1 ✝Nao long taem we Josaea i kam king blong Juda,* hem i gat eit yia nomo. Hem i rul toti wan yia long kantri ya, mo hedkwota blong hem i stap long taon ya Jerusalem.* 2 Hem i stap mekem ol samting we Hae God i glad long hem, mo oltaem i stap folem ol gudfala fasin blong olfala bubu ya blong hem bifo King Deved, we i no gowe nating long rod blong hem.

3 Nao long taem ya we King Josaea i yangfala yet, long namba eit yia blong hem we hem i rul, hem i stat blong mekem wosip long Hae God olsem we olfala bubu ya blong hem bifo, King Deved i stap mekem. Mo long namba twelef yia blong hem, hem i stat blong mekem ol ples long Jerusalem* mo olbaot long Juda* oli klin bakegen long fes blong Hae God. Hem i tekemaot ol ples blong mekem wosip long ol narafala god, wetem ol aedol blong woman god ya Asera,* mo ol narafala aedol we oli stap long ol ples ya. 4 ✝Hem i lidim ol man blong hem oli go smasem ol olta blong god ya Bal,* mo oli brebrekemdaon ol olta blong bonem insens* we oli stap klosap long olgeta. Mo oli brebrekem ol aedol blong woman god ya Asera wetem ol narafala aedol, we oli stap smasem olgeta samting ya gogo oli kam asis. Nao oli tekem asis ya, oli go saksakem olbaot long ol beregraon blong ol man ya bifo we oli bin mekem sakrefaes long ol god ya. 5 ✝Mo hem i tekem ol bun blong ol hiten pris, i bonem olgeta long ol olta ya we olgeta oli bin mekem sakrefaes long olgeta bifo. Nao long fasin ya, hem i mekem Jerusalem mo ol narafala ples long Juda oli kam klin bakegen long fes blong Hae God. 6 Mo hem i mekem olsem tu long trifala distrik ya Manase,* mo Efrem,* mo Simeon,* mo i stap mekem olsem gogo i kasem distrik ya Naftali,* longwe long not. Long ol taon blong ol distrik ya, mo long ol ples we ol enemi oli spolem bifo, 7 hem i smasem ol olta mo ol aedol blong woman god ya Asera, mo i brebrekem ol aedol ya we i stap smasem olgeta gogo oli kam asis nomo, mo i brebrekem ol olta blong bonem insens tu, nao biaen, i kambak long Jerusalem bakegen.

8 King Josaea, hem i man blong Hae God, mo long taem ya we hem i stap rul, hem i stap kilimaot ol fasin blong mekem wosip long ol narafala god, gogo i mekem olgeta ples long Juda* wetem haos* blong Hae God i klin bakegen, i tabu. Nao long namba eitin yia blong hem, hem i jusumaot tri man, blong trifala i wokemgud haos ya blong Hae God bakegen. Nem blong trifala ya, i gat Safan we papa blong hem Ajalia, mo Mahasea we i gavman blong Jerusalem,* mo Joaha, we i wan sekretari blong king mo i pikinini blong Joahas. 9 Ol mane we ol man oli stap givim long Hae God long yad blong haos blong hem i stap long han blong ol Livaet* we oli stap gad long doa blong haos ya, mo oltaem, ol gad ya oli stap tekem ol mane ya, oli kam givim long Hae Pris* ya Hilkia. Ol gad ya oli stap kasem ol mane ya long ol laen* blong Efrem,* mo long ol laen blong Manase,* mo long smol haf blong ol narafala laen blong Isrel* we oli stap yet olbaot long not, mo long ol laen blong Juda mo long ol laen blong Benjamin,* mo long ol narafala laen blong Isrel we oli stap long Jerusalem tu. 10 Nao hae pris i givim mane ya long trifala man ya we oli stap lukaot long wok ya blong wokemgud haos blong Hae God bakegen, mo trifala i givim 11 long ol kapenta mo ol man blong wokem haos, blong oli pem ol ston mo ol timba blong wokemgud haos ya bakegen wetem ol haf blong hem, from we ol king blong Juda oli bin lego haos ya olgeta, blong i stap roten. 12 Ol man we oli mekem wok ya, fasin blong olgeta long wok ya i stret gud. Mo i gat fo Livaet oli bos long olgeta, we nem blong olgeta, Jahat mo Obadaea, we tufala i laen blong Merari, mo Sekaraea mo Mesulam, we tufala i laen blong Kohat. Olgeta Livaet oli nambawan man blong singsing, 13 mo sam long olgeta oli stap sanem ol samting blong wokem haos i kam long olgeta ya, mo sam oli stap lukaot long ol man blong wok long ol naranarafala ples, mo sam oli stap raetemdaon ol ripot blong ol wok ya, mo sam oli stap gad long haos ya.

14 Nao wan taem, taem ol gad oli stap tekemaot ol mane ya we oli bin putum insaed long storum long haos ya blong Hae God, hae pris ya i faenem buk ya we nem blong hem Buk blong Loa blong Hae God, we i gat Loa* i stap long hem we Hae God i bin givim long Moses bifo. 15 Nao hem i talem long Safan se, "Mi mi faenem buk ya blong Loa blong Hae God insaed long haos ya." Nao i givim buk ya long hem, 16 mo hem i tekem i go givim long king, i talem long hem se, "King. Mifala i wokem finis evri samting ya we yu yu talem. 17 Mifala i tekem ol mane ya we i stap long haos blong Hae God, nao mifala i givim long ol man blong wok ya wetem ol bos blong olgeta."

18 Nao Safan i gohed, i talem se, "Mo mi gat wan buk we hae pris i givim long mi." Nao hem i ridimaot ol tok blong buk ya long king, blong hem i harem.

19 Mo taem we king i harem ol tok blong buk ya, hem i trabol tumas, mo i fraet tu, nao i terem* klos blong hem blong soemaot we hem i harem nogud. 20 Nao hem i singaot hae pris, mo Ahikam we i pikinini blong Safan, mo Abdon* we i pikinini blong Mikaea, mo Safan we i sekretari blong hem, mo Asaea, man ya we i stap wetem hem oltaem, blong oli kam luk hem. Mo taem olgeta oli kam, hem i talem long olgeta se, 21 "Yufala i go luk wan profet blong Hae God blong faenemaot tingting blong hem long ol tok we i stap long buk ya, nao yufala i kam talemaot long mifala, blong yumi evriwan we i stap yet long Juda mo long Isrel, bambae yumi save rod blong folem. Naoia, Hae God i kros tumas long yumi from we ol bubu blong yumi oli no bin holem ol tok blong hem, mo oli no folem ol samting we buk ya i talem."

22 Nao i gat wan woman profet i stap, we nem blong hem Hulda. Man blong hem Salum, we papa blong hem Tikvaha mo bubu blong hem Hahas. Man ya i man blong lukaot long ol klos we ol pris oli stap yusum long haos blong Hae God. Profet ya i stap long haf ya blong Jerusalem we oli jes wokem, we nem blong hem Nambatu. Nao hae pris wetem ol narafala man ya oli go luk hem, oli talemaot long hem ol samting ya we i hapen. 23 Mo hem i talem long olgeta blong oli gobak long king 24 blong talemaot long hem we Hae God i talem se, "Bambae mi mi spolem taon ya Jerusalem, mo bambae mi panisim yufala evriwan we i stap long taon ya, olsem we mi promes* blong mekem long ol tok we oli raetem long buk ya we man ya i ridim i kam long yu. 25 Yufala i tanem baksaed long mi, yufala i stap mekem sakrefaes long ol narafala god, mo fasin ya blong yufala i mekem mi mi kros gud long yufala. Mi mi kros tumas long yufala, mo kros ya blong mi bambae i no save finis. 26 Be yu yu sanem ol man ya, blong oli kam faenemaot tingting blong mi, mo tok blong mi we mi wantem talem long yu i olsem. Mi mi Hae God, mi God blong yufala ol laen blong Isrel.* Yu yu harem ol tok blong buk ya finis, 27 mo taem yu harem tok ya we mi mi promes blong spolem taon ya blong yufala, mo blong panisim yufala, yu yu harem nogud, mo yu tanem tingting blong yu from ol sin blong yu. Yu yu mekem tingting blong yu i stap daon long fes blong mi, yu terem klos blong yu, mo yu stap krae. Nao mi mi harem prea blong yu, 28 mo from we yu yu tanem tingting blong yu olsem, panis ya we bambae mi tekem i kamtru long ples ya, bambae i no kamtru long taem we yu yu stap. Bambae yu yu gat gudfala laef gogo yu ded, nao biaen, panis ya bambae i kamtru."

Nao olgeta ya oli gobak long king, oli talemaot tok ya long hem.

29,30 Nao King Josaea i singaot ol lida blong taon ya Jerusalem,* mo ol lida blong ol narafala ples olbaot long Juda,* mo ol pris wetem ol Livaet,* mo olgeta narafala man, i stat long ol rijman, i go kasem ol puaman, blong oli kam mit wetem hem, nao olgeta evriwan oli go long yad blong haos* blong Hae God. Nao hem i tekem buk ya we hae pris i faenem insaed long haos ya, mo i ridimaot olgeta tok blong hem i go long olgeta blong oli harem. Buk ya i buk blong Promes* ya we Hae God i bin mekem wetem ol man blong hem bifo. 31 Long taem ya, king i stanap klosap long bigfala pos long doa blong haos ya, we i ples blong ol king oli stap stanap long hem, nao i mekem wan promes wetem Hae God, se bambae hem i obei long hem, i holem ol loa blong hem, mo ol tok blong hem long olgeta tingting blong hem, mo long evri haf blong laef blong hem. Mo hem i promes tu, se bambae hem i folem ol rul blong Promes ya we Hae God i bin mekem bifo, we oli raetem long buk ya. 32 Nao hem i mekem ol man Benjamin* wetem ol narafala man we oli stap long Jerusalem oli agri blong holem promes ya. Hae God i God blong ol bubu blong olgeta, mo i stat long taem ya, ol man ya oli stap obei long promes ya we oli mekem wetem hem. 33 Mo king i go long olgeta ples blong ol laen* blong Isrel,* i brebrekem olgeta aedol blong ol narafala god we oli stap long ol ples ya, nao hem i mekem ol man ya oli stap obei long Hae God. Mo oltaem long laef blong hem, olgeta we oli stap long ples ya oli no gowe nating long Hae God.