1 Mi to loloiya lo m? Mi to zhni tnutnuloyi nu m? Mi too kwu Yeisu əyi Dagayi gyewye m? Əfye nu to zhni gyiba əmi tnutnu nya dna n Dagayi m? 2 Kwo ngye mi to zhni tnutnuloyi nu n azaje aba m, ɓəhnihni mi zhni əkwo nu n əfye aba! Ntuge əfye nu zhni tuzè əmi tnutnuloyizhnizhni nya dna n Dagayi.

3 Dəye nu zhni əmi ɓəgbedna ga aza yi n ɓa sase zhi ɓai da mi owa nyi. 4 Yi to n ɓədái lo ya gyi nyagyi yii sni nuwna m? 5 Yi to n ɓədái lo ya zna n nyikwo gaiciyagayi m, shi atnutnuloyi aje ɓədo n Dagayi azajei ń Kefasii zhni nyi m? 6 Kwo əmi nu ɓwasnu lo n Banabai n yi to n ɓədái lo m, ama sai ya zhni tnutnu nabai ya ɓwa nyagyi a?

7 Nyika nu lo okwnusnu n əwohni ajegwu a? Nyika nú nu anamzhni to wa ɓwo əkwo gyigyiyi ma a? Nyika nu kpa anakwo to wa sni nunu ma a? 8 Mi da ɓəye n ɓwasnu tu n zanyikwoci ɓəznu nu? Owa to da əɓo gbmanyigbmanyi nu m? 9 Ntuge a ncei kafyilo n Mwusa owa: "A taa dna nakwo lukwutu kwoi gnyi kwoi dna awyi m." Shekwoyi ɓəmwi kpetu lo n nakwo nu? 10 Ɓəhnihni wo da dəye ntu n əyi ɓo nu, nlonu nu to m? Əə, a ɓə ka dəye ntu n əyi ɓo nu, ntuge əza n wo nu ofwa jesnu woi lú awyi, wo ɓa myi wa zhni nlonu n awyei tu nge wo ɓə kwnu afwanyakwu gyiba ɓwa. 11 Ngye yi kwu zafnu nyabye bye n əfye atasni, kwo duwyilo nu ya do anya apmanya n əfye aba a? 12 Ngye azaje n ɓədái lo ɓa gwo ɓwace n fye, kwo to kwnuce lo əyi nya kwaa gna dudu m?

Ama yi to ɓə zhni apma n ɓədá yei m. N əkwoɓwi, yi ɓə kwu bwugbaɓwa n nyahonyahoi nabai n yi taa kpe Kirisiti nabagyi manai gnyi m.

13 Fye ta kpəlo nge aza n ɓa zhni tnutnu ń Dagayipwuwa ɓa gyi nyagyi n Dagayipwuwa nu, jesnu aza yi n ɓa zhni tnutnu n bəgədi nyi, ɓa zhni ɓa ɓwa anya nu n a ga kpe n bəgədi m? 14 N zokwo gbmanyi ye, Dagayi wo la əgbe ga nge, aza yi n ɓa zhni nabagyi manai waazi, ɓa ɓá ɓwa əɓa nyagyi n nabagyi manai nu.

15 Ama mi too zhni apma n ɓədá dəhoi m. Njesnu mi ta ka dəye n awyetui nu nge fya zhni aɓo ye pya ga əmi nu m. Ntuge mi ɓa gnaye ma fyí, a fa ədo n mi ɓa ye əzaho wa kpma mi əgbegyi ye. 16 Ntuge she mi zhni nabagyi manai waazi, mi taa myi n gbegyi m, ntuge a kwoi yeyefyi mi nu ge mi zhni nabagyi manai waazi. Owii n əmi aba n mi to zhni nabagyi manai waazi m! 17 N ma zhni nabagyi manai waazi n əmihni ɓəyei, mi n gyibai lo; ama ń toge n əmihni ɓəyei nu m, a gye mi ɓwa tnutnu nu zhni n a la kwo fnyi mi əɓwa nyi. 18 To knyiyi nu zhni əmi gyiba a? Əkwo nu ɓwasnu nyi: nge dna n əmi nabagyi manai waazizhni, mi ɓa zhni kwo n adaada, jesnu nabai n mi taa zhni apma n əmi ɓədái vnyanya ngye nabagyi manai waazizhniyi m.

19 Kwo shikwonyi mi loloiya lo jesnu mi to dnalo n əzaho akwnu m, mi la əmihni zè fyenu n zahozahoyi aba, ma ɓwa abwiyei n mwa bəgyé shi mi ɓa myi. 20 N Ayahudiyi aba ma zè Yahudiyi, ma ɓwa Ayahudiyi. N aza yi aba n ɓa fyi n owa snuta, mi ɓə la zè ngye əza n wo dna n owa snuta (kwo shikwonyi əmi n mihni mi to dnalo n owa snuta nu m), nabai n mi ɓa ɓwa aza yi n ɓa fyi n owa snuta nyi. 21 N aza yi aba n ɓa to n owai lo m, mi ɓə la zè ngye əza n wo to n owai lo m (kwo shikwonyi mi to loloiya lo n Shekwoyi owa m, ama mi dna n Kirisiti owa snuta nu), nabai n mi ɓa myi ma ɓwa aza yi n ɓa to n owai lo m.

22 N akalágbayi aba, mi ɓə la zè kalágbayi, nabai n mi ɓa ɓwa akalágbayi. Mi la zè anya vnyanya n aza vnyanya aba nabai n zokwo dəhodəhoi, n kwo ɓa yezhni, n mi ɓa myi ma gnyi azaho. 23 Mi zhni aɓo ye vnyanya ntu nabagyi manai ɓo nu, nabai n mi ɓə ɓwa əkwo anabəlika n kwnusnu.

24 Fye ta kpəlo m, nge ń əsibwuyi gbegyi nya, asibwuyi vnyanya nu bwusi, ama əza gbmanyi nu ɓwa nyaga gwo m? Bwusi n zokwo n ho ɓə myi ha gwo nyaga. 25 Zahozahoyi n wo lodna n gbegyi awyefna, wo zhni wa ta əwohni n əwyei bmyibmyiyi. Ɓa ta əɓahni ntu fnunyi ɓo n kwo taa gnyi nyalonyalo nyi m; ama yi zhni kwo nabai n yi ɓə ɓwa fnunyi nu n kwo ɓə gnyi nyalonyalo. 26 Ntucenu, mi ta bwusi ngye əza nu n wo bwusi ntna ɓətukwo m; mi ta snugwu ngye əgwusnuyi n wo she akwnu fyi n əse m. 27 Aawo, mi znu əmihni nayi ənya jesnu ma zè kwo əmi fyenu nabai nge shi mi ɓə kwu nabagyi manai zo azaje da, əmi n mihni, to ai la mi gbmiya n anyaga gwoyi m.