1 " ‘Ke akpa usen ke ayọhọ afiọñ itiaba, inịm adisana esob ñko ikiinam utom ndomokeed se esidak enam. Usen ami ado usen a-anaaha ndufo efịt adukpoñ. 2 Nte anemufịk ñkpọ ake Abọọñ akoppo inem, inọ ufọfọb uwa ñyịn ayaaraenañ keed, akukịmedọñ keed ye ñyaara ñyịn edọñ itiaba e-edooho isua keed, afịd ammọ inaaha enie ndo. 3 Yak ayaaraenañ asaña ye uwa ñkpasi a-adooho mbakka ita ke udomoñkpọ efa* ataa eti ndomuyo ewuahake ye adan ọlif; ye akukịmedọñ ado, mbakka iba ke itie duob;* 4 ñko kwa ñyịn edọñ keed ke atu itiaba ado, keed ke mbakka duob.* 5 Dian akpoebod keed nte uwa idiọọkñkpọ* nọ enam ñkpeubọk inọ ndufo. 6 Mbon ami edo se idiana ke mme ufọfọb uwa e-enamma afiọñ ke afiọñ ye usen ke usen ye mme uwa ñkpasi ammọ ye unwọnwọñ uwa kpa naña ekenịm. Ammọ edoñño uwa ndidia e-enọọhọ Abọọñ, nte anemufịk ñkpọ.

7 " ‘Ke ayọhọ usen duob ke ayọhọ afiọñ itiaba inịm adisana esob. Ana ndufo enam utre udia * ikiinyʌñ inam utom. 8 Inọ ufọfọb uwa ñyịn ayaaraenañ keed, akukịmedọñ keed ye ñyaara nditọ edọñ itiaba e-edooho isua keed i-imiinieghe ndo, nte anemufịk uwa a-anemme Abọọñ esịd. 9 Idian ye ayaaraenañ ado, uwa ñkpasi a-adotto, mbakka ita ke itie duob ke udomoñkpọ efa ye ataa eti ndomuyo ewuaha ye adan ọlif, ye akukịmedọñ ado, mbakka iba ke itie duob; 10 ñko kwa keed ke atu ñyịn edọñ itiaba ado ana anie mbakka keed ke itie duob. 11 Ñko akpoebod keed ana adiana nte uwa idiọọkñkpọ, dian ke uwa ñkpeubọk idiọọkñkpọ ye ufọfọb uwa asañake ye uwa ñkpasi amọ, ye mme unwọnwọñ uwa ammọ.

12 " ‘Ke ayọhọ usen duob mme ition ke ayọhọ afiọñ itiaba, inịm adisana esob ñko ikiinam utom ndomokeed se esinam. Idia usọrọ inọ Abọọñ ke usen itiaba. 13 Iben anemufịk uwa ndidia a-adọñọke ufọfọb uwa ñyaaraenañ duob mme ita i-imiisọññọ, akukịmedọñ iba ye ñyịn edọñ duob mme inaañ e-edoññoke isua keed inyʌññọ inie ndo idi ke iso Abọọñ. 14 Kwa ayaaraenañ duob mme ita ado nọ uwa ñkpasi a-ayọhọke itie ita ke mbakka duob ke udomoñkpọ efa ataa eti ndomuyo ewuahake ye adan; kwa akukịmedọñ iba ado, mbakka iba ke itie duob; 15 ñko kwa ñyịn edọñ duob mme inaañ ado, mbakka keed ke itie duob. 16 Idian akpoebod keed nte uwa idiọọkñkpọ, yak adiana ye ufọfọb uwa ye uwa ñkpasi ye adinwọñ uwa amọ.

17 " ‘Ke ayọhọ usen iba, inọ ñyịn ñyaaraenañ duob mme iba, akukịmedọñ iba ye ñyịn akukịmedọñ duob mme inaañ e-edoññoke isua keed ndomokeed, inieghe ndo. 18 Ye mme ñyaaraenañ, mme akukịmedọñ ye ñyịn edọñ, inọ uwa ñkpasi ye unwọnwọñ uwa ammọ akeene ibad naña asido. 19 Idian akpoebod keed nte uwa idiọọkñkpọ, adiana ye ufọfọb uwa ye uwa ñkpasi ye mme unwọnwọñ uwa ammọ.’ "

20 " ‘Ke ayọhọ usen ita inọ ñyaaraenañ duob mme keed, akukịmedọñ iba ye ñyaara ñyịn edọñ duob mme inaañ e-edoññoke isua keedekeed inyʌññọ inie ndo. 21 Ñko ye ñyaaraenañ ado, ye akukịmedọñ ye ñyịn edọñ, inọ uwa ñkpasi ye unwọnwọñ uwa akeene ibad se ekenịm 22 Idian akpoebod keed nte uwa idiọọkñkpọ, nọ adiana ye ufọfọb uwa ye uwa ñkpasi ye unwọnwọñ uwa.

23 " ‘Ke ayọhọ usen inaañ iwa ñyaaraenañ duob, akukịmedọñ iba ye ñyaara ñyịn edọñ duob mme inaañ e-edoññoke isua keedekeed, afịd inaaha enie ndo. 24 Se idiisaña ye ayaaraenañ, akukịmedọñ ye ñyịn akukịmedọñ ado ediido uwa ñkpasi ye unwọnwọñ uwa akeene ibad amọ. 25 Idian akpoebod keed nte uwa idiọọkñkpọ, yak adiana ye ufọfọb uwa ye uwa ñkpasi ye unwọnwọñ uwa amọ.

26 " ‘Ke ayọhọ usen ition, wa ñyaaraenañ usʌkkeed, akukịmedọñ iba ye ñyaara ñyịn edọñ duob mme inaañ e-edoññoke isua keedekeed, afịd inaaha anie ndo. 27 Ye mme ñyaaraenañ ado, mme akukịmedọñ ye ñyịn edọñ, inọ uwa ñkpasi ammọ ye unwọnwọñ uwa akeene ibad se enịm. 28 Idian akpoebod keed nte uwa idiọọkñkpọ, yak adiana ye ufọfọb uwa ye uwa ñkpasi ye ufọfọb uwa amọ.

29 " ‘Ke ayọhọ usen itiokeed iwa ñyaaraenañ itiaita, akukịmedọñ iba ye ñyaara ñyịn edọñ duob mme inaañ e-edoññoke isua keedekeed, inyʌññọ inie ndo. 30 Ye mme ñyaaraenañ ado, mme akukịmedọñ ye ñyịn edọñ, inọ uwa ñkpasi ye unwọnwọñ uwa akeene ibad se ekebiere. 31 Idian akpoebod keed nte uwa idiọọkñkpọ, yak adiana ye ufọfọb uwa ye uwa ñkpasi ye unwọnwọñ uwa amọ.’ "

32 " ‘Ke ayọhọ usen itiaba iwa ñyaaraenañ itiaba, akukịmedọñ iba ye ñyaara ñyịn edọñ duob mme inaañ e-edoññoke isua keedekeed, inyʌññọ inie ndo. 33 Ye mme ñyaaraenañ ado, mme akukịmedọñ ye mme ñyaara ñyịn edọñ, inọ uwa ñkpasi ye unwọnwọñ uwa akeene ibad se ekebiere. 34 Idian akpoebod keed nte uwa idiọọkñkpọ, adiana ye ufọfọb uwa ye uwa ñkpasi ye unwọnwọñ uwa amọ.’ "

35 " ‘Ke ayọhọ usen itiaita, inịm asaña-asaña esob usuana ndin ikiinam utom ndomokeed. 36 Iben uwa ndidia a-adọñọke ufọfọb uwa ayaaraenañ keed, akukịmedọñ keed ye ñyịn akukịmedọñ itiaba e-edooho isua keed ammiinieghe ndo nte anemufịk uwa enọ Abọọñ. 37 Ye ayaaraenañ ado, akukịmedọñ ye mme ñyịn akukịmedọñ, inọ uwa ñkpasi ye unwọnwọñ uwa akeene ibad se ekebiere. 38 Idian akpoebod keed nte uwa idiọọkñkpọ, yak adiana ye ufọfọb uwa ye uwa ñkpasi ye ufọfọb uwa amọ.

39 " ‘Ke ebenne edian ye se ndufo ekekaaña ye enọ ima esịd ndufo, inọ Abọọñ mme ñkpọ ami ke ini usọrọ ndufo amaakem: Adifọb uwa ndufo, adinwọñ uwa ye uwa ewuana.’ "

40 Moses amaadọkkọ nditọ Isrel afịd se Abọọñ aketemme anye.*