1 Ntulonu, kwo ɓə wu nlonu n əmi aba, əmi azaje azanugbai n amapwii. She mi ɓə ɓe əfye aba, mi to ɓə ɓe n ɓədakpedai nu, kwo n zanyikwoci wyemwai əsa n mi ɓə dnawyi ga fye ɓəgbmi ntu Shekwoyi ɓo nyi m. 2 Ntuge mi ɓə la kwo dna n əmi ədu nge əsa n mi ɓə kwnusnu n fyei nyi, mi to ɓə ncei pma ma kpe ɓəho əye m, akpəge Yeisu Kirisiti jesnu əwo znuznudui. 3 Mi ɓə ɓe əfye aba dna n kalágba nu n ədnawo yaakwoi ɓədo n vnyivnyii. 4 Əmi nyawu n waazizhnii to ɓə zhni cece nya nu n aɓəda nyitala dadayii m, ama kwo ɓə wu Zafnu kalá ɓəzhni nu 5 nabai n əfye gaiciyaganunui kwo taa kpema n zanyikwoci wyemwa m, ama n Shekwoyi kalá.

6 Dudulonu, yi da wyemwa ɓədatnu nya ga aza n ɓa kwu kwofyi n zafnu, ama toge n wyemwa cala ye nya, kwo abegyiyi cala ye nyai, n əɓa aɓo ɓa duya nyi m. 7 Aawo, yi dnawyi Shekwoyi wyemwa nya nu, asigyi n kwo ɓə ɓwushi jesnu n Dagayi ɓə zhni kwo ntu əyi latu ɓo, to ai zhni anyì m. 8 Begyiyi ho to lo cala ye nya, n wo ɓə n əkwo awyegai m, ntuge ɓa ɓə gna ɓa kwu kwo kpe, ɓa to ɓə ɓa ye Dagayi latui znudu ɓo m. 9 Dudulonu, ngye shi a cei kafyilo:

"Ənya n əwye too gyewye m,

ənya n tnubwa too wo m,

jesnu ənya n zanyikwoci bwugba too shni kwo nubwozhni m"

anya n Shekwoyi wo kwu zhnizhi ntu n aza yi ɓo n ɓa ye wo nyi;

10 anya nu nyi n Shekwoyi wo la ɓa kpmiyawu yi n əwo Zafnui.

Zafnu pmi aɓəgye vnyanya, dù n aɓo aloloyii Shekwoyi nya. 11 Ntuge nyika nu kpe əzado ɓənubwozhni ye lo a, n to əwo zafnu nu ɓwasnu n wo dna n əwo mi nyi m ma a? N ɓwasnu n zokwo ye, əzaho to lo n wo kpe Shekwoyi ɓənubwozhni m, akpəge Shekwoyi Zafnu. 12 Ənya n yi la gwo nyi, kwo to zhni zafnu anyì nya nu m, ama Zafnu n wo gbmi n Shekwoyi aba, nabai ya ɓwa anya awyega n Shekwoyi wo kwu ɓa ga yi n adaada nyi. 13 Əɓo nyi n yi da, toge a wu yi ɓa n zanyikwoci wyemwai nu m, ama n aɓədagbmai n Zafnu nu wu, ai kna zafnu-atnutnu awyeya n aɓədagbmai n Zafnu nu wu. 14 Əza ntna Zafnu, wo taa gwo aɓo n ɓa kwnuɓe n Shekwoyi Zafnu m, ntuge ɓa zhni amama ɓo nu n əwo aba, jesnu wo taa ɓwa əɓa awyega m, ntuge a kpe əɓa ɓəgənyi dna n Zafnu nu. 15 Əza Zafnu da zhni wa da owa tu n aɓo vnyanya, ama əwo n əwohni tukwo, a taa myi a da wo owa zanyikwoci azanga nya m, 16 ntuge,

"Nyikanu lo n wo kwu Dagayi bwugba kpeye

n wo ɓa ga wo aɓəgbega a?"

Ama yi n Kirisiti bwugbai lo.