king blong Isrel i holem hem, mo i tekem hem i gobak long Jerusalem.* Mo long ples ya, hem i brebrekemdaon bigfala stonwol blong taon ya, i stat long doa ya we nem blong hem Doa blong Efrem,* long saed i go long not, i go kasem doa ya we nem blong hem Doa long Kona. Ples ya we hem i brekemdaon i longfala, we klosap i kasem tu handred meta. 24 Mo hem i tekemaot ol gol mo silva wetem ol gudgudfala samting we i stap long haos* blong God, mo olgeta narafala samting blong haos ya we ol laen blong Obededom bifo oli stap gad long hem, mo ol gudgudfala samting tu we i stap long haos blong king. Hem i karem ol samting ya, nao i gobak long Sameria.* Mo hem i tekem sam man Juda tu oli go wok slef* long ples ya, blong mekem ol man Juda oli lesin long hem.

25 Biaen long taem ya, King Jehoas blong Isrel i ded, be King Amajia blong Juda i stap fiftin yia bakegen 26-28 long Jerusalem, be i stat bifo, long taem ya we hem i girap i agens long Hae God, oltaem ol man Jerusalem oli stap mekem plan blong kilim hem i ded, gogo hem i girap, i ronwe i go long taon ya Lakis. Be oli sanem sam man oli biaen long hem, oli go long ples ya, mo oli kilim hem i ded. Nao ol man blong hem oli putum hem long hos, oli karem hem i kambak long Jerusalem, mo oli berem* hem long wan hol long ston long beregraon blong ol king, long haf blong taon ya we nem blong hem "Taon* blong King Deved". Ol narafala samting we hem i mekem, i stat long stat blong rul blong hem kam kasem en blong hem, oli raetemdaon long buk ya we nem blong hem Ol Stori blong Laef blong ol King blong Juda mo blong ol King blong Isrel.