1 Abọọñ amaabo Erọn, "Afo, nditọ ideen mfo ye ufọk mfo enie edibiom mme ndudue e-ebañake adisana itie, ndin afo ye nditọ mfo ideen enyʌñ enie edibiom mme ndudue e-ebañake utom mme aku. 2 Dat mme Lifai mbon mfo e-etooho esiin eteete ndufo yak ediana ye ndufo enyʌñ inwam ndufo ke ini a-afo ye nditọ ideen mfo enamma utom ke iso atayad edioomo mbed. 3 Ammọ ana esịne ke idak mfo enyʌñ enam afịd utom ke atayad, ado inaaha ammọ esaña ekpere mme ñkpọ se ibono ke adisana itie me ke akpokoro uwa. Imiidooho ntoro ammọ ye afo eyaekpañña. 4 Ana nte ammọ ediana ye afo ekama utom adise ñkpọ mbaña atayad mbono, afịd utom ke atayad, inaaha nte awo mfen ndomokeed asaña akpere itie a-ndufo ebaaha.

5 "Ubiọñutom ndufo ado adise ñkpọ mbaña atayad ye akpokoro uwa, mbaak iyadesịd mmi adimaana adoro nditọ Isrel ke idem. 6 Ami ke idem mmi mmaasịññe nditọ Lifai ndufo ke atu nditọ Isrel nte enọ unọ fiin, emaekpọnnọ ammọ enịm enọ Abọọñ adinam utom ke atayad mbono. 7 Ado afo kpọd ye nditọ ideen mfo ekeme edinam utom nte aku ke se ibeghe afịd ñkpọ ke akpokoro uwa ye ke esịd ikpeghe. Ami unọ fiin utom ami adido aku nte enọ. Awo mfen ndomokeed a-adiighe akpere adisana itie ana nte ewot anye."

8 Ndin Abọọñ amaabo Erọn, "Ami ke idem mmi mmunọ fiin ewʌhọ nte ase ñkpọ abaña mme enọ edatta ensọk miin; afịd mme ndisana enọ a-nditọ Isrel ennọọhọ miin ami mmuunọ fiin ye nditọ mfo nte udeeme ndufo, nsi-nsi ubakka mfo. 9 Ana afo anie ubaak ataa adisana enọ awo imiifọppọ ke ikañ. Ke afịd mme enọ a-ammọ edatta ensọk miin nte ataa adisana uwa, me ado ake ndidia me ake idiọọkñkpọ* me ake uwa ndudue, mbaak ado unie fiin ye nditọ mfo. 10 Ta anye nte ñkpọ a-adooho ataa adisana; afịd ideen ana eta anye. Ana afo adat anye nte adisana.

11 "Anyem ñko ado ake mfo: Ñkpọ akeedodo e-esioho enịm ke atu mme enọ afịd ufọfʌñ uwa a-atooho nditọ Isrel. Ami mmuunọ fiin ye nditọ mfo ideen ye ibaan nte ewʌhọ nsi-nsi udeeme mfo. Afịd awo ke ufọk mfo e-edooho adisana ekeme edita anye.

12 "Ami mmuunọ fiin afịd mfọọn nti adan ọlif ye afịd nti ufa ukọd ye abakpa a-ammọ enọọhọ Abọọñ nte akpa mbunwịm mfịd a-atooho ke idọk ammọ. 13 Afịd mme akpa mfịd a-atooho isọñ a-ammọ ebenne esọk Abọọñ adiido ake mfo. Afịd awo ke ufọk mfo e-edooho adisana ekeme adita anye.

14 "Afịd ñkpọ ke Isrel e-esioho enịm enọ Abọọñ unie fiin. 15 Akpa enọ a-atooho mfịdidịb, ye ke adooho awo me unam, e-enọọhọ Abọọñ ado ake mfo. Ado ana afo afakka afịd akpan a-adooho awo ye afịd akpa ndedeghe unam a-adooho ayaara. 16 Ke ini ammọ esọññọ eyọhọ afiọñ keed, ana afo afak ammọ ke ekọmudua ufak a-adooho udomo silfa sekel ition,* asañake akekem ye udomo adisana itie, a-adomoke kera edịb.

17 "Ado inaaha afo afakka akpa mfịdidịb umanenañ, edọñ me ebod; ammọ edoñño ndisana. Siime iyiib ammọ ke akpokoro uwa nyʌñ fọp akpọñ ammọ nte uwa ndidia, inemufịk a-anemme Abọọñ esịd. 18 Unam ammọ adiido ake ndufo, kpa naña ikọñesịd ufọfʌñ uwa ye ifʌkkọ nnasia edooho ake mfo. 19 Ndin se adodo a-adooho adisana enọ a-nditọ Isrel ebenne edinọ Abọọñ ami mmuunọ fiin ye nditọ mfo ideen ye ibaan nte nsi-nsi udeeme mfo. Anye ado nsi-nsi edioomo inʌñ ke iso Abọọñ unọ fiin ye nditọ mfo."

20 Abọọñ amaabo Erọn, "Afo uduunieghe udeeme ke isọñ ammọ, afo uduunyʌññọ unie udeeme ke atu ammọ; ami ndo udeeme mfo ye inie mfo ke atu nditọ Isrel.

21 "Ami mmenọ mme Lifai afịd mbaak keed ke itie duob ke Isrel nte inie ammọ ke utom a-ammọ enamma ke atayad mbono. 22 Tọọñọ ke ami inaaha nditọ Isrel esaña ekpere atayad mbono, imiidooho ammọ eyaebiom se idiitịppe ke idiọọkñkpọ ammọ ndin eyaekpañña. 23 Ado mme Lifai ediinam utom ke atayad mbono enyʌñ edo mbon usio isob ke ndudue a-ammọ enamma ke atayad. Anye ami ado nsi-nsi ewʌhọ anọ mme emana e-ediighe ke iso. Ammọ idiibọọhọ inie ke atu nditọ Isrel. 24 Ado, ami mmenọ nditọ Lifai mbaak keed ke itie duob nte inie ke se nditọ Isrel eben edinọ Abọọñ nte enọ. Ami ado ntak a-ami ñketañña mbaña ammọ mbo: ‘Ammọ idiinieghe udeeme ke atu nditọ Isrel.’ "

25 Abọọñ amaabo Moses, 26 "Tañ ikọ nọ mme Lifai nyʌñ bo ammọ: ‘ke ini ndufo ebọọhọ nditọ Isrel mbaak keed ke itie duob ake ami inọọhọ ndufo nte inie, ana ndufo eben mbaak keed ke itie duob ñko edi nte enọ Abọọñ. 27 Eyaebat enọ ndufo inọ ndufo nte mfịdinwañ a-atooho afe ubeek abakpa me nte mmịn a-atooho afe unyịmme ukọd. 28 Ke ntoro ndufo eyaenyʌñ enọ Abọọñ enọ eto afịd mme mbaak keed ke itie duob a-ndufo ebọọhọ eto nditọ Isrel. Ke mme mbaak keed ke itie duob ami ana ndufo enọ Erọn nte aku ubaak a-anieghe Abọọñ 29 Ana ndufo enọ nte ubaak ake Abọọñ se ido ataa eti ye andisana ñkan ke afịd ñkpọ i-inọọhọ ndufo.’

30 "Dọkkọ mme Lifai bo: ‘Ke ini ndufo enọọhọ ataa eti ubaak, eyaebat inọ ndufo nte ñkpọ a-atooho afe ubeek abakpa me afe unyịmme ukọd. 31 Ndufo ye afịd ufọk ndufo emekeme edidia se isʌhọ ke itie akeedodo, sia anye ado utịb utom a-ndufo enamma ke atayad mbono. 32 Ke adinọ ataa eti ubaak awo idiikịtte ndudue inọ ndufo ke ñkpọ ami; ndin ndufo idiisappake ndisana enọ nditọ Isrel, ndufo idiinyʌññọ ikpa.’ "