1 Fye vyi əmi ɓədogbe, ngye she əmihni vyi Kirisiti ɓədogbe nyi.

2 Mi ci fye lo ntuge fye pa mi ɓo lo dna n ɓəhoɓəhoi jesnu ntu n akwnunu ɓwashi ɓo, n ɓwasnu shi mi ɓə ga fye ɓa nyi. 3 Ama, mi ncei pmalo fya kwu kpe nge Kirisiti nu zhni zanugbai dəhodəhoi tukwo, jesnu nge zanugbai nu zhni nyikwoza tukwo, jesnu nge Shekwoyi nu zhni Kirisiti tukwo. 4 Zanugbai dəhodəhoi n wo zhniaduwa kwo n wo da sheɓəgwogna n tukwoi pwuanya, wo la əwo tukwo ciwyegba. 5 Ama nyikwoza dəhodəhoi n wo zhniaduwa kwo dna n əwo sheɓəgwognadada ntna tukwo anyapwui, wo la əwo tukwo ciwyegba; kwo ɓwa wulo ngye wo la əwo tukwo wnu nu. 6 Ntuge n nyikwoza to wna alufuta m, wo ɓa myi waa əwo tukwoyi gbeya; ama ngye kwo zhni əɓo vnyinkwo nya nu n nyikwoza aba, wa əwo tukwoyi gbeya kwo wa wnu əwo tukwo, to, wo kwu alufuta wna.

7 Zanugbai to gwo wa pwu əwo tukwo anya m, shikwonyi əwo nu zhni dogbe ɓədo n latui Shekwoyi nya; ama nyikwoza zhni latu zanugbai nya nu. 8 Ntuge zanugbai to ɓə gbmi n nyikwoza nu m, ama nyikwoza nu n zanugbai. 9 Njesnu a to ɓə zhni zanugbai ntu nyikwoza ɓo nu m, ama nyikwoza ntu zanugbai ɓo. 10 Ntu amaləka ɓo, kwo gwo nyikwoza wa kwu alufuta wna kwa wu əznù ikwo nya tu n əwo tukwo.

11 Dudulonu, dna n Dagayi, nyikwoza to lo n kpeyagnyi wohniwohni ntna zanugbai, kwo zanugbai n kpeyagnyi wohniwohni ntna nyikwoza m. 12 Ntuge ngye shi nyikwoza ɓə gbmi n zanugbai nu nyi, ntulonu ce nyikwoza nu ma zanugbai. Ama nyahonyahoi gbmi n Shekwoyi aba nu.

13 Fye da owa ye ga əfyehni tukwo: Kwo bmyalo nyikwoza wa zhniaduwa ga Shekwoyi ntna alufuta wna a? 14 Shi a ɓə zhni yi n wu nyi, əkwo n kwohni to wu yi nge n zanugbai n tukwoyii ya kpe n mwakpa, kwo zhni vnyinkwo ɓo nu n əwo aba, 15 ama n nyikwoza ɓə n tukwoyii mwakpa, kwo zhni əwo latu nu m? Ntuge a ga wo tukwoyi kpamwai kwaa zè əwo anyapwu nya nu. 16 Ngye əzaho ncei pmalo wa gnyiapaapa ntu əɓəye ɓo, yi to n kwnunu dəhoi lo yii shiɓwa; kwo aikilisiya Shekwoyi nya to cei lo m.

17 Fyi n aɓəgbetu n ɓa fyi shi nyi, mi taa ci fye m, ntuge əfye yezhi wnu aɓoya lo n mwa, n du aɓo manai. 18 N kpmisnuyi, mi wo lo nge, əsa n fya yezhi ngye Ikilisiya, ajegna lo n əfye atasni, mi la gaiciya ga n aɓəho, nge kwo kwu wulo nlonu. 19 Gaiciya nu, a ɓa gye ajegna kwufyi lo n fye, nabai kwa wu aza n əfye atasni n Shekwoyi la əwo əɓwa tu n ɓa nyi. 20 Ntulonu, əsa n fya yezhi n aba gbmanyi, Dagayi nyagyi nu to n fye gyi m, 21 ntuge əsa n fye fyi fyei gyi nyagyi, azaho n fye, ɓa gwodu ɓa gyi əɓahni pwuwa nyagyi ɓa sni ənya kwaa duwyi. Ntu n dəye ɓo, əzaho waa gnyi n myikwnui, əzaho n nubwofui. 22 Fye to n apwuwai lo n fye ɓa gyi fyei sni fyi m? Kwo fye ci Shekwoyi Ikilisiya wyegba nu fyei zè aza yi awyegbmiaje n ɓa to n nyahoi lo nyi m? Knyiɓei nu n mi ɓa gna fye a? Mi ci fye nu? Kwo fyewyi, toge n ɓəda ye tukwo m!

23 Ntuge mi ɓə gwo n Dagayi akwnu nu ənya n mi ɓə dna fye n akwnu nyi: Dagayi Yeisu, dna n sukwo yi ń a ɓə ɓwu wo nyi, wa la biledi, 24 jesnu she wo ɓə kwu amisa ga, wa sa kwo ya, wa gna, "Dəye nu zhni əmi nayi n kwo shi ntu əfye ɓo; fye zhni dəye fyei pá əmi ɓo." 25 N ɓwasnu lonu, shi ɓa ɓə kwu pwo nyagyi gyi ɓo, wa la bwoɓyi shi woi gna, "Bwoɓyi ye nu zhni ɓəgbeshi woiwoyi dna n əmi ami; fye zhni dəye, əsahosahoi n fya sni kwo, fyei pá mi ɓo." 26 Ntuge əsahosahoi n fya gyi biledi ye jesnu fyaa sni bwoɓyi ye, fye da Dagayi əfyi ɓo nu nya əsa n wo ɓə jezeɓe ncei.

27 Ntucenu, zahozahoyi n wa gyi Dagayi biledi ye jesnu waa sni əwo bwoɓyi to woi dna n zokwo m, wo ɓa gnyi ǹ ɓəgyii leifyizhni nya tu n Dagayi nayi n amii. 28 Zahozahoyi gwo waa əwohni kawye byiwuu wa kpe biledi gyi jesnu wa kpe ənya sni n kwo fyi n bwoɓyi nyi. 29 Ntuge zahozahoyi n wa gyi jesnu waa sni to woi kpé Dagayi nayi ɓəgənyi m, wo gyi jesnu woi sni owa nu tu əwohni. 30 Cenuzhni azaho n əfye atasni ɓa kwu gbakalá n anyasnai, jesnu aza n mwa bəgyé n əfye ɓa kwu fyí. 31 Ama yi ɓə gna ya kwu gənyikpe ɓwaɓe ntu əyihni ɓo, yi to ɓəə ɓa lofyi n owada ye pya m. 32 Dudulonu, əsa n Dagayi da yi owa n zokwo ye, a ga yi tata nu nabai n kpmasnu n a to ɓə znu yi əknyi n kwnusnu n anyì m.

33 Ntulonu nsaiye, əmi azaje azanugbai n anyikwozai, əsa n fya yezhi fya gyi Dagayi nyagyi, əfye vnyanya fya gyi kwo n kwnusnu. 34 Əza n myikwnu gwnu wo lo, wo kwu nyaho gyi n apyi, nabai nge shi fye shegwnu aje ń kwo taa ɓe n owadai m.

Njesnu əsa n mi ɓə ɓe ncei, mi ɓə ga fye aɓəfyefyi aje.