1 Abọọñ amaabo Moses ate, 2 "Tañ nọ Erọn nyʌñ dọkkọ anye bo, ‘Afo umaudomo mme utuenikañ, kịt bo ke afịd utuenikañ itiaba ado esịn unwana ke mbeñ iso ñkpọ udodikañ.’ "

3 Erọn amaanam ntoro, anye amaadomo mme utuenikañ abon nọ ese mbeñ iso ñkpọ udodikañ, kpa naña Abọọñ aketañ anọ Moses. 4 Naña ekenam ñkpọ udodikañ ado ami: Ekekama kold e-emiahamia, tọọñọ ke idak tutu asịm anyọñ. Ekenam ñkpọ udodikañ ado ukem-ukem usʌñ naña Abọọñ akewọt Moses.

5 Abọọñ amaabo Moses ate: 6 "Sịññe mme Lifai kpọñ afịd nditọ Isrel nyʌñ nam ammọ esana. 7 Naña afo adiinam ammọ esana ado ami: Siime ammọ mmọọñ adinam asana ke idem, ndin nam ammọ ekwat afịd ided ke idem ammọ enyʌñ eyet afọñ ammọ. Ntom ke ammọ ediinam idem ammọ asana. 8 Nam ammọ edat ñyịn ayaaraenañ ye enọ ñkpasi ake ataa eti ndomuyo e-ewuaha ye adan ọlif, ndin ana afo adat ayọhọ ñyịn ayaaraenañ iba se ekama enam uwa idiọọkñkpọ.* 9 Dat mme Lifai di ke iso atayad mbono nyʌñ bok afịd esiin Isrel ke itie keed. 10 Ana afo aben mbon Lifai adi ke iso Abọọñ, ndin yak nditọ Isrel edot ammọ ubọk. 11 Erọn ana aben mme Lifai awọt ke iso Abọọñ nte ufọfʌñ uwa a-atooho nditọ Isrel, nọ ammọ ekan enam utom Abọọñ.

12 "Ndin ana mme Lifai edot ubọk ammọ ke iwuod ñyaaraenañ,eben keed enam uwa idiọọkñkpọ enọ Abọọñ enyʌñ eben anye ako enam ufọfọb uwa, adinam ñkpeubọk nnọọ mme Lifai. 13 Nam mme Lifai eda ke iso Erọn ye nditọ amọ, ndin nyʌñ ben ammọ wọt nte ufọfʌñ uwa nnọ Abọọñ. 14 Ke utọ usʌñ ami ke afo uduubakka mme Lifai usio unịm asaña-asaña ke atu nditọ Isrel mbon ñko. Ndin mme Lifai ediido ake mmi.

15 "Ke afo amaakenam mme Lifai esana anyʌñ aben ammọ awọt nte ufọfʌñ uwa ama, ammọ ana edi edinam utom ammọ ke atayad mbono. 16 Ammọ edo mbon Isrel a-anaaha eyaak ennọ miin afịd-afịd. Ami mmedat ammọ ke iwuod mme akpan, mme akpa nditọ ideen nto afịd ibaan ke Isrel. 17 Afịd akpan ke Isrel, me ake awo me ake unam, annie miin. Ami mmaasio ammọ nnịm nnọ idem mmi ke ini ñkesoboke afịd akpan ke isọñ Iyib. 18 Ndin ami mmedat mme Lifai ke itie mme afịd akpan ke Isrel. 19 Ami mmeyaak mme Lifai nnọ Erọn ye nditọ amọ ideen nte mme enọ ansioho nto atu nditọ Isrel, nọ enam utom ke atayad mbono ke iwuod nditọ Isrel, enyʌñ enam ñkpeubọk enọ ammọ mbaak udọñọ ñkpa adisobo nditọ Isrel ke ini ammọ esañake ekpere adisana itie."

20 Moses, Erọn ye afịd esob Isrel emaenam ye mme Lifai naña Abọọñ aketemme Moses. 21 Mme Lifai emaenam idem ammọ esana enyʌñ eyet mme afọñ ammọ. Ndin Erọn amaaben ammọ anọ Abọọñ nte ufọfʌñ uwa ke iso Abọọñ anyʌñ anam ñkpeubọk anọ ammọ anyʌñ anam ammọ esana. 22 Ado akekweeñe, mme Lifai emaedi ke atayad mbono edinam utom ammọ ke ndadusʌñ Erọn ye nditọ ideen amọ. Ammọ emaenam ye mme Lifai kpa naña Abọọñ akenọọ Moses uyio.

23 Abọọñ amaadọkkọ Moses ate, 24 "Anyem abaña mme Lifai; yak ideen e-edooho isua edịb mme ition me ekanna ado enam utom ke atayad mbono. 25 Ado yak ammọ etre utom emaeyọhọ isua emana aba mme duob. 26 Ammọ ekeme edinwam nditọeka ammọ ke iso utom ammọ ke atayad mbono, ado inaaha ammọ ke idem ammọ enam utom ado. Naña afo adiideeme mme iso utom inọ mme Lifai ado ami."