Nditọ Isrel Esịn Ntịme
1 Ke akonayio ado afịd awo ke abio emaebenne uyio ammọ enyʌñ etua akpọsọñ ayịd. 2 Afịd nditọ Isrel emaedukuunọ ebaña Moses ye Erọn, ndin afịd atu awo emaebo ammọ, "Akpaakefọn adieke ñnyịn ikikpaññake ke Iyib! Me ke anaan ami! 3 Ntak A-Abọọñ ibenne ñnyịn adi ke isọñ ami nọ ñnyịn ididuọññọ ke akañkañ-a? Eyaeben ibaan ñnyịn ye nditọ ñnyịn nte mbịme. Nte ikpifọnnọ ñnyịn aditịmme ñkaa Iyib?" 4 Akema ammọ emaebo emọ-emọ, "Yak ñnyịn imek adadusʌñ itịmme inyọñ ika Iyib."
5 Ndin Moses ye Erọn emaeduọ ekʌp iso ke isọñ ke iso afịd atu nditọ Isrel e-ekebohoke do. 6 Yọsua ayịn Nọn ye Kaleb ayịn Yefune, e-ekesịneke ke atu mbon e-ekekaaha uyeb isọñ, emaewak afọñ ammọ 7 enyʌñ ebo afịd atu nditọ Isrel, "Isọñ a-ñnyịn ikisañake iboiyo ikaa ikiyep ado ataa eti isọñ. 8 Adieke Abọọñ anemme esịd ye ñnyịn, anye ayaidat akesịn ke isọñ ado, isọñ a-afiọọrọke ye mmọọñeba ye adanakwọọk, ayaanyʌñ aben inọ ñnyịn. 9 Ukweeñe ñkpọ ado ndufo ikiisịn ntịme ye Abọọñ. Ikiinyʌñ ifeghe mme mbon e-edʌññọ ke isọñ ado, sia ñnyịn iyaisobo ammọ. Ukpeme ammọ amaakpọñ ammọ, ado Abọọñ mmọdo ye ñnyịn. Ikiiyak ndịk ammọ inam ndufo."