1 Abọọñ amaabo Moses ate, 2 *"Nọ nditọ Isrel uyio bo esio awo akeedodo a-anieghe idiọọk udọñọ ke ikpaidem me ñkpọ awuọñọ ke idem me awo i-imiisanake ato ke ntak akpo awo efep ke nnaaekọñ. 3 Sịññe ammọ, ibaan ye ideen ukem-ukem; sio ammọ fep ke nnaaekọñ mbaak edisappa nnaaekọñ ammọ, a-ami ndʌññọ ke atu ammọ." 4 Nditọ Isrel emaenam ntoro; emaesịññe utọ ibon ado ke nnaaekọñ efep. Ammọ emaenam kpa naña Abọọñ aketemme Moses.

5 Abọọñ amaabo Moses ate, 6 "Dọkkọ nditọ Isrel bo: ‘Awodeen me awonwaan ndomokeed akpedue awo mfen ke usʌñ akeedodo, ke ntak ado anye inyʌññọ inam akpanikọ ye Abọọñ, anye a-adue 7 ndin ana ammọ eyaara idiọọkñkpọ a-ammọ ekenamma. Ana ammọ ekpe ayọhọ usiene ke ndudue a-ammọ ekenamma, edian ubaak keed ke itie ition ukem ñkpọ ado enọ awo a-ammọ ekedueghe. 8 Ado akpedo awo e-ekedueghe inieghe ayakka a-akpereke anye idem a-akemeke adibọ isob ke ndudue ado nnọọ anye, isob ado anie Abọọñ, ndin ana ekappa enọ aku, edian ye akukịmedọñ, nọ edat enam ñkpeubọk enọ anam ukwañ. 9 Afịd mme enọ ndisana ñkpọ a-nditọ Isrel ebenne esọk aku, anie aku ado. 10 Mme ndisana ñkpọ anie mme andinie, ado se ammọ enọ aku adiinie aku ado.’ "

11 Akema Abọọñ amaabo Moses, 12 "Tañ nọ nditọ Isrel nyʌñ dọkkọ ammọ bo: ‘Adieke anwaan awo awuọhọ akpọñ usʌñ inyʌññọ inam akpanikọ ye ebe amọ 13 ndin ato ke ado awodeen mfen anie ewuana ye anye, anam ebe amọ idiọọñọke ndin awo idiọọñọke ke anye adeghe (sia ntiense ibaaha, awo inyʌññọ imʌm anye naña anye anam), 14 ndin ebe amọ akpenie ufịb abaña anyʌñ akere ke anwaan amọ a-akaa awo me a-asịn efịbe ndin ke anye isanake, me ebe anie ufịb anyʌñ akere ntoro akpesʌkado anwaan amọ imiidegheke, 15 ndin ana anye aben anwaan amọ akaa iso aku. Ñko ana anye akama ke iwuod anwaan amọ mbaak keed ke itie duob enọ efa* ndomuyo baali. Inaaha anye aduọk adan ọlif me asịn insensi ke esịd, sia ado enọ ñkpasi e-enọọhọ ke ntak ufịb, enọ aditoiyo, a-anamma nọ ediọọñọ ndudue.

16 " ‘Yak aku aben awonwaan ado adi anyʌñ anam anye ada ke iso Abọọñ. 17 Ndin aku ayaakama atu mbad akoi adisana mmọọñ anyʌñ asịn abu a-atooho tabanakịd ke mmọọñ ado. 18 Ke aku amaakenam anwaan ado ada ke iso Abọọñ, aku ayaakpọk ided awonwaan ado anyʌñ asịn enọ aditoiyo, enọ ñkpasi ufịb ke ubọk amọ, ke ini anye aku ke idem amọ akamake idod mmọọñ a-akamake isuuñọ. 19 Ndin aku ayaanam awonwaan ado adat unwọñọ anyʌñ abo anye ate, "Adieke imiibaaha awodeen mfen ndomokeed a-anieghe ewuana ye afo, afo ñko udueghe idem, ukusappake idem tọọñọ akedọ ebe mfo, yak idod mmọọñ ami a-akamake isuuñọ akuunam fiin idiọọk. 20 Ado akpedo afo amedue idem ke ndọ ami ye ebe mfo, anyʌñ asappa idem ke adinie ewuana ye awodeen mfen i-imiidooho ebe mfo," 21 mi aku ana asịn isuuñọ anọ awonwaan ado, anyʌñ abo, "yak Abọọñ anam nọ afo ado ñkpọ isuuñọ ke atu mbon ndufo ke ini anye anamma yak idịb a-afo akeyommoke abʌññọ anyʌñ anam nọ idịb mfo atịt. 22 Yak mmọọñ ami a-akamake isuuñọ adọñọ idem mfo nọ idịb mfo atịt, idịb mfo anyʌñ abuuñ nditọ."

" ‘Ndin yak awonwaan ado abọọrọ, "Amen. Yak asu ntoro."

23 " ‘Ana aku awet mme isuuñọ ami ke ñwed anyʌñ ayet ammọ asịn ke idod mmọọñ ado. 24 Anye ayaanam awonwaan ado anwọñ idod mmọọñ ado a-akamake isuuñọ, ndin mmọọñ ado a-akamake isuuñọ anyʌññọ akama ndutʌhọ ayaadʌk anye idem. 25 Yak aku abọ ato ubọk awonwaan ado enọ ñkpasi ufịb, afʌñ ke iso Abọọñ ndin aben adi akpokoro uwa. 26 Aku ayaawoppo enọ ñkpasi ekpaubọk keed nte ñkpọ aditoiyo anyʌñ afọp ke akpokoro uwa; ndin ana anam awonwaan ado anwọñ mmọọñ ado. 27 Se idiitịppe ado ami adieke adooho anye amaasappa idem amọ, anyʌñ anie ewuana ye awodeen mfen: Emaenam nọ anye anwọñ mmọọñ a-akamake isuuñọ ye akpọsọñ ndutʌhọ do, anye ayaadọñọ anye idem, idịb amọ ayaayọọk ndin ntʌñidịb amọ ayaabuuñ nditọ, ndin anye adiido ñkpọ isuuñọ. 28 Ado akpedo awonwaan ado ikisappake idem amọ, ado asana, ñkpọ idiinamma anye, ndin anye ayaakan aman nditọ.

29 " ‘Ndin ami ado mbed ufịb ke awonwaan amaadue idem anyʌñ asappa idem amọ ke ini anye asʌkkọ aba ke idak ndọ ye ebe amọ, 30 me idaha ufịb anamma ebe ke ini anye akereke abo ke anwaan amọ a-adue idem. Aku ayaanam awonwaan ado ada ke iso Abọọñ ndin enam mme afịd mbed ami ye anye. 31 Ebe idiinieghe ndudue ndomokeed, ado anwaan ayaabiom utịb idiọọkñkpọ amọ.’ "