1 Ke akpa afiọñ, afịd atu nditọ Isrel emaediwuọ Akpautatan Sịn, ndin ammọ ekedʌñ ke Kades. Do ke Miriam akekpa enyʌñ ebuuk anye.

2 Ke ini ado mmọọñ ikibaaha inọ atu awo, ndin mme awo emaesoobo idem adinam ikọ ye Moses ye Erọn. 3 Ammọ emaetọhọ ye Moses enyʌñ ebo, "Akpekapado ñnyịn imaikpañña ke ini nditọeka ñnyịn ekekpaññake ke iso Abọọñ! 4 Ntak a-afo akedatta ikọd Abọọñ adi anaan ami, nọ ñnyịn ye ufene ñnyịn idiikpañña mi-e? 5 Ntak a-afo akisịññeke ñnyịn ke isọñ Iyib adọọk adi ke idiọọk itie ami-e? Abakpa me fik ibaaha, inwañ fain me ñkpasi pomekrened ñko inyʌññọ iba. Ñko mmọọñ se enwọñ ibaaha!"

6 Moses ye Erọn emaewuọ ke esob ekaa ke anyenusʌñ atayad mbono, enyʌñ eduọ ekʌp iso ke isọñ, ndin ubọọñ Abọọñ amaabiọññọ anọ ammọ. 7 Abọọñ amaabo Moses, 8 "Ben esañ ado, ndin afo ye ayịneka mfo Erọn ikoot esob ibon itie keed. Tañ ikọ nọ itiad ado ke iso ammọ ndin anye ayaanyʌñ asio mmọọñ. Afo ayaasio mmọọñ ke itiad anọ atu awo nọ ammọ ye mme ufene ammọ enwọñ."

9 Ndin Moses amaaben esañ ke iso Abọọñ, kpa naña anye akenyʌñ atemme anye. 10 Anye ye Erọn emaekoot mme awo ebon ke esob itie keed ke iso itiad ndin Moses amaabo ammọ, "Ikpañ utọñ, ndufo mbon ntịme, nte ana ñnyịn isio mmọọñ ke itiad ami inọ ndufo?" 11 Ndin Moses amaadịppe ubọk ammọ amia itiad akañ iba ke esañ amọ. Mmọọñ amaasakka awuọ, ndin atu awo ye mme ufene ammọ emaenwọñ.

12 Ado Abọọñ amaabo Moses ye Erọn, "Sia ndufo imiikinnịmme miin ke akpanikọ inyʌññọ iñkpono miin nte adisana ke iso nditọ Isrel, ndufo idiidatta atu awo ami idʌk isọñ a-ami nnọọhọ ammọ."

13 Anye ami akedo mmọọñ Meriba,* itie a-nditọ Isrel eketọhọke ye Abọọñ ñko itie e-ekediọọñọke ebo ke anye ado adisana ke atu ammọ.

14 Moses amaadọñ isʌñutom ke Kades anọ adidem Edọm, abo:

"Ami ado se ayịneka mfo Isrel abo: Afo amediọọñọ abaña afịd nsọñọñkpọ a-akediighe ibịne ñnyịn. 15 Mme eteete ñnyịn emaesọiyọ ekaa Iyib, ñnyịn ñko inyʌñ idʌñọ do ke uwak isua. Mbon Iyib emaifʌnnọ ñnyịn ye mme eteete ñnyịn, 16 ado ke ini ñnyịn ikituaha inọọ Abọọñ, anye amaakop ntuaña ñnyịn anyʌñ anọ enyere adisio ñnyịn ke Iyib.

"Idahami ñnyịn iba mi ke Kades, abio a-abaaha ke adaña isọñ mfo. 17 Mbọk yak ñnyịn isaña iboiyo ke abio mfo. Ñnyịn idiiwakkake idʌk inwañ me inwañ fain, me adinwọñ mmọọñ ke ube mmọọñ. Ñnyịn iyaisaña ke Ekamba Akpọusʌñ Adidem, inyʌññọ iwakka nnasia me ufiin tutu ñnyịn iboiyo ke idịd mfo."

18 Ado Edọm amaabọọrọ:

"Ndufo idiisañake iboiyo mi; adieke edomoke, ñnyịn iyaiwuọ ida inwana ye ndufo ye akañkañ."

19 Nditọ Isrel emaenyʌñ ebọọrọ:

"Ñnyịn idiisaña ke akpọusʌñ, ndin adieke ñnyịn me ufene ñnyịn inwọññọ mmọọñ mfo, ñnyịn iyaikpe ekọmudua. Ñnyịn iyem adisaña mboiyo ke ukod kpọd, ñkpọ mfen ibaaha."

20 Ammọ emaetịmme ebọọrọ:

"Ndufo ikemeke adiboiyo."

Ndin Edọm emaewuọñọ uwak-uwak ye akpọsọñ mbon ekọñ. 21 Sia Edọm imiikiyakka ammọ esaña eboiyo ke idʌñ ammọ, Isrel emaetịmme edem ekpọñ ammọ.

22 Afịd atu nditọ Isrel emaewuọñọ ke Kades enyʌñ edi ke Abod Họọ. 23 Ke Abod Họọ, a-akpereke adaña Edọm, Abọọñ amaabo Moses ye Erọn, 24 "Eyaeben Erọn ekenịm ye mbon amọ. Anye idiidʌkkọ isọñ a-ami ñkenọọhọ nditọ Isrel, sia ndufo awo iba emaesọñ iwuod ke ewʌhọ mmi ke mme mmọọñ Meriba. 25 Dat Erọn ye ayịn amọ Eliasa nyʌñ ben ammọ dọọk kaa Abod Họọ. 26 Sịññe Erọn mme nsiine amọ nyʌñ sịn Eliasa ayịn amọ, sia eyaeben Erọn ekenịm ye mbon ammọ; anye adiikpa do."

27 Moses amaanam se Abọọñ aketemme: Ammọ emaewuọ edọọk Abod Họọ ke anyen afịd atu awo. 28 Moses amaasịññe afọñ Erọn anyʌñ aben asịn ayịn amọ Eliasa. Ndin Erọn amaakpa do ke anyọñ ekamba abod. Akema Moses ye Eliasa emaeto abod esọiyọ edi, 29 ndin ke ini afịd atu awo ekoppo ke Erọn amaakpa, afịd nditọ Isrel emaefʌhọ anye ke usen edịb mme duob.