1 Ngye mi daɓo n azanyikwoci nyitalai kwo n amaləka nyai, ama ntna yeyewu, mi ɓwa kwomkwom wyiɓei nu zhni kwo asnipaala awyiɓei. 2 N mi n nyaga sheɓəgwogna nyai lo, jesnu mii myi n asigyi vnyanya yekpé n ɓəyekpei vnyanya, jesnu ń mi n gaiciyaganunui lo n kwo ɓa myi kwa ce ape tala, ama ntna yeye, mi to zhni nyaho nu m. 3 N ma kwu əmi nyaɓwa vnyanya ga asnayi jesnu maa əmi nayi ga nge a kpe kwo əná nabai ma gyigbe, ama ntna yeyewu, mi to n gyiba hoi lo m.

4 Yeye zhni bwugbaɓwa nu, yeye zhni abmyazhni nu. Kwo to n bmyibmyii m, kwo ta gyigbe m, kwo to n tukwomwai m. 5 Kwo ta ci azaje wyegba m, kwo ta zna əkwohni əɓo shni m, kwo ta pye n minagyi gyii m, kwo ta shi əɓo fyi n əmì m. 6 Yeye ta dagbma dna n nukwoi zhi m, ama kwo ɓwa agbmada n kwnusnu n gaiciyanunui nu. 7 Kwo n aɓwaknai ciici, kwo kwnukpema ciici, kwo n awyetui ciici, kwo n bwugbaɓwai ciici.

8 Yeye ta gbakalá m. Ama aba n sheaɓəgwognada nyi, ɓa ɓə kwu ɓwuwye; aba n anyitala lo, ɓa ɓə kwu cepyi; aba n ɓəyekpe nyi, kwo ɓə la duya. 9 Ntuge yi n yekpei lo kpe n əsheeshe nu, jesnu yi da sheɓəgwogna kpe n əsheeshe nu, 10 ama she əɓo nunui ɓei ɓe, əɓo əsheeshe nya ɓə la ɓwuwye. 11 Əsa n mi ɓə zhni əɓyi nyi, mi ɓə zhni mii daɓo ngye əɓyi nu, mii zhni əɓonubwo ngye əɓyi, mii shi aɓo awye ngye əɓyi. She mi ɓə la gbmi əza, ma kwu aɓyi aɓo zhnizhni ya. 12 Ntuge nsaiye, yi ɓwa əyi dogbe wyegye lo ngye dna n maganyi nu; ama nsayii, yi ɓə gye aje n awyei knyi aje pəipəi. Nsaiye mi ɓwa ɓəyekpe lo n əsheeshe nu; nlonu, mi ɓə kpeye n nunui, kwo ngye shi a kpe əmihni əye lo n nunui nyi.

13 Jesnu nsaiye anya ngwnu-ata ye zhi lo: gaiciyaganunui, awyetu n yeyewui. Ama dudui vnyanya n ɓa, yeyewu nu.