1 Mi daɓo ntu nyagayezhi ɓo nu ga Dagayi aza: Fye zhni əɓo n mi ɓə gna Agalatiyi aikilisiya nge ɓa zhni nyi. 2 Dna n nyipyei kpmisnuyi, laadi dəhodəhoi nya, zahozahoyi n fye wo la gyiwye ho kpeshì kwa wu ngye she əza nyaɓwa loɓe nsnu, wo la kwo wnaknashi, nabai əsa n mi ɓə ɓe ń a to ɓə je anyagayezhi m. 3 Nlonu, əsa n mi ɓə si ncei, mi ɓə ga aza yi n fye la tnu nyi, paka n a ɓə kpe ɓa əye, jesnu mii tnu n ɓai n Urishelima n əfye anyagai. 4 Ndei ma gye nge kwo ɓə wu n bmya mii lo ɓo ce, ɓa ɓə da mi apye.

5 She mi ɓə kwu zna laɓa n Makidoninya, mi ɓə ɓe da fye ntuge mi ɓə duya n Makidoninya nu. 6 Kpesnu mi ɓə la kwnudna n fyei əsa fyewyi, kwo mii zhni vnyinyikwo dna n əfye aba nu, nabai n fye ɓə bma mi zhni n əmi əzna, abahobahoi n mi lo. 7 Ntuge mi to ncei pmalo ma gye fye əwye nsaiye, mii ɓwa fye gnaɓyi mii znuduya nu m; mi n awyetui lo mii ɓwa əsa n fyei n Dagayi wa ye. 8 Ama mi ɓə lá kpedna n Afyisus nya Pyentikwos awyefna əsa, 9 ntuge abwokwnumi yaakwo la gwuya gnyi ga mi ntu tnutnu abyegyi ɓo, jesnu aza mwa bəgyé lo n ɓa gnyiapaapa n mii.

10 She Timoti ɓə ɓe, fye to ɓə ye nyaho kwoi dna wo ədna, əsa n wo kwnusnu lo n fyei m, ntuge wo gnyi woi zhni Dagayi tnutnu nu, n ɓwasnu ngye she mi zhni nyi. 11 Nlonu, əzaho to ɓə gbmi n əfye, wa ci wo wyegba m. Fye gna wo ami n bwugbafui nabai wa jezeɓe da mi. Mi n əwo awyetui lo n kwnusnu n əyi azajei.

12 Nsaiye ntu əyido Apwolos ɓo: Mi ɓə kwu əɓwa tna wo n kalái dnadnai nge wo ɓe əfye aba ɓədo n azajei. Wo to ɓə ye wa ɓe nsaiye m, ama wo ɓə ɓe woi la əsa ɓwa.

13 Fye kwu zhigwu; fye kwu myizhi n gaiciyaganunui; fye kwu agwumyi; fye kwu akalá fyi. 14 Fye zhni ɓəhoɓəhoi fyi n yeye.

15 Fye kpəlo nge Stefanas pwuwa nu ɓə kpmi abwiye-gwo n Akaiya, jesnu ɓa kwu ɓahni ga ɓai zhni tnutnu ga Dagayi aza. Mi tna fye əɓwa əmi azaje, 16 fye kwu əfyehni ga fyi n aza yi pya akwnu, jesnu n əzahozahoyi akwnu n wo lodna n tnutnu ye jesnu woi zhni kwo tnutnu. 17 A ɓə kwu mi da əsa n Stefanas, Fotunatus n Akaikwusii ɓə si əyi aba, ntuge ɓa ɓə kwu ənya ga n fye ɓə tnu n kwoi nyi. 18 Ntuge ɓa ɓə la əmi zafnu zhishni ɓədo n əfye nyai. Aza yi pya kwnuce lo a ga ɓa mwamwa.

19 Aikilisiya n Asiya əknyi ɓa tnu fye lo n gnaɓyii.

Akwuila n Pirisilai ɓa ɓyi fye əgna lo n bwugbadai dna n Dagayi, ɓədo n ikilisiyai n kwo yezhi n əɓa pwuwa nyi.

20 Əyi azaje n amapwuyii vnyanya n ɓa fyi n ya, ɓa tnu fye lo n gnaɓyiyii. Fye ɓyi aje əgna n ɓwadodna gyigyiyii. 21 Əmi Bwulus nu na ka gnaɓyi ye n əmihni aɓwai.

22 Ngye əza lo n wo ta wu Dagayi yeye lo m, fa əza yi pya waa zè knyituyi! Ɓe, Dagayi!

23 Shebmyashi Dagayi Yeisu nya kwo kwnusnu n fyei.

24 Əmi yeye kwo kwnusnu n fyei vnyanya n fye fyi n Kirisiti Yeisu nyi. Aamyi.