1 Nao ol man Juda* oli jusumaot Joahas we i pikinini blong King Josaea, oli putumap hem long Jerusalem,* blong i king blong Juda. 2 Long taem ya, hem i gat twanti tri yia. Hem i rul tri manis nomo long kantri ya, mo hedkwota blong hem i stap long taon ya Jerusalem. 3 Nao King Neko blong Ijip i kam tekem hem i go kalabus, mo i fosem ol man Juda blong oli pem takis long hem. Nao evri yia, oli stap givim tri tan fo handred kilo silva mo toti fo kilo gol long hem we praes blong hem samwe long wan handred seventi tu milian faef handred taosen vatu.* 4 ✝Mo hem i putumap Eliakim, we i brata blong King Joahas ya i king blong Juda, mo hem i jenisim nem blong hem se King Jehoeakim. Be i tekem King Joahas i go long Ijip.

5 ✝Nao long taem we Jehoeakim i kam king blong Juda,* hem i gat twanti faef yia. Hem i rul leven yia long kantri ya, mo hedkwota blong hem i stap long taon ya Jerusalem.* Mo Hae God i God blong hem, be oltaem, hem i girap i mekem sin agens long hem. 6 ✝Nao King Nebukadnesa blong Babilonia i kam mekem faet long ol man Juda, nao i winim olgeta, mo i holem king ya, i fasem hem long jen, nao i pulum hem i go long Babilonia. 7 Mo hem i go tekemaot sam long ol gudgudfala samting ya we oli stap long haos* blong Hae God, nao i karem i go long Babilon, i putum long haos blong hem. 8 Ol narafala samting we King Jehoeakim i mekem, wetem ol fasin blong hem we i nogud we i nogud, mo ol sin we hem i mekem, oli raetemdaon long buk ya we nem blong hem Ol Stori blong Laef blong ol King blong Isrel mo blong ol King blong Juda. Nao pikinini blong hem Jehoeakin i tekem ples blong hem, i kam king.

9 Nao long taem we Jehoeakin i kam king blong Juda,* hem i gat eitin yia.* blong hem. Hem i rul tri manis ten dei nomo long kantri ya, mo hedkwota blong hem i stap long taon ya Jerusalem.* Be hem tu i mekem sin agens long Hae God.

10 ✝Nao taem we manis blong ren i finis, King Nebukadnesa i kam tekem hem i go kalabus long Babilonia, mo i go tekemaot tu ol gudgudfala samting we i stap long haos* blong Hae God, i karem i go. Nao hem i tekem Jedekia, brata blong papa blong King Jehoeakin, i putumap hem long Jerusalem blong i king blong Juda.

11 ✝Nao long taem we Jedekia i kam king blong Juda,* hem i gat twanti wan yia. Hem i rul leven yia long kantri ya, mo hedkwota blong hem i stap long taon ya Jerusalem.* 12 Hem i stap mekem sin agens long Hae God, mo i no save mekem tingting blong hem i godaon blong i save harem ol tok blong Hae God we Profet Jeremaea i stap talemaot long hem.

13 ✝Nao King Nebukadnesa i fosem King Jedekia blong i obei long hem mo i kam man blong hem, mo i fosem hem tu blong i mekem wan strong promes long nem blong God blong ol laen* blong Isrel,* se i mas mekem olsem. Nao King Jedekia i mekem promes ya, be biaen, hem i girap i brekem promes ya bakegen, i go agens long king ya, mo i stap mekem stronghed se i no wantem tanem tingting blong hem blong kambak long Hae God. 14 Mo antap long samting ya, ol lida blong Juda* tu, wetem ol pris mo ol narafala man oli stap folem ol rabis fasin blong ol man blong ol narafala kantri raonabaot long olgeta, we oltaem oli stap mekem wosip long ol narafala god. Nao haos* ya blong Hae God we hem i bin mekem i kam tabu finis, be olgeta oli mekem i kam doti bakegen long fes blong hem.

15 Be Hae God i God blong ol bubu blong olgeta, mo oltaem hem i stap sanem ol profet blong hem oli kam tok long olgeta blong wekemap olgeta, from we hem i gat sore long olgeta, i wantem sevem olgeta, mo i wantem sevem haos blong hem tu. 16 Be olgeta oli stap jikim ol profet ya, oli stap tanem baksaed long ol tok blong olgeta, mo oli stap laf nogud long olgeta. Oli stap mekem olsem gogo Hae God i kros long olgeta we i kros gud, we oli no moa save ronwe long hem.

17 ✝Nao hem i mekem we king blong Babilonia i kam mekem faet long olgeta bakegen. Mo long taem ya, king ya i no gat sore nating long olgeta, hem i kilim olgeta yang man blong olgeta. Nating we sam long olgeta oli go haed long haos blong God, be hem i go long ples ya, i kilim olgeta. Nating we yang man, no yang gel, no medelman, no olfala, be God i letem we olgeta evriwan i go long han blong hem. 18 Nao king ya i tekemaot olgeta samting we i stap yet long haos blong Hae God, mo long ol storum blong haos ya, wetem ol gudgudfala samting blong King Jedekia, mo ol gudgudfala samting blong ol haeman blong hem, nao i karem evri samting ya i go long Babilon. 19 ✝Mo hem i bonem haos blong God, wetem ol haos blong king, mo ol narafala haos long taon ya, mo ol gudgudfala samting we i stap long olgeta, mo i brebrekemdaon bigfala stonwol blong taon ya. 20 Nao ol man Juda we oli stap, hem i karem olgeta i go long Babilonia, nao oli stap wok slef* blong hem mo blong olgeta we oli stap kamaot biaen long hem, kam kasem taem we king blong Pesia i rulum olgeta. 21 ✝Nao long fasin ya, tok ya blong Hae God we Profet Jeremaea i bin talemaot bifo i kamtru, we i talem se, "Bambae kantri ya i stap nating nomo we i no gat man long hem go kasem seventi yia, blong stretem ol yia ya we ol man ya oli no bin letem graon i spel.*"

22 Bifo, Hae God i bin givim tok blong hem long Profet Jeremaea blong i talemaot, mo long taem we King Sirus, man Pesia i rul long Babilonia*, long fas yia blong hem, Hae God i mekem tok ya blong hem i kamtru. Hem i mekem we king ya i mekem wan tok, mo i raetemdaon, nao i givim long ol man blong hem, blong oli go ridimaot long olgeta man long evri ples we hem i stap rul long hem. Long tok ya blong hem, 23 ✝hem i talem se, "!Olgeta! Hae God, hem i God blong heven, mo hem i putumap mi mi king long olgeta ples long wol ya. Bifo, haos* blong hem i stap long Juda,* long taon ya Jerusalem,* mo naoia wok blong wokem haos ya bakegen, hem i putum long han blong mi. Naoia i gud yufala evriwan we yufala i man blong hem, yufala i gobak long taon ya. Hae God i God blong yufala, mo prea blong mi we hem bambae i stap wetem yufala. Mi Sirus, mi Hae King blong Pesia, mo hemia tok blong mi."