1 Abọọñ amaabo Moses ye Erọn ate; 2 "Inam ubadawo ke atu mbon Kohad edooho ubakka Lifai ke mme ubon ye mme ufọk ammọ. 3 Bat afịd ideen tọọñọ ke awo isua edịb mme duob akewuọ isua aba mme duob e-esidinamma utom ke atayad mbono.

4 "Utom mbon Kohad ke atayad mbono ado ami: adise ñkpọ mbaña mme nsana ñkan ñkpọ. 5 Ñko udịm mbon Isrel emaetọọñọ isañ, Erọn ye nditọ ideen amọ ana edʌk eka ekekọññọ afọñ ikpeghe efʌk akebe edioomo mbed. 6 Ndin ammọ enie edidat eti uduud ikpa mfʌk afọñ ikpeghe, enyʌñ ekama adeghe bru anyen afọñ enyʌñ edọñ mme abai ke itie ammọ.

7 "Yak ebịt bru afọñ ke akpokoro Iso Enọ enyʌñ edot mme ñkara usan, ntəño usan, ye mme atu enọ ukọd, nọ uyo a-asinaaha do afịd ini akaiso anaa do. 8 Yak ammọ ebịt ndad-ndad afọñ ke anyọñ ammọ, enyʌñ efʌk ammọ eti uduud ikpa, ndin edọñ mme abai ke mme itie ammọ.

9 "Yak ammọ eben bru afọñ enyʌñ efʌk udod utuenikañ e-ekamake edomo ikañ, ukem ye mme utuenikañ, ñkpọ ukpịkke afọñikañ ye mme anainai, ye afịd mme atu adan ọlif amọ se ekama esịn ke utuenikañ. 10 Ndin yak ammọ efʌk anye ye mme afịd ñkpọ mbanaidem amọ ke ufʌkñkpọ eti uduud ikpa enyʌñ edot anye ke ukpadñkpọ.

11 "Yak ebịt bru afọñ ke akpokoro uwa a-kold enyʌñ efʌk anye ke eti uduud ikpa ndin edọñ mme abai ke itie.

12 "Ana ammọ ekoono afịd ñkpọ se ekama enam utom Abasi ke adisana itie, yak efʌk ammọ ke bru afọñ, enyʌñ efʌk anye ke eti uduud ikpa ndin edot anye ke ukpadñkpọ.

13 "Yak ammọ esio ntọñ akpokoro uwa brọns enyʌñ etat iduod-iduod afọñ efʌk anye. 14 Ndin ana ammọ etañ afịd ñkpọ ufọk a-ammọ ekekamake enam ñkpọ ke akpokoro uwa, mme akoikañ, akuum unam, anyan udọk ye mme usan usiime ñkpọ edot ke anyọñ amọ. Ndin yak ammọ ekama eti uduud ikpa efʌk anye enyʌñ edọñ mme abai ke itie.

15 "Erọn ye nditọ amọ ideen emaekweeñe adifʌk mme adisana ñkpọ mbanaidem ima ye afịd mme ndisana ñkpọ, nọ udịm Isrel eyem adidakka, ini ado ndin ke mbon Kohad ediidibenne mme ñkpọ ado. Ado inaaha ammọ etuuk mme ndisana ñkpọ imiidooho ammọ eyaekpañña. Mbon Kohad ana ekoono mme ñkpọ se ibañña ke atayad mbono.

16 "Aku Eliasa, ayịn Erọn, anie ubiọñutom adise ñkpọ mbaña adan utuenikañ, anemufịk insensi, enọ ñkpasi e-edooho afịd ini ye adan udodubọk. Yak anye ase ñkpọ abaña afịd tabanakịd ye afịd se idọñọ ke esịd, afịd ñkpọ mbanaidem amọ ye afịd mme adisana ñkpọ."

17 Abọọñ amaabo Moses ye Erọn, 18 "Ndufo ikịt ibo ke awo isoboke mme esiin aduuk Kohad isio ke atu mbon Lifai. 19 Nọ ato do ammọ edu uwem inyʌññọ ikpañña ke ammọ emaedʌk ekpere ataa ndisana ñkpọ, enam ami enọ ammọ: Erọn ye nditọ ideen amọ enie edidʌk esịd adisana itie ekenọ mme awo keedekeed iso utom ye se ido mbiomo ammọ. 20 Ado inaaha mbon Kohad edʌk esịd ekese mme ndisana ñkpọ, ñkọm akpedo ke ataa etək ini, imiidooho ntoro ammọ eyaekpañña."

21 Abọọñ amaabo Moses ate, 22 "Nyʌñ nam ubadawo nditọ Kesọn keene mme ufọk ye mme ubon ammọ. 23 Bat afịd ideen eyọhọke isua edịb mme duob tutu asịm isua aba mme duob se isidi idinwam ke utom atayad mbono.

24 "Utom mme aduuk Kesọn ado ami ke adibobiom ye ke mme utom ammọ mfen: 25 Utom ammọ ado adibiom mme afọñ ikpeghe usʌñ tabanakịd, a-adooho atayad mbono, ufʌk ñkpọ amọ ye anye a-adoroke ke anyọñ amọ e-enamma ke eti uduud ikpa, mme afọñ anyenusʌñ atayad mbono, 26 ye mme afọñ ikpeghe akwere e-ekannake tabanakịd ye akpokoro uwa ekʌk, afọñ ikpeghe inuausʌñ akwere, mme udʌk ye afịd mme ñkpọ se ekama enam utom ke atayad. Mbon Kesọn enie adikama mme ñkpọ ami nnam afịd mme ñkpọ se enie adinam. 27 Afịd utom mbon Kesọn, me ado adibiom ñkpọ me adinam ñkpọ, ana asaña ke ndadusʌñ Erọn ye nditọ ideen amọ. Ndufo enie edinọ ammọ ubiọñutom afịd se ammọ enie edibiom. 28 Utom aduuk mbon Kesọn ado ami ke atayad mbono esob. Utom ammọ asaña ke ndadusʌñ aku Itama, ayịn Erọn.

29 "Bat mbon Merari ke ubon ye aduuk ammọ. 30 Bat ideen e-edooho isua edịb mme duob tutu asịm isua aba mme duob, e-esidiighe edinwam ke utom atayad mbono. 31 Ke atu utom a-ammọ enieghe inam ke atayad mbono ado, yak ammọ ebiom mme akpara tabanakịd, mme ntọọñ, abai ye eko ammọ, 32 ukem ye mme abai e-ekannake akwere ekʌk ye mme eko ammọ, mboi atayad, mme udʌk, mme ñkpoduoho amọ mme afịd ñkpọ utom ammọ. Nam awo keedekeed adiọọñọ iso utom amọ ye mbiomo se anye anie adibiom. 33 Utom aduuk Merari naña ammọ edinam utom ke atayad mbono ke ndadusʌñ aku Itama, ayịn Erọn ado ami."

34 Moses, Erọn ye mme adadusʌñ ke abio emaebat mbon Kohad ke mme aduuk ye ubon ammọ.

35 Afịd ideen tọọñọ ke isua edịb mme duob tutu akesịm isua aba mme duob e-ekediighe edinam utom ke atayad mbono, 36 ekebatta ke aduuk ekedo tọsịn iba mme ikie itiaba mme aba mme duob (2,750). 37 Afịd ibad awo ke mme aduuk Kohad se ikinam utom ke atayad mbono akedo ado. Moses ye Erọn ekebat ammọ ekeene uyio Abọọñ ke ndadusʌñ Moses.

38 Ekebat mbon Kesọn ekeene aduuk ye ubon ammọ.

39 Afịd ideen tọọñọ ke isua edịb mme duob tutu akesịm isua aba mme duob e-ekediighe edinwam ke utom atayad mbono, 40 e-ekebatta ekeene mme aduuk ye ubon ammọ ekedo tọsịn iba mme ikie itiokeed mme edịb mme duob (2,630). 41 Ami akedo afịd ibad awo ke mme aduuk Kesọn e-ekenamma utom ke atayad mbono. Moses ye Erọn ekebat ammọ ekeene uyio Abọọñ.

42 Ekebat mbon Merari ekeene mme aduuk ye ubon ammọ.

43 Afịd ideen e-ekedooho isua edịb mme duob tutu asịm isua aba mme duob e-ekediighe edinwam edinam utom ke atayad mbono, 44 e-ekebatta ekeene mme aduuk ammọ ekedo tọsịn ita mme ikie iba (3,200). 45 Afịd ibad awo e-eketooho mme aduuk ubon Merari ekedo ami. Moses ye Erọn ekebat ammọ ekeene uyio Abọọñ akenọọhọ Moses.

46 Ndin Moses ye Erọn ye mme adadusʌñ Isrel emaebat afịd mbon Lifai ekeene mme aduuk ye ubon ammọ. 47 Afịd ideen tọọñọ ke isua edịb mme duob tutu akesịm aba mme duob e-ekediighe edinam utom ñnyʌñ mbiom atayad mbono 48 ekedo tọsịn itiaita mme ikie ition mme anaañ (8,580). 49 Ke uyio A-Abọọñ akenọọhọ Moses, emaenọ awo keedekeed utom enyʌñ edọkkọ se anye anie adibiom.

Ndin emaebat ammọ naña Abọọñ akenọ Moses uyio.