1 ✝Nao taem we king i finisim ol wok ya long haos blong Hae God, hem i go tekem ol silva, mo ol gol, mo ol narafala samting we papa blong hem King Deved i bin givim i go long Hae God bifo, nao i putum olgeta oli stap gud long ol storum blong ol samting olsem, long haos ya.

2 ✝Nao King Solomon i singaot ol lida blong ol laen* blong Isrel,* wetem ol lida blong ol famle blong olgeta, blong oli kam wanples long Jerusalem,* blong oli luk we ol pris oli go long haf ya blong Jerusalem we nem blong hem "Taon* blong King Deved", long hil ya Saeon,* oli karem Bokis ya we i Saen blong Promes* blong Hae God i kam long haos* ya blong Hae God. 3 Mo olgeta lida ya evriwan oli kam wanples long fes blong king, long taem blong Lafet* ya blong Wokem ol Wansaed* Haos. 4 Nao taem we olgeta oli kam wanples, ol Livaet* oli tekem Bokis ya, 5 oli karem i kam long haos blong Hae God. Mo biaen, ol pris wetem ol Livaet ya oli go tekemaot Haos Tapolen ya wetem ol narafala samting blong hem, we i stat bifo olgeta, olgeta evriwan oli stap go mit wetem Hae God long hem, mo oli karem ol samting ya tu i kam long haos ya. 6 Nao king wetem olgeta man oli kam wanples long fran blong Bokis ya, mo oli stap mekem sakrefaes we oli stap kilim ol sipsip mo ol buluk we plante we plante, we man i no save kaontem. 7 Nao ol pris ya oli karem Bokis ya i go insaed long haos blong Hae God, mo oli putum insaed long Rum ya we i Tabu we i Tabu, aninit long wing blong tufala pija ya blong jerubim,* 8 mo wing blong tufala we tufala i stretem i blokemgud bokis ya wetem tu longfala stik blong hem, we oli stap karem long hem. 9 Tufala stik ya i longfala, mo sipos man i stanap long Rum ya we i Tabu, long doa blong Rum ya we i Tabu we i Tabu, hem i save luk en blong tufala, be sipos i stanap afsaed, i no save luk. Mo tufala stik ya i stap yet long ples ya, kam kasem tede. 10 ✝Insaed long Bokis ya, i no gat narafala samting, tufala ston ya nomo i stap we Moses i putum bifo, long taem ya we hem wetem ol man blong hem oli aot long Ijip, oli kam stap long hil ya Sinae*, mo Hae God i mekem promes* wetem olgeta.

11-14 ✝ ✝Olgeta pris we oli stap wanples long ples ya, nating we oli stap long wanem grup*, be olgeta evriwan oli mekem olgeta oli klin long fes blong Hae God. Mo ol Livaet* we oli man blong singsing oli werem ol klos we oli wokem long gudfala kaliko ya linen,* mo oli stap stanap klosap long olta, saed i go long is. Olgeta ya, i gat Asaf, mo Heman, mo Jedutun, wetem ol pikinini blong trifala mo ol narafala laen* blong trifala, mo oli stap holem simbol* mo gita blong olgeta, oli stap plei. Mo i gat wan handred twanti pris tu oli stap, we oli stap blu long trampet. Nao ol man ya blong singsing oli stap sing, mo ol pris ya oli stap blu long trampet, mo ol narafala man ya oli stap kilim simbol mo gita, we i mekem singsing blong olgeta i gud we i gud tumas. Olgeta oli stap sing blong presem Hae God, oli talem se,

"Yumi presem Hae God,

from we hem i gud tumas.

Oltaem bambae hem i lavem yumi,

gogo i no save finis."

Mo taem ol pris oli livim haos ya blong go afsaed, wantaem nomo, klaod we i saen we i saen i kam fulap long haos ya, i soemaot we Hae God i stap, nao oli no moa save gohed blong mekem wosip.