1 Nsaiye ntu nyagyi ɓo n a kwu ga ashna: Yi kpəlo nge "Əyi vnyanya n ɓəyekpei lo." Ɓəyekpe əkwo nu ɓe n tukwomwai, ama yeye nu mi aza. 2 Aza yi n ɓa zhninubwo lo ge ɓa kpe nyaho ye lo, ɓa too kpeye shi kwo gwo ɓa kpeye nsnu kpa m. 3 Ama zahozahoyi n wo ye Shekwoyi, Shekwoyi kpe wo əye lo.

4 Ntulonu nsaiye, ntu nyagyi ɓo n a kwu ga ashna nyi: Yi kpəlo nge "əshna to zhni nyahonyahoi nu dna n anyì m, nanyinanyi." Njesnu nge "Shekwoyi ɓwasnu gbmanyi nu, ədo to shnasnu lo m." 5 Ntuge kwo ngye ashekwoyi n a ncei kpeaye nyi; kwo kwoi dna n əshemi nu, kwo kwoi shi n əknyi (ntuge ɓəhnihnii "ashekwoyi" lo n mwa bəgyé, n "adagayii" n mwa bəgyé), 6 dudulonu n əyi aba, Shekwoyi ɓwasnu lo gbmanyi nu, Dada, n anya vnyanya ɓə kwnu n əwo aba nu nyi, jesnu ntu əwo ɓo nu n yi gyianyì! Njesnu Dagayi ɓwasnu lo gbmanyi nu, Yeisu Kirisiti, dna n əwo nu n anya vnyanya ɓə ɓe, jesnu dna n əwo nu n yi gyianyì.

7 Ama zahozahoyi nu to n ɓəyekpe yei lo m. Azaho ye dami lo n ashnai nge əsa n ɓa gyi əshna nyagyi ncei, ɓa zhninubwo nge a la kwo ga ashna nu, jesnu shikwonyi əɓa tukwovnyi gbakála lo nyi, kwo la zè tnagyii. 8 Ama nyagyi ta ɓe n yii vyivyiwyi n Shekwoyi m; yi too wnuwnuiya lo n duwyi n yi to gyi m, yi nyi too gnabmya lo n ya gyi m.

9 Dudulonu, fye zhni pəceye, nabai to fya zhniapma n əfye loloyai kwa zè bwonyice nya ga kalágbayi m. 10 Ntuge əza n əwo tukwovnyii gbakála lo, n wa gye ho, əho n ho ɓəyekpei vnyanya, hoi gyi nyagyi dna əshnanyakwnu, kwo taa dna wo bwugbakala wa gyi ashna nyagyi ce m? 11 Ntulonu zanugbai kwo nyikwoza kalágbayi ye, n Kirisiti ɓə fyí ntu əwo ɓo nyi, wo kwu zhniagbma ntu əho ɓəyekpe ɓo. 12 She ho zhni əho azaje leifyi n zokwo ye, jesnu haa kpe əɓa tukwovnyi kalágbai aci, ho kwu leifyi zhni Kirisiti. 13 Ntucenu, ngye ənya n mi gyi nyi, kwo ɓa zhni əmido kwo əmi mapwi wa myiya dna n leifyi, mi taa je abwu gyi nanyinanyi, nabai to ma zhni ɓa ɓa myiya m.