1 To, nlai nu n fye ɓa gwo yi: n zhni Kirisiti atnutnuyi jesnu ngye aza n a kwu asigyi Shekwoyi nya fyi ɓa n əɓa akwnu. 2 Nsaiye, kwo zhni ɓəshishi nu a gye aza yi n a kwu anyaaknawna aɓo fyi ɓa n akwnu nyi; a gye ɓa zhni agbenui. 3 Mi ta gye əmi anuwna lo, ngye əfye nu ɓa da mi owa, kwo zanyikwoci owa bwokwnu ho m; ɓəhnihni, kwo əmihni, mi ta da əmihni owa lo m. 4 Əmi tukwovnyi to əɓəmai lo m, ama əkwo nu to wu nge mi knyìknyiì lo m. Dagayi nu da mi owa. 5 Ntucenu to da owa dəhodəhoi to əsai si n a cei tu nyi m; la pmi sai əsa n Dagayi ɓə ɓe ncei. Wo ɓə kwnu aɓo ɓe ncei n bwuznagna n ɓa ɓwufyi lo n wyegbma jesnu wo ɓə kpmi azanyikwoci adu aɓəmwi ya wu. Ǹsayii, zahozahoyi ɓə gwo əwo cici n Shekwoyi aba.

6 Nsaiye, əmi azaje azanugbai n anyikwozai, mi kwu aɓo ye da kpe n əmihni tukwo ɓədo n Apwolosii ntu əfye gyiba ɓo nu, nabai n fye ɓa myi fya tu ɓəye tukwo mwi n əyi aba, "To du əgna ya n nyaka ncei tu shi m." Nlonu to hoi mwa əhohni tukwo ntuge ho vyi əzaho lo ń yi, hoi ci əzado wyegba m. 7 Ntuge nyikanu zhni ho lo n wu gbowo n əzadoi a? Knyiyi nu n ho ncei lo, n ho to ɓə gwogwo nu ma a? Njesnu ngye ho ɓə gwogwo nu, knyiyi nu zhni hoi gyigbe ngye a to ɓə ga ho gaga nu ma a?

8 Fye n anyai pmasnu lo vnyanya n fye ye! Fye kwu pma anyaɓwayi zezè! Fye la ya əbegyi, jesnu dəye ntna əyi! A wo mi lo ngye n kwnusnu, fye ye lá ya əbegyi nu, nabai əyihni ce, n yi ɓa myi ya kwnu əbegyi n fyei! 9 Ntuge kwo n mii wulo ngye Shekwoyi wo la əyi, atnutnuloyi, kwnuzhi n kpmaavnu nu, ngye aza yi n a kwu ɓa znuknyi ɓa fyí fyi n awyefnaba. A kwu yi zè anya awyeshi nya n anyì vnyanya, n amaləka aba ɓədo n azanyikwocii. 10 Yi zhni amama nu ntu Kirisiti ɓo, ama fye cecei lo n mwa fyi n Kirisiti! Yi kwu gbakalá, ama fye n akalái fyilo! A kwu fye ga mwamwa, a kwu yi ciwyegba! 11 Nya əsa ye, n yi fyi zhi n kwo nyi, yi laɓa lo n myikwnui ɓədo n nuwna myikwnui, yi n aje asakwnui nu kpe, ai wu yi aɓwa, ntna wyenyigbma, yi laɓa ntna apyi. 12 Yi zhni tnutnu n kalái dnadnai n əyihni aɓwai. Əsa n a kpe yi aknyi, ya tu anabəlika; əsa n a she yi wyena, ya ɓwa bwugba n kwoi. 13 Əsa n a da yi əyewnuya əɓo, ya dnaɓəgbe n ɓəda manaii. Nya nsaiye, yi kwu zè cegye əknyi nya, fnyidakwulu anyì nya.

14 Mi ta ka dəye ga fye nabai ma dna fye vnyinkwo nu m, ama ma kpma fye əɓo, ngye əmi aɓyi ayeyeyi. 15 Kwo ngye fye n azokwowúyii lo adugwu-awo fyi n Kirisiti, fye to n adadai lo n mwa bəgyé m, ntuge dna n Kirisiti Yeisu, mi ɓə la zè əfye dada dna nabagyi manai. 16 Ntucenu, mi gna fye nge fye shna əmi. 17 Ntu n ɓəye ɓo, mi la tnu fye n Timotii, əmi nugwnu n mi ye, əza n wo zhni gbenui nu dna n Dagayi. Wo ɓə pa fye əmi anyìgyi zokwo ɓo dna n Kirisiti Yeisu, n ɓwasnu shi mi wunya lo ceewo n ɓwahoɓwahoi dna n ikilisiya dəhodəhoi.

18 Azaho n fye, ɓa kwu zè atukwomwayi, ngye mi to ɓə shna əfye aba ɓe m. 19 Ama mi ɓe da fye lo ntna əsa gyii n Shekwoyi ayei, jesnu mi ɓə kpe əɓo ye, toge n ɓwasnu shi atukwomwayi ye daɓo n wu nu m, ama kalá pya n ɓa ncei lo. 20 Ntuge Shekwoyi əbemi to zhni ɓəda ɓo nu m, ama ikwo ɓo. 21 Knyidei nu n fye gnaye lo a? Mi ɓe da fye n bwusi tata nyai nu shi, kwo mi ɓe dna n yeyei nu n zafnu tukwownashi nyai a?