1 Bwulus, əza n a ɓə yi wo ge waa zhni Kirisiti Yeisu tnutnuloyi dna n Shekwoyi ɓəye, ɓədo n əyi zadoi, Sositeni.

2 Kwo lo da ikilisiya Shekwoyi nya dna n Kworenti, ga aza yi n a la ɓa pmya fyi n Kirisiti Yeisu nyi, jesnu ń a la ɓa yì ɓa kwu zhni əwo aza gyigyiyi, n kwnusnu n azai vnyanya n ɓwahoɓwahoi, n ɓa yi əyi Dagayi Yeisu Kirisiti əye lo; əɓa Dagayi n əyi nyai.

3 Shebmyashi n bwugbafui ɓa ɓe da fye, n ɓa kwnu n Shekwoyi əyi Dada aba ɓədo n Dagayi Yeisu Kirisitii.

4 Mi sa əmi Shekwoyi ami ciici ntu əwo shebmyashi ɓo n wo ncei ga fye dna n Kirisiti Yeisu nyi. 5 Ntuge dna n əwo nu n a kwu fye zè anyaɓwayi n zokwo dəhodəhoi; n ɓəda dəhodəhoi pyai, n ɓəyekpei vnyanya. 6 Nlonu Shekwoyi wo tu əyi ɓəgbmi bwokwnu lo, ntu Kirisiti ɓo dna n əfye atasni. 7 Ntucenu, fye to gyi zafnu nyaga ho əsna lo m; shi fye zhi fyei pmi n awyeyai, əyi Dagayi Yeisu Kirisiti kpekpeyaɓe. 8 Wo ɓa myi fye zhi nya zozo əsa, nabai n fye ɓə kwu zhi ntnaɓətu n əyi Dagayi Yeisu Kirisiti əwyii. 9 Shekwoyi n wo la fye yì fyi n ɓwadodna n kwnusnu n əwo Nugwnui, Yeisu Kirisiti əyi Dagayi nyi, wo zhni gbenui nu.

10 Mi tna fye aɓwa, əmiaje azanugbai n anyikwozai, dna n əyi Dagayi Yeisu Kirisiti əye, nge əfye vnyanya fye kwu gbelodo n ajei dna n əɓo n fye da jesnu to a ɓwa ajegna n əfye atasni m. Ama a gye fye n əgbei lodo n aba gbmanyi cewo dna n bwugba n ɓənubwozhnii. 11 Əmi azaje azanugbai n anyikwozai, azaho n ɓa kwnu n Kiloo pwuwa, ɓa kwu gna mi nge anyàwu fyilo n əfye atasni. 12 Əɓo n mi zhninubwo ncei əkwo nu nyi: Zaknayi n fye gna lo, "Mi vyi Bwulus nu"; əzado, "Mi vyi Apwolos nu"; əzado, "Mi vyi Kefas nu"; dudulonu əzado, "Mi vyi Kirisiti nu."

13 Kirisiti gnaje lo nu u? Bwulus nu ń a ɓə znudu ntu əfye ɓo? A ɓə zhni fye batizima fyi n Bwulus əye nu? 14 A da mi lo n Shekwoyii nge mi to ɓə zhni zahozahoyi batizima n fye m, akpəge Kirisipwus n Gayusii, 15 ntulonu əzaho to lo n wo ɓa gna ge a ɓə zhni wo batizima dna n əmi əye nu m. 16 (Əə, njesnu mi ɓə kwu Stefanas pwuwa zhni batizima ce, ama mi ta je əzado əye kpəlo n mi ɓə kwu batizima zhni wo m.) 17 Ntuge Kirisiti to ɓə tnu n mii nabai ma zhni batizima nu m, ama ma da nabagyi manai; toge n wyemwai n ɓədakpedai m, nabai to ikwo Kirisiti znudu nya kwaa zè gbəloi m.

18 Ntuge znudu ɓədatnu zhni amama ɓo nu n aza yi aba n ɓa zhi ɓai ɓwu nyi, ama n əyi aba, n a gnyi ai gnyi yi nyi, əkwo nu zhni ikwo Shekwoyi nya. 19 Ntuge a cei kafyilo:

"Mi ɓə kwu aza aceceyi wyemwa zhniagbma;

aɓəyekpeyii ɓəyekpe, mi ɓə zè kwo awyegbmiaje."

20 Əza cecei gnyi nanu a? Owa nyawuyi gnyi nanu a? Aɓoajekwuyi cala ye nya gnyi nanu a? Shekwoyi to la wyemwa anyì nya zè amama əɓo m? 21 Ntuge shikwonyi dna n Shekwoyi wyemwa, anyì dna n əkwo wyemwa, to ɓə kpe əwo əye m, kwo ɓə lá Shekwoyi dagbma dna n waazizhni amama əɓo nya, wa gnyi aza yi n ɓa ga gaiciya nyi. 22 Ayahudiyi ɓa la gyitu nge ɓa ye a wu ɓa aznù, Agirikiyi ɓa zna wyemwa nu shni, 23 ama əyii da yi zhni Kirisiti znuznuidu waazi nu: Ayahudiyi bwonyice kwuta, jesnu amamaɓo n Abyedo aba, 24 ama aza yi ń Shekwoyi wo la ɓa yì nyi, Ayahudiyi ɓədo n Agirikiyi, Kirisiti nu zhni ikwo Shekwoyi nya n wyemwa Shekwoyi nyai. 25 Ntuge Shekwoyi amamaɓo kwo du zanyikwoci wyemwa lo ń cece, jesnu Shekwoyi kalágba kwo du zanyikwoci akalá lo ń akalá.

26 Əmi azaje azanugbai n anyikwozai, fye zhni əɓonubwo aza pya n fye ɓə zhni, əsa ń a ɓə yi fye nyi. Bəgyé n əfye, fye to ɓə cecei vyi zanyikwoci ɓəknawna nya m; bəgyé n fye, fye to ɓə kwnuce a kpmima fye m; bəgyé n fye, fye to ɓə zhni awyekpmiwuyi nu m. 27 Ama Shekwoyi wa knyí anya amama nya n anyì nabai wa dna aza acecei vnyinkwo; Shekwoyi wa knyi anya akalágbai dna n anyì nabai wa dna akaláda vnyinkwo. 28 Shekwoyi wa knyí anya gbàgbài n awyegbacii dna n anyì; ń anyai n ɓa to lo m; nabai wa kwu anya n ɓa lo zè gbəloi, 29 nabai n əzaho taa myi wa gyigbe gnyi n əwo abye m. 30 Ntu n Shekwoyi ye əɓo nu n fye fyi n Kirisiti Yeisu, n wo la zè wyemwa Shekwoyi nya n əyi aba; n kwo nu zhni, əyi ɓəfyece, gyigyi n əyi shnashnai nyi. 31 Ntucenu, ngye shi kwo kafyilo: "Fa əza n wo ɓa gyigbe, wo gyigbe dna n Dagayi."