1 Ke ini Isrel ekesʌkkọ edʌñọ ke abio Sitịm, ideen ammọ emaetọọñọ adinam use ye nditọ ibaan Mọb, 2 e-ekekoodo ammọ yak edi itie unam uwa abasi ammọ. Ideen Isrel ami emaedia ndidia uwa ado enyʌñ etuak iwuod enọ mme abasi ado. 3 Ke ntoro, Isrel emaedian idem ammọ ye Baal ake Pọọ. Ke ntak ado Abọọñ amaayat esịd ye ammọ.

4 Abọọñ amaabo Moses, "Dat afịd mme adadusʌñ ke atu ibon ami, wot ammọ nyʌñ suenne ammọ ke ufọọd uweemeayio iba ke iso Abọọñ, nọ ato do ekan ewọññọ ufiob iyadesịd Abọọñ ekpọñ Isrel."

5 Ke ntoro, Moses amaabo mme abiideikpe ke Isrel ate, "Ana ndufo keedekeed ewot mbon ndufo se imaidian idem utịñe-utịñe ye Baal mbon Pọọ."

6 Ndin awodeen Isrel keed amaaben awonwaan Midian keed adi esob mbon Isrel ke iso Moses ye afịd eboho nditọ Isrel ke ini ammọ esʌkkọ etua ke ntondʌk atayad mbono. 7 Ke ini Finehas ayịn Eliasa, ayịn Erọn, a-akedooho aku, akekịtte ami, anye amaadakka akpọñ itie mbono, akebenne eduad 8 anyʌñ asaña akeene awo Isrel ado adʌk atayad. Anye akewuuk ammọ awo iba eduad ado ato ke idịb awodeen Isrel adiwuọ idịb awonwaan ado. Ndin idiọọk unọmọ akenọmọke nditọ Isrel amaatre; 9 ado mbon se ikikpa ke unọmọ ado amaawuọ tọsịn edịb mme inaañ (24,000) ke ibad.

10 Abọọñ amaabo Moses ate, 11 "Finehas ayịn Eliasa, ayịn Erọn, anye a-adooho aku, a-awọññọ iyadesịd mmi asio akpọñ mbon Isrel. Sia adooho anye amaasịn ifịk ke adinnọ miin ukpono ke ufọọd ammọ kpa naña ami mba. Ami ñkiwotto ammọ ke ifịkesịd mmi. 12 Ke ntoro, dọkkọ anye ke ami mmenam edioomo emem mmi ye anye. 13 Anye ye afịd ubon amọ eyaenie edioomo adido aku ñkpeene, sia anye amaasịn ifịk adinọ Abasi amọ ukpono anyʌñ anam ñkpeubọk anọ nditọ Isrel."

14 Anyịñ awodeen Isrel e-ekewotto ye awonwaan Midian akedo Simri ayịn Salu, adadusʌñ ke ekpək mbon Simiọn. 15 Awonwaan Midian e-ekewotto akekere Kosbi ayịn awonwaan Sọọ, a-akedooho abọọñ mbon Midian.

16 Abọọñ amaabo Moses ate, 17 "Idat mbon Midian nte mme asua inyʌñ iwot ammọ. 18 Ammọ ekidat ndufo nte mme asua ke ini ammọ ekibiañake ndufo ke ini ñkpọ Pio a-akebañake ayịneka awonwaan ammọ Kosbi, ayịn awonwaan adadusʌñ ke ekpək mbon Midian, awonwaan e-ekewotto idaha unọmọ ado akediighe ato ke mfịna ado."