1 Ɓəhnihni a kwu anabagyi gna yi nge asisiɓozhni fyilo n əfye atasni, ədo pya, ń kwo atnavyiyi, ta ye kwo zhni ɓo m: Əza woi wnagye n əwo dada nyikwoi. 2 Njesnu fye gbma lo ntu kwo ɓo! Kwo ɓəə gwo fya wnubwugba nu, fya əza yi gbmiya n jedoɓəzhni n fyei. 3 N əmi aba, kwo shikwonyi mi to gnyilo n aba yi m, mi kwnusnu lo n fyei dna n zafnu. Ngye əza n wo kwnusnu lo n fyei n zokwo ye, mi la owa lu znuya tu n əza yi, n wo zhni ɓəye nyi, dna n əyi Dagayi Yeisu əye. 4 Ntulonu əsa n fye ɓə yezhi ncei, jesnu mii kwnusnu n fyei dna n zafnu, n ikwo Dagayi Yeisu nyai, kwoi gnyi n abaayi, 5 fye ɓə ya əza ye dna n Shetam akwnu, ntu n nayi agbmazhni ɓo, nabai n əwo zafnu ɓə la pwo dna n nyipyei Dagayi nya.

6 Əfye əgbegyi to bmyalo m. Fye ta kpəlo nge yisti ɓyiyi zhni wyilukwu bwubwui mimíi kwaa snu m? 7 Fye la yisti kwokwoi kwnuya nabai n fye ɓa kwu zè wyilukwu bwubwui mimíi woiwoyi ntna yisti fyii; ngye shi fye lo n shnisnusnu. Ntuge a la Kirisiti əyi gnanaznu Kwugyasnáyi nyagbmí ga. 8 Ntucenu yi kwu Awyefna ye shiɓwa, toge n biledi kwokwoi pyai n kwo nunui n aɓəshinmìi kwo n əkpízhnii m, ama n biledi tnayisti ɓəhnihni nya n gaiciyanunui ɓwashii.

9 Mi ɓə kwu ka ga fye dna n əmi paka nge fye to dna əɓwado n anagbaizhniyii m. 10 Mi ta da aza cala ye nya nu ɓo m, n ɓa zhni anagbái nyi m, kwo əwyeda m, kwo azagyifyiyi m, kwo ashnagbayii m. N kwa wu nlonu, a gye fye ɓa kwu anyì ye fa nu. 11 Ama nsaiye mi ka ga fye nge ɓəshishi nu, fye taa dna əɓwado n zahozahoyi n wo yi əwohni nge əyido kwo mapwii, ama woi zhni anagbái kwo əwyeda m, kwo əshnagbayi, kwo aza aɓəciyayi, nyasniyi kwo zagyifyiyi m. Kwo nyagyi, to gyi nyagyi n aza yi pyai m kwo fyewyi.

12 Əza wada n wo to dnalo n ikilisiya m, kwo dna əmi nya lo n wunanu a? Fye taa da aza yi nu owa n ɓa fyi n kwnusnu əyi nyi m? 13 Shekwoyi ɓə da aza yi owa n ɓa zhi lo n əbmyi nyi. "Fye la əkpizhniyi nyaya n əfye atasni."