1 Fye vyi yeye zokwo jesnu fya kwu Zafnu anyaga pwawo fyi n wyenyii, n gnasnusnu sheɓəgwognada nyaga. 2 Ntuge zahozahoyi n wo daɓo n nyitala bmaznui, wo ta daɓo n azanyikwocii nu m, ama n Shekwoyi nu. Ɓəhnihni əzaho to lo n wo kpe ɓa awyega lo m, ɓa da asigyi ɓo nu dna n Zafnu. 3 Ama əza n wo da sheɓəgwogna, wo daɓo n azai nu ntu əɓa bwugbakaladna ɓo, agwumyi ɓədo n atnazhnii. 4 Əza n wo daɓo n nyitala bmaznui wo ɓwa əwohni nu myignyi, ama əza n wo da sheɓəgwogna wo myi Ikilisiya nu gnyi. 5 Mi ncei pmalo zahozahoyi n fye wa daɓo n anyitala bmaznui, ama mi ncei gnapma lo fya da sheɓəgwogna nu. Əza n wo da sheɓəgwogna wo du əza lo n wo daɓo n anyitala bmaznui, akpəge əzado lo wa pmyibma nabai Ikilisiya kwa ɓwa myignyi.

6 Nsaiye, əmi azaje azanugbai n anyikwozai, n ma ɓe əfye aba jesnu ma daɓo n anyitala bmaznui nu, kwo n knyi apmai nu lo n əfye aba a, akpəge ma ɓe fye n ɓəkpeyawui kwo ɓəyekpe kwo sheɓəgwogna kwo ɓədagbma əgbega nya? 7 Kwo ntu anya ɓo, n ɓa to n wyewyeyii lo m, ama ɓai ɓwa ashna nu ci, anya ngye mwayí kwo amisná, nyika nu ɓa kpe əɓwi pya ye n kwo ci, to kwoi n əɓwii kakai lo n aje ma a? 8 Njesnu, n okwnu mwayi to yi aza n əɓwii kwnukwnuiya m, nyika nu ɓa ye əwohni ntu okwnusnu ɓo a? 9 Kwo wulo n əfye aba nlonu. Akpəge fya da ɓədagbma awyega nya n əfye anyitalai, nyika nu ɓa kpe əɓo n fye gnyi fyei da a? Fye ɓa kwu ɓwazhi fyei daɓo fyi n əse nu. 10 Ntna aɓəna, abye n mwa bəgyé fyilo n anyì, dudulonu dəhodəhoi to lo n kwo to n awyegai lo m. 11 Ngye mi to ɓwa awyega əɓo n əza da nyi m, mi zhni əknyidoda nu n ɓədadayi aba, jesnu wo zhni əknyidoda nu n əmi aba. 12 Kwo wulo nlonu n əfye aba. Shikwonyi fye n əwyenyi lo fya ɓwa Zafnu anyaga, fye zhniatna fya mwa n gnakpezhnii fyi n anyaga n ɓa mi Ikilisiya nyi.

13 Ntu n ɓəye ɓo, əza n wo daɓo n nyitala bmaznui, wo zhniaduwa nabai n wo ɓa pmyi əɓo bma n wo da nyi. 14 Ntuge ngye mi zhniaduwa n nyitala bmaznui, əmi zafnu nu zhniaduwa, ama əmi bwugba ta zhni ɓəho lo m. 15 Ntulonu, knyiɓei nu n mi ɓa zhni a? Mi ɓa zhniaduwa n əmi zafnui, ama mi ɓa je aduwazhni n əmi gənyikpei ce; mi ɓa kwoanyi n əmi zafnui, ama mi ɓa je anyi kwo n mi gənyikpei. 16 Ntolonu m, əsa n ho ci Shekwoyi dna n Zafnu, kwo ɓa yezhni n wunanu, əzado n wo too kpe əɓəye n a da m, wa gna "Aamyi" ga əho amisa to ɓai kpe əɓo ye lo n ho da nyi ma a? 17 Kwo shikwonyi ho kwu amisa ń kwnuce, ama zahozahoyi to ɓwa myignyi m.

18 Mi sa Shekwoyi ami lo nge mi daɓo lo n anyitala bmaznui n du əfye vnyanya. 19 Ama dna n ikilisiya, mi ɓa gnaye ma da aɓədagbma ngwnu-atnu awyega nya, nabai ma wu azaje ənya, a fa aɓədagbma adugwu-awo n nyitalai.

20 Əmi azaje azanugbai n anyikwozai, fye kwu fa ɓənubwozhni ɓo ngye aɓyi. Ntu ɓənukwoizhni, fye kwu zhni aɓyipwutu, ama fyi n əfye aɓənubwozhni fye kwu zhni aza dnagbmai. 21 Dna n Owa a cei kafyilo:

"N anyitala adoi

jesnu n aknyidoda agbei nu

n mi ɓa daɓo ga aza ye,

ama dudulonu ɓa taa kna mi tnubwa m,"

Dagayi nu da lonu.

22 Ntulonu, anyitala zhni aznù nu, toge ntu n avyiyi ɓo m, ama n atnavyiyi ɓo; sheɓəgwogna, n kasnu ce to nyi n atnavyiyi ɓo nu m, ama ntu avyiyi ɓo. 23 Ntulonu ngye Ikilisiya vnyanya kwa yezhi n aba gbmanyi, zahozahoyi woi daɓo n anyitalai, jesnu azaho n ɓa to n awyegai lo m kwo atnavyiyi ho ɓaa loɓe, ɓa taa gna nge aza ye n ɓa nyi, ɓa to ye fyilo n əɓa ací m? 24 Ama ń tnagaiciyagayi ho kwo əɓopmigyeyi ho, wa loɓe əsa n zahozahoyi gnyi woi da sheɓəgwogna, wo ɓa ɓwa bwugba knyiznu leifyi nya jesnu wo ɓaa kwo gwo nge aza vnyanya ɓəda nu lonu, 25 ntuge aɓo n ɓa sofyi n əwo ədu a la ɓa kpmiyazhi pəipəi. Ntulonu wo ɓa myiya shi jesnu wa ga Shekwoyi mwamwa, woi gna, "Ɓəhnihni Shekwoyi dnalo n əfye atasni!"

26 To, yi ɓa gna nge nanu, əmi azaje azanugbai n anyikwozai a? Əsa n fya yezhi n aba gbmanyi, zahozahoyi n fye wo ń anyíi lo, kwo əgbega ɓədagbma, kwo ɓəkpeyawu, nyitala, kwo bmapmyi. Ɓəshishi nu a zhni ɓəhoɓəhoi ntu n Ikilisiya mimi ɓo. 27 Ngye əzaho wa daɓo n nyitala hoi, aza ngwnu-aba, kwo ngwnu-ata; ɓa daɓo, ɓai ce aba ga aje, jesnu ɓəshishi nu əzaho wa ga bmapmyi. 28 N bmapmyiyi too lo m, əza n wo daɓo nyi, wo la cepyi dna n Ikilisiya, wa daɓo ga əwohni jesnu n Shekwoyii.

29 Sheaɓəgwognayi ngwnu-aba kwo ngwnu-ata ɓa daɓo, jesnu azaje ɓa mwi əɓo n a da nyi pəceye. 30 Nlonu n ɓəkpeyawu kwa ɓe da əzaho n wo sasetu nu, ɓədadayi kpmisnuyi wo la fa ɓəda ɓo kpa. 31 Ntuge əfye vnyanya fye ɓa myi fya da sheɓəgwogna fyei ce aba ga aje, nabai n zahozahoyi ɓa ɓwa nyawu ɓədo n agwumyii. 32 Sheaɓəgwognayi zafnu kwo dna n sheaɓəgwognayi akwnu nu. 33 Ntuge Shekwoyi to zhni Shekwoyi aɓoajegbmiyi nu m, ama bwugbafu nya; ngye shikwonyi dna n Dagayi azayezhi aba vnyanya. 34 Anyikwoza ɓa kwu fyi pyi n ikilisiya. A to ncei pma ɓa daɓo m, ama ɓəshishi nu ɓa kwu fyi n əɓahni gagai, ngye shi owa ncei da lo. 35 Ngye ɓa ncei pmalo ɓa nya nyaho ɓo, ɓa nya əɓa anu fyi n pwuwa; ntuge kwo zhni əɓo vnyinkwo nya nu nyikwoza wa daɓo dna n Ikilisiya.

36 Kwo Shekwoyi ɓədagbma ɓə pa n əfyei nu a? Kwo əfye nu ɓwa aza zhni n kwo kwu si da fye? 37 Ngye əzaho zhninubwo lo nge wo zhni sheɓəgwognayi nu, kwo wo n Zafnu nyagai lo, kwo bmyalo wa kpe nge ənya n mi ka ga fye nyi, kwo zhni Dagayi ɓəgbetu nu. 38 Ama əza n wo to gye əwo anuwna n ɓəye yi m, əwo n əwohni, a to ɓə gye əɓa anuwna n woi ce m.

39 Ntucenu, əmi azaje azanugbai n anyikwozai, fye kwnufnafna fya da sheɓəgwogna, jesnu fye to kpma ɓədada n anyitalai m. 40 Ama a zhni ɓəhoɓəhoi dna n zokwo jesnu n cefyé.