2 Reis 4

Profet Elisa i halpem wan pua wido

1 Nao i gat wan wido i stap we man blong hem bifo i profet, i memba blong wan kampani blong ol profet. Nao wido ya i kam luk Profet Elisa, i talem se, "Profet. Mi ya, man blong mi i lus finis, mo yu yu savegud we hem i wan man blong Hae God tru. Be bifo, hem i mekem kaon long wan man, mo naoia, man ya i kam luk mi blong i tekemaot tufala pikinini boe blong mi, blong tufala i kam slef* blong hem, blong stretem kaon ya."

2 Nao profet i askem se, "?Bambae mi givhan long yu olsem wanem? Yu traem talem long mi. ?Yu gat sam gudfala samting i stap long haos blong yu?"

Mo woman ya i talem se, "I no gat wan samting nating. Wan smol botel olifoel* nomo i stap."

3 Nao profet i talem long hem se, "Yu go luk ol fren blong yu we oli stap raonabaot long yu, yu askem long olgeta blong oli givim plante emti botel long yu, blong yu save yusum fastaem. 4 Nao yu wetem tufala pikinini ya blong yu, yutrifala i go insaed long haos blong yu, yu satem doa, nao yu kafsaedem oel ya i go long ol emti botel ya. Mo taem oli fulap, yu putumgud olgeta oli stap wanples."

5 Ale, woman ya wetem tufala pikinini ya blong hem i go insaed long haos, mo hem i satem doa, mo tufala pikinini ya i stap karem ol emti botel ya i kam long hem. Nao hem i tekem smol botel oel ya, i stat kafsaedem oel i go long ol botel ya. 6 Mo taem hem i fulumap olgeta finis, hem i askem se, "?I gat wan moa i stap?"

Be wan long tufala pikinini ya i talem se, "No, hemia laswan ya." Nao oel ya i no moa ron.

7 Nao woman ya i go luk profet ya bakegen, mo profet i talem long hem se, "Yu go salem ol oel ya, nao yu go pemaot kaon ya blong man blong yu. Nao haf mane we i stap, bambae i naf blong yu stap pem kakae blong yutrifala long hem."