Marcos 5

Yisọs Akọk Awo a-Anieghe Dimọn

1 Yisọs ye mme mbed amọ emaeboiyo ekewuọ edem ibiok ke ñkañ Kerasin*5:1 Usʌk mme ikpañwed ebo, mbon Kadarin; usʌk ete mbon Keekesin. 2 Ke Yisọs amaakewuọ ke ubom, awo a-akenieghe idiọọk sịbidịd amaawuọ ato ke utịd ukañ mme udi ubuuk awo ekebaaha adisoobo ye anye. 3 Awo ami akedʌñ ke itie ubuuk awo, ndin awo ndomokeed ikikanna ibọp anye ke ñkpọnọ item itie keed. 4 Ataa uwak ini, emaebọp anye ubọk ye ukod ke ñkpọnọ item, anye amaasikịp mme ñkpọnọ anyʌñ akpək afịd ukwak ke ukod ye ubọk amọ. Ibaaha awo ndomokeed a-akenieghe adudu adikan mbọp anye. 5 Afịd akonayio ye uweemeayio, ke itie ubuuk awo ami ye ñkanñkʌk abod, awo ami amaasibọọñ ñkpo anyʌñ akama itiad akpək idem amọ.

6 Ke ini anye amaakeda akịt Yisọs ke anyan usʌñ, anye amaafeghe aketọọñọ edọñ ke iso Yisọs. 7 Ndin anye amaasio ñkpo ke afịd adudu amọ, ate "Nsoo ke afo ayem anto miin, Yisọs Ayịn Andikoñ Ñkan Abasi Ibom? Mmuukpeiye fiin ke anyịñ Abasi mbo kuntʌkkọ miin!" 8 Anye aketañ ami sia Yisọs amaakebo anye, "Wuọ kpọñ awo ami, afo idiọọk sịbidịd!"

9 Akem Yisọs amaabịp anye ate, "Afo akere die?"

Anye amaabọọrọ, "Ami ñkere Liyọn, sia ñnyịn imiiwak." 10 Ndin anye amaakpeiye amaana akpeiye Yisọs ate anye akiibịn mmimọ asịññe ke ñkanñkʌk ado.

11 Mme uwak udịm edi ekesʌk edia ñkpọ ke ñkpere etək abod. 12 Mme sịbidịd ado emaekpeiye Yisọs ete, "Inọ ñnyịn ikidʌk idọñọ ke idem mme edi ako." 13 Anye amaanọ ammọ unyịmme, ndin mme ndiọi sịbidịd ado emaewuọñọ ekedọñọ ke mme edi ado. Udịm edi e-ekewakka ñkpọ nte tọsịn iba emaebịmme efeeñe ediatta ke abedeñ ibiok ado enyʌñ ekekpañña edọñọ ke mmọọñ.

14 Mme akpeme edi ado emaefeeñe ekebʌk se ikitịppe enọ mbon abio ado ye ke ñkanñkʌk ado, ndin mme awo emaewuọọñọ ekaa adikise se ikitịppe.