1 Nao King Josaea i mekem Lafet* blong Pasova* blong ona long Hae God. Long fas manis blong yia ya, long namba fotin dei blong hem, olgeta oli kilim ol anamol blong lafet ya. 2 Nao king i makemaot ol wok we ol pris bambae oli mas mekem long yad blong haos* blong Hae God blong mekem lafet ya, mo i leftemap tingting blong olgeta blong oli wok gud long hem. 3 Mo hem i singaot ol laen* blong Livae* we oli tija blong ol laen blong Isrel,* mo oli tabu, oli man blong Hae God, blong oli kam luk hem. Nao hem i talem long olgeta se, "Hae God i God blong yumi, mo yumi mas obei long ol tok blong hem. Bokis ya we i Saen blong Promes* blong Hae God, hem i tabu, mo King Solomon, pikinini blong King Deved, hem i wokem haos ya blong Hae God, blong Bokis ya i save stap long hem. I no moa gat wok blong yufala, se yufala i mas karem i go olbaot long solda blong yufala. Yufala i go putum insaed long haos ya. Wok blong yufala, oltaem yufala i mas wok blong Hae God mo blong yumi evriwan ya we yumi ol laen blong Isrel.* 4 ✝Yufala i go stanap long ples blong yufala long haos ya blong Hae God folem ol grup blong yufala we oli karem nem blong ol olfala blong yufala, olsem we King Deved mo pikinini ya blong hem King Solomon, tufala i stap talem long ol olfala ya blong yufala. 5 Oltaem yufala i mas stanbae blong givhan long ol famle blong ol laen blong yumi. 6 Wok blong yufala, bambae yufala i mas kilim ol smol sipsip mo ol nani blong lafet ya. Naoia, yufala i mas mekem yufala i klin long fes blong Hae God, mo yufala i mas mekemrere ol sakrefaes, blong bambae yumi evriwan i save folem ol tok ya we Hae God i givim long Moses bifo, blong i givim long yumi."

7 Nao king i tekem ol sipsip blong hem wetem ol smol sipsip mo ol nani we olgeta evriwan i kasem toti taosen, i givim long olgeta man blong oli kilim blong mekem lafet ya, mo i givim tri taosen bul tu long olgeta, blong oli kilim blong mekem sakrefaes long Hae God. 8 Mo ol haeman blong hem tu oli tekem ol anamol blong olgeta, oli givim i go nomo long ol man ya wetem ol pris mo ol Livaet* blong oli kilim long lafet ya. Bakegen, tri haeman blong haos blong Hae God, we nem blong trifala, Hae Pris* Hilkia, mo Sekaraea mo Jehiel, trifala i tekem ol smol sipsip blong olgeta wetem ol yang nani we olgeta evriwan i kasem tu taosen sikis handred, oli givim long ol pris blong oli mekem lafet ya long olgeta, mo oli givim tri handred bul tu long olgeta blong oli mekem sakrefaes long taem ya. 9 Mo ol lida blong ol Livaet ya we nem blong olgeta, Konania, mo Semaea, mo brata blong hem Netanel, mo Hasabia, mo Jehiel, mo Josabad, olgeta oli tekem ol smol sipsip blong olgeta wetem ol yang nani we i gat faef taosen evriwan, oli givim long ol narafala Livaet blong oli kilim blong mekem lafet ya, wetem faef handred bul bakegen blong oli mekem sakrefaes long olgeta.

10 Nao taem ol pris mo ol Livaet oli mekemrere ol samting blong lafet ya finis, oli kam stanap long ol ples blong olgeta olsem we king i talem. 11 Nao taem ol Livaet oli kilim ol smol sipsip wetem ol nani we oli blong Lafet blong Pasova, oli tekemaot skin blong olgeta, mo ol pris ya oli karem blad blong olgeta, oli kafsaedem i go long saed blong Olta. 12 Nao oli seraot ol narafala anamol ya we i blong mekem sakrefaes ya we i blong bonem i bon evriwan, nao oli givim i go long ol grup blong ol man ya. Ol grup ya oli stap karem nem blong ol olfala blong olgeta bifo we olgeta ya oli kamaot biaen long olgeta. Nao ol grup ya oli mekem sakrefaes long olgeta olsem we Loa* ya we Hae God i givim long Moses bifo, i talem. 13 ✝Nao ol mit blong sipsip mo nani blong Lafet ya blong Pasova, ol Livaet oli rusum long faea, olsem we ol rul i talem, mo ol tabu mit blong ol narafala sakrefaes oli kukum long ol bigbigfala sospen mo ol bigfala kokot. Mo kwiktaem nomo oli givimaot ol mit ya long ol man. 14 Mo biaen, oli tekem sam mit blong olgeta, wetem sam blong ol pris, mo oli mekemrere kakae blong olgeta blong lafet ya. Ol pris* ya oli laen blong Eron, mo oli stap wok had gogo kasem tudak we oli stap bonem ol sakrefaes ya we i blong bonem i bon evriwan, wetem ol gris blong ol anamol blong Lafet ya. 15 ✝Long dei blong lafet ya, ol laen blong Asaf oli singsing. Oli stanap long stret ples blong olgeta stret olsem we King Deved mo Asaf mo Heman mo Jedutun we i profet blong king, oli bin talem bifo. Mo ol gad blong ol doa blong haos ya oli no livim ples blong olgeta tu, from we ol narafala Livaet ya oli mekemrere kakae blong olgeta blong lafet ya. 16 Nao long fasin ya, ol laen blong Isrel oli mekem evri samting long dei ya blong mekem wosip long Hae God, mo blong holem Lafet ya blong Pasova, mo blong mekem ol sakrefaes ya we oli bonem i bon evriwan long Olta, olsem we King Josaea i talem. 17 ✝Olgeta we oli stap long taem ya oli mekem Lafet ya blong Pasova, mo biaen, oli stap mekem Lafet ya blong Kakae Bred* we i No Gat Is long hem, go kasem seven dei. 18 I stat long taem blong Profet Samuel bifo, i kam kasem taem ya, neva oli mekem wan Lafet blong Pasova we i olsem hemia. Mo i no gat wan king bifo we i bin mekem wan Lafet blong Pasova we i olsem hemia we King Josaea wetem ol pris mo ol Livaet mo ol man Jerusalem* mo ol narafala man Juda* mo ol man Isrel oli mekem 19 long namba eitin yia blong hem we hem i rul.

20 Biaen long taem ya we King Josaea i finisim ol wok ya we hem i stap mekem long haos* blong Hae God, King Neko blong Ijip i lidim ol soldia blong hem i kam blong go mekem faet long taon ya Kakemis long narasaed Isrel* long not, long Yufretes Reva. Nao King Josaea i go blong mekem faet long hem blong blokem hem, 21 be king ya i sanem tok i kam long hem i talem se, "King blong Juda,* faet ya we mi mi kam blong mekem i no bisnes blong yu. Mi mi no kam blong mekem faet long yu, mi wantem go mekem faet long ol enemi blong mi, mo God i talem long mi finis, se mi mas hareap. God i stap long saed blong mi ya. I nogud yu girap, yu agens long mi. Bambae hem i spolem yu nomo." 22 Be King Josaea i no wantem harem tok ya we God i givim long king ya blong i talem long hem, nao hem i go blong mekem faet. Be taem hem i go, hem i putum ol narafala klos, blong mekem ol man Ijip ya oli no luksave hem, nao i go blong mekem faet long olgeta long bigfala levelples ya long Megido.

23 Nao long faet ya, ol man Ijip oli sutum hem long bonara, nao hem i talem long ol man blong hem se, "!Olgeta! !Mi karekil we i nogud olgeta! !Yufala tekemaot mi i gowe long faet ya!" 24 Ale, oli karemaot hem long kat blong faet blong hem, oli putum hem long wan narafala kat blong hem we i stap long ples ya, nao oli karem hem i kambak long Jerusalem.* Nao hem i ded, mo oli berem* hem long wan hol long ston long ples ya, long beregraon blong ol king. Mo olgeta man Jerusalem wetem ol narafala man Juda oli krae bigwan long hem.

25 Mo long taem ya, Profet Jeremaea i wokem wan singsing blong sore, mo ol man mo ol woman we oli stap long kwaea oli stap sing long singsing ya long taem we ol man oli stap sore long king ya. Nao fasin ya i kam wan kastom blong ol laen* blong Isrel, mo singsing ya i stap wetem ol narafala singsing blong sore kam kasem tede.

26 Ol narafala samting we King Josaea i mekem, we hemia ol gudgudfala samting we hem i mekem long Hae God, mo fasin we hem i folemgud Loa* blong hem, 27 mo ol narafala samting we hem i mekem, i stat long stat blong rul blong hem i kam kasem we hem i ded, oli raetemdaon long buk ya we nem blong hem Ol Stori blong Laef blong ol King blong Isrel, mo blong ol King blong Juda.