1 Anye ami ado ñwed emana ubon Erọn ye Moses ke ini Abọọñ aketañña ikọ anọ Moses ke Abod Sainai.

2 Mme anyịñ nditọ ideen Erọn ekedo ami: Nadab akedo akpan, ye Abihu, Eliasa ye Itama. 3 Mme anyịñ nditọ ideen Erọn ekedo ado, mme aku e-emaekeyet adan, e-emaekedot ammọ ubọk adinam utom nte mme aku. 4 Ado Nadab ye Abihu emaekekpañña ke iso Abọọñ ke ini ammọ ekekamake ikañ i-imiidotto enam uwa ke Akpautatan Sainai. Ke ntoro, ammọ ikinieghe nditọ, ndin Eliasa ye Itama emaenam utom nte mme aku ke ayio uwem ete ammọ Erọn.

5 Abọọñ amaabo Moses ate, 6 "Ben esiin Lifai di, nyʌñ ben ammọ wọt aku Erọn nọ ammọ enwam anye. 7 Ammọ enie edinam utom nnọọ anye ye afịd esob Isrel ke atayad mbono ke adinam utom ke itieukpono. 8 Ammọ enie adikpeme afịd mme ñkpọ mbanaidem atayad mbono, enyʌñ ekịt ebo ke iminam ubiọñutom nditọ Isrel a-abañake utom ke tabanakịd. 9 Ben mme Lifai yaak nọ Erọn ye nditọ ideen amọ; ammọ edo nditọ Isrel a-anaaha ekappa afịd-afịd enọ Erọn. 10 Sio Erọn ye nditọ amọ ideen nịm nte mme aku; ana ewot awo ndomokeed mfen a-asañake akpere adisana itie."

11 Abọọñ amaabo Moses ate, 12 "Ami mmeben mme Lifai nsio ke atu nditọ Isrel nnọ idem mmi ke iwuod afịd mme akpan a-afịd nditọ ibaan Isrel emanna. Mme Lifai edo ake mmi, 13 sia afịd mme akpan edo ake mmi. Ke ini ami ñkewotto afịd mme akpan ke Iyib, ami mmaasio afịd mme akpan ke Isrel nnịm nnọ idem mmi, me ake awo me ake unam. Ammọ ana edo ake mmi. Ami ndo Abọọñ."

14 Abọọñ amaabo Moses ke Akpautatan Sainai ate; 15 "Bat mbon Lifai ke mme ekpək ye mme ubon ammọ. Bat afịd nditọ ideen e-eyọhọke afiọñ keed me ekanna ado." 16 Ndin Moses amaabat ammọ, naña uyio Abọọñ aketemme anye.

17 Mme anyịñ nditọ ideen Lifai ekedo ami:

Kesọn, Kohad ye Merari.

18 Mme anyịñ ake ubon Kesọn ekedo ami:

Libni mme Simei.

19 Mme ubon mme Kohad ekedo:

Amram, Isaa, Hibrọn mme Usiel.

20 Mbon ami ekedo mme ubon Merari:

Mahli ye Musi.

Mme ubon mme Lifai ekedo ami, akeene ke ekpək mme ete ammọ.

21 Mme ubon mbon Libni ye ubon mbon Simei ekenie Kesọn; ammọ ekedo mme ubon Kesọn.

22 Ibad nditọ ideen e-ekedooho afiọñ keed me akanna ado ekedo tọsịn itiaba mme ikie ition (7,500).

23 Ubon Kesọn akenie adiba ke usobutịn, ke edem akebe edioomo Abasi.

24 Adadusʌñ ke mme ekpək Kesọn akedo Eliasaf, ayịn Lael.

25 Utom ubon Kesọn akedo adikpeme akebe edioomo Abasi ye atayad, mme ufʌkñkpọ amọ, afọñ anyenusʌñ ke nsañandʌk atayad mbono, 26 mme afọñ anyenusʌñ akwere, afọñ anyenusʌñ inuaatob a-akannake tabanakịd ye akpokoro uwa akʌk; ye mme udʌk ye afịd ñkpọ se ibaña naña ekama ammọ.

27 Kohad akesịne ke mme ubon Amram, Isaa, Hibrọn ye Usiel; ammọ ekedoñño mme ubon Kohad.

28 Ibad nditọ ideen se ikisọñ afiọñ keed me akanna ado akedo tọsịn itiaita mme ikie itiokeed (8,600). Ubon Kohad ekenie edise ñkpọ mbaña adisana itie.

29 Akena ubon Kohad eba ke edem usuuk mben tabanakịd.

30 Adadusʌñ ke mme ubon ake mme aduuk Kohad akedo Elisafan, ayịn Usiel.

31 Ubiọñutom ammọ akedo adise ñkpọ mbaña akebe edioomo, akpokoro, ñkpọ udodikañ, mme akpokoro uwa, mme ñkpoduoho adisana itie e-ekamake enam utom Abasi, afọñ anyenusʌñ, mme afịd ñkpọ se isaña ke esịd.

32 Ekamba adadusʌñ mme Lifai akedo Eliasa, ayịn aku Erọn. Ekenịm anye nte iwuod ke atu mbon u-utom ammọ akedooho adise ñkpọ mbaña adisana itie.

33 Merari akenie ubon Mahli ye mbon Musi; ammọ ekedo mbon ubon Merari.

34 Ibad nditọ ideen se ikiyọhọ afiọñ keed me se ikpoon ikan ado akedo tọsịn itiokeed mme ikie iba (6,200).

35 Adadusʌñ ke mme ekpək ke mme ubon Merari akedo Suriel, ayịn Abihel.

Akena ammọ eba ke adoro mbeñ tabanakịd.

36 Ekesio mbon Merari nọ ese ñkpọ ebaña mme ntọọñ, abai, itịm, mme ñkpọ utom, ye afịd ñkpọ se ibaña utom ado, 37 ukem ye mme ntọọñ ñkanñkʌk akwere ye itịm ammọ, mme mboi atayad ye mme udʌk.

38 Akena Moses ye Erọn ye nditọ amọ eba ke mbeñ usakkautịn tabanakịd, ke ukañ u-utịn asakkake, ke iso atayad mbono.

Ammọ ekenie utom adise ñkpọ mbaña adisana itie ke iwuod nditọ Isrel.

Akena ewot awo ndomokeed mfen a-asañake akpere adisana itie.

39 Afịd mme Lifai e-ekebatta akeene uyio Abọọñ akenọọhọ Moses ye Erọn akeene mme ubon ammọ, ñwuọ afịd nditọ ideen e-ekedooho afiọñ keed me akanna ado akedo tọsịn edịb mme iba (22,000).

40 Abọọñ amaabọ Moses ate, "Bat afịd mme akpan ke Isrel e-edooho afiọñ keed me ekponno ekan ado, nyʌñ wet anyịñ ammọ. 41 Ben mbon Lifai nnọ miin ke iwuod afịd mme akpan ke atu nditọ Isrel, ye mme ufene mme Lifai ke iwuod afịd akpa ayaara mme ufene nditọ Isrel. Ami ndo Abọọñ."

42 Ndin Moses amaabat afịd mme akpan nditọ Isrel, naña Abọọñ akenọọ anye uyio. 43 Afịd ibad akpa nditọ ideen e-ekedooho afiọñ keed me akanna ado, e-ekewette anyịñ akedo tọsịn edịb mme iba mme ikie iba mme ata mme duob mme ita (22,273).

44 Ñko Abọọñ amaadọkkọ Moses ate, 45 "Ben mme Lifai ke iwuod afịd mme akpan ke Isrel, ye mme ufene ammọ ke iwuod afịd mme ufene. Mme Lifai ediido ake mmi. Ami ndo Abọọñ. 46 Adiibọ sekel ition ke iwuod awo keedekeed adifakka mme akpan ikie iba mme ata mme duob mme ita (273) nditọ Isrel ewakka ekan ibad mbon Lifai, 47 akeene sekel ake adisana itie, adoppoke nte kera edịb. 48 Nọ Erọn ye nditọ ideen ammọ akʌk edatta efakka nditọ Isrel se ikeene idiana."

49 Ke ntoro Moses amaabọ akʌk ufakka ato mbon ekewakka ekan ibad mbon Lifai ekefakkake. 50 Tọọñọ ke akpa ayịn ke Isrel, anye amaabọ silfa akedoppoke sekel tọsịn keed mme ikie ita mme ata mme ition (1,365),* akeene naña sekel adisana itie ayem. 51 Moses amaanọ Erọn ye nditọ ideen amọ akʌk ufakka ado, naña ikọ Abọọñ aketemme anye.