3 Nao Ebram i bodaon we fes blong hem i godaon i kasem graon, mo God i talem long hem se, 4 "Promes ya we bambae mi mekem wetem yu i olsem. Mi mi promes se yu bambae yu stamba blong ol man blong plante ples, we olgeta bambae oli kamaot biaen long yu. 5 ✝Bambae oli no moa singaot yu se Ebram. I stat naoia, nem blong yu Ebraham*, from we mi mi mekem yu yu kam stamba blong ol man blong plante ples. 6 Bambae mi mekem we yu yu gat plante pikinini we bambae oli kamaot biaen long yu, mo sam long olgeta bambae oli king blong ol man long ples blong olgeta. Bambae oli kam plante we plante, nao bambae oli holem ol graon long plante ples.

7 ✝"Promes ya we mi mekem wetem yu naoia, bambae mi mi stap holem oltaem wetem yu, mo wetem ol pikinini we bambae oli kamaot biaen long yu, from we promes ya bambae i stap olwe, i no save finis. Mi bambae mi God blong yu, mo blong ol pikinini ya we bambae oli kamaot biaen long yu. 8 ✝Graon ya, naoia yufala i stap long hem olsem we yufala i strenja nomo, be mi bambae mi givim i go long yu wetem ol pikinini we bambae oli kamaot biaen long yu, blong i graon blong yufala. Olgeta graon blong ol laen* blong Kenan* bambae i graon blong yufala. Bambae yufala i save holem gogo i no save finis, mo mi bambae mi God blong yufala."

9 Nao God i talem long hem bakegen se, "Be yufala tu i mas agri blong holem saed blong yufala long promes ya we mi stap mekem wetem yufala. Yu yu mas agri blong holem, mo ol pikinini ya we bambae oli kamaot biaen long yu, olgeta ya tu oli mas agri blong holem. 10 ✝Tok we yu wetem olgeta ya, yufala evriwan i mas agri long hem blong mekem promes ya i stanap, hem i olsem. Yufala evriwan we i man, yufala i mas sakomsaes.* 11,12 Naoia yufala i mas mekem sakomsaes long yufala. Mo i stat naoia, sipos yufala i bonem pikinini we i boe, bambae long namba eit dei blong hem, yufala i mas mekem sakomsaes long hem. Mo yufala i mas mekem sakomsaes long olgeta pikinini boe blong ol slef* blong yufala, mo long olgeta man we yufala i pemaot long ol narafala ples blong oli kam slef blong yufala. Fasin ya bambae i soemaot we mi mi mekem promes wetem yufala, mo we yufala i stap holem promes ya.