1 Ngye aɓənakpeaje n əzahoi dnadolo n əwodoi, kwo gnabmya lo a lo n kwoi ntna shekwoyi yekpei awadayi aba nu, a da ho owa, a fa n Shekwoyi aza abye? 2 Kwo fye ta kpəlo nge Shekwoyi aza nu ɓə da anyì owa m? Ngye əfye nu ɓəə da anyì owa, fye to kwnuce lo fya da aɓo aɓyiiɓyiyii owa m? 3 Fye ta kpəlo nge əyi nu ɓei da amaləka owa m? A ɓa papaapa a da aɓo anyì ye nya? 4 Ntucenu, ngye aɓənakpeaje n fyei fyilo ntu n aɓo ye pya ɓo, fye ɓa zna owaznuya shni n aza yi aba nu, n ikilisiya ta ye lo n əɓa anyìgyi nyi m? 5 Mi da dəye nabai kwa dna fye vnyinkwo nu. Kwo ɓa yezhni a gna ge wyemwayi to dnalo n əfye atasni n kwnuce wa da agaiciyagayi aɓənakpeaje owa m? 6 Ama n əkwoɓwi, əyido wa lá əwodo lo owa bwokwnu ncei; ai zhni dəye zhi n atnavyiyi awye!

7 N kwo ɓwa shnisnusnu lo nge fye n aɓədai fyilo n owada bwokwnu najei, kwo wu nu nge fye kwu fyehni lu əknyiznu vnyanya kpeekpe. Kwo ɓa zè n wunanu to ha fa nge a bwi ho ma? Knyiyi nu zhni ho nyi taa ye nge a gyi ho fyi ma a? 8 N dəye ɓwi, əfye əfyehni fye gyiaje fyilo, fyei bwi əfye azaje azanugbai n anyikwozai. 9 Kwo fye ta kpəlo nge aɓənukwoizhniyi to ɓə lofyi n Shekwoyi əbemi m? Fye to dna əfyehni kwoce m: kwo asisiɓozhniyi, kwo ashnagbayi, kwo anagbáizhniyi, kwo azanugbai n ɓa wnagye n əɓa azanugbai ajei, 10 kwo avyì, kwo awyeda, kwo anyasniyi, kwo aza əyewnuyayi, kwo azagyifyiyi, ɓa to ɓə ɓwa əgwú n Shekwoyi əbemi m. 11 Azaho n fye ɓə wu nlonu nu. Ama a ɓə la fye zhnaya, a kwu fye zè agyigyiyi, a ɓə la fye kpmaɓəgyiya dna n Dagayi Yeisu Kirisiti əye n Zafnu əyi Shekwoyi nyai.

12 Fye gna, "Mi ɓa myi ma zhni ɓəhoɓəhoi" ama nyahonyahoi nu to n gyibai m. "Mi ɓa myi ma zhni ɓəhoɓəhoi" ama mi taa ye nyaho kwaa zè əmi Dagayi m. 13 Fye gna, "A zhni nyagyi ntu nubwo ɓo nu, jesnu nubwo ntu nyagyi ɓo," ama Shekwoyi ɓə zhni əɓa ngwnu-aba yi agbma. Nayi, n əkwohni, a to ɓə zhni kwo ntu asisiɓozhni ɓo nu m, ama ntu Dagayi ɓo nu, Dagayi ce ntu nayi ɓo. 14 N əwo kalái Shekwoyi ɓə la Dagayi lakala n əfyi, kwo əyi wo ɓə kwu yi kala ce. 15 Fye ta kpəlo nge əfye anayi zhni Kirisiti aga nu n əwohni tukwo m? Kwo ɓá bmya ma kwu Yeisu aga ma ye ɓa ɓədo n kaluwai? Nanyinanyi! 16 Fye ta kpəlo nge əza n wa ye əwohni ɓədo n kaluwai wo la zhni gbmanyi nu n woi n nayii m? Ntuge a cei da lo, "Əɓa ngwnu-aba ɓa ɓə kwu zè nayi gbmanyi." 17 Ama əza n wa ye əwohni ɓədo n Dagayii, wo la zè gbmanyi n woi dna n Zafnu.

18 Fye bwi asisiɓozhni əsi. Aleifyi aje vnyanya n zanyikwoci zhni nyi, ɓa to fyi n nayi nu m, wo zhni kwo n gbmigbmiiya n nayi nu, ama əza n wa zhni abwi asisiɓozhni nya, ɓa bwi əɓahni nayi nu. 19 Fye ta kpəlo nge əfye anayi zhni Zafnu gyigyii-pwuwa nu n wo dna n əfye nyi m, əza n fye ɓə gwo n Shekwoyi nyi m? Fye to ye zhni əfyehni anyanu m; 20 a ɓə si fye n kwoná nu. Ntucenu fye ga Shekwoyi mwamwa n əfye anayii.