3 Nao profet i talemaot we Hae God i talem se,

"!Ol laen blong Isrel!

Yufala we i stap yet,

yufala i lesin long mi.

Bifo, yufala i plante,

be naoia, yufala ya nomo i stap.

Mi mi stap lukaot long yufala,

i stat long taem we yufala i bon.

4 Mi mi God blong yufala,

mo mi bambae mi stap lukaot long yufala yet,

gogo hea blong yufala i kam waet.

Mi mi mekem yufala,

mo mi bambae mi holem yufala i stap gud.

Mi bambae mi stap givhan long yufala,

mo mi bambae mi stap sevem yufala.