1 Mme nditọ Rubịn ye nditọ Kad e-ekenieghe ataa uwak udịmenañ ye udịmedọñ, emaekịt ke isọñ Yasa ye Kilied emaefọn se ebọọk ufene. 2 Ke ntoro, mbon Kad ye mbon Rubịn emaedibịne Moses ye Eliasa aku ye mme adadusʌñ ke mme abio edibo, 3 "Atarọd, Dibon, Yasa, Nimra, Hesbọn, Eliele Sebam Nebo ye Bọọn, 4 kpa isọñ A-Abọọñ akesuuhọke ke iso nditọ Isrel, adot se ebọọk ufene, ndin nditọufọk mfo enie ufene." 5 Ammọ emaenyʌñ ebo, "Adieke ñnyịn ikịtte mfọn ke iso mfo, yak eyaak isọñ ami enọ nditọufọk mfo nte inie. Kuunam ñnyịn ikaaña Yọdan."

6 Moses amaabo nditọ Kad ye nditọ Rubịn, "Nte nditọ Isrel mbon ako eyaekaa ekọñ ke ini ndufo etieghe mmi? 7 Nsoo ido ntak yak ndufo eyem edibiat esịd nditọ Isrel mbaña ammọ adiboiyo ndʌk isọñ Abọọñ akenọọhọ ammọ? 8 Se mme ete ndufo ekenam ado ami ke ini a-ami ñkesioho ammọ ke Kades Banie ndọñ mbo yak ekese ñkpọ ebaña isọñ. 9 Ke ammọ emaekedọọk ekesịm ke abedeñ Eskol enyʌñ eda ese isọñ ado, ammọ etịmede nditọ Isrel esịd adidʌk isọñ A-Abọọñ akenọọhọ ammọ. 10 Ndin esịd Abọọñ amaayat usen ado ndin anye amaanwọñọ enwọñọ: 11 ‘Sia ammọ iñkeeneke miin ke afịd esịd, ibaaha awo ammọ ndomokeed a-akeyọhọke isua edịb me akanna ado idaha ammọ ekewuọhọ ke Iyib se idiikịt isọñ a-ami ñkenwọñọke nnọ Ebraham, Aisik ye Yekọb. 12 Awo ndomokeed ke imiibọhọke Kaleb ayịn Yefune awo Kenis ye Yọsua ayịn Nọn, sia ammọ emaekeene Abọọñ ke afịd esịd.’ 13 Esịd amaanekke ayat Abọọñ abaña nditọ Isrel, anye amaanyʌñ anam ammọ eyooñ ke anaan ke isua aba, tutu afịd emana mbon e-ekenamma idiọọkñkpọ ke iso amọ ekweeñe."

14 "Ndin se ndufo mi, udịm mme anam idiọọkñkpọ e-edaaha ke itie mme eteete ndufo enyʌñ enam Abọọñ anenekke ayat esịd ye nditọ Isrel. 15 Adieke ndufo ewọññọke ekpọñ edikeene anye, anye ayaamaana akpọñ afịd ibon ami ke anaan, ndin ndufo ediido ntak nsobo mbon ami."

16 Ndin ammọ emaesaña ekpere anye ekebo, "Ñnyịn ikpaima adibọp mme aba mi inọ ufene ñnyịn ye abio mi inọ ibaan ye nditọ ñnyịn. 17 Ado ñnyịn iyaibọbọ mbọbọ ibeeñe idem ñnyịn inọ ekọñ inyʌñ iboiyo nditọ Isrel iso tutu ñnyịn iben ammọ idisịm itie ammọ. Ado idahami ibaan ye nditọ ñnyịn eyaedʌñ ke abio se inie ndibene nọ anie ukpeme ke ntak mbon se idʌñọ ke isọñ ami. 18 Ñnyịn idiitịmmeke inyọñ ufọk ñnyịn tutu nditọ Isrel keedekeed ebọ udeemeñkpọ ammọ. 19 Ñnyịn idiibọọhọ udeeme ñkpọ ndomokeed ye ammọ ke edem Yọdan ñkañ uko, sia udeemeñkpọ ñnyịn adi ibịne ñnyịn ke edem usakkautịn Yọdan."

20 Ndin Moses amaabo ammọ, "Adieke ndufo ediinam ntom, adieke ndufo ebanake idem ke iso Abọọñ enọọ ekọñ 21 ñko adieke afịd ndufo e-ebọbọke mbọbọekọñ ekaañake Yọdan ke iso Abọọñ tutu anye aben mme asua amọ asio ke iso amọ, 22 ndin ke ini emaedat isọñ inọ Abọọñ, ndufo emekeme itịmme ñnyọñ enyʌñ ebọkkọ ke ubiọñutom ndufo ke iso Abọọñ ye ke Isrel. Ndin isọñ ami ayaado udeeme ndufo ke iso Abọọñ.

23 "Ado adieke ndufo etreke edinam ntom, ndufo eyaenam idiọọkñkpọ ke iso Abọọñ; ana ndufo ediọọñọ ke idiọọkñkpọ ndufo ayaiyem ndufo akịt. 24 Ibọọp mme abio inọ ibaan ye nditọ ndufo, ye mme aba inọ udịmedọñ ndufo, ado inam se ndufo enwọñọ."

25 Mme nditọ Kad ye nditọ Rubịn emaebo Moses, "Ñnyịn nditọufọk mfo iyainam kpa naña abọọñ ñnyịn atañ. 26 Nditọ ye ibaan ñnyịn, edọñ ñnyịn ye ufene eyaesʌhọ mi ke abio Kilied. 27 Ado nditọufọk mfo, afịd awo se ibọbọ mbọbọekọñ ibet ekọñ, eyaekaaña ekaa anwan ke iso Abọọñ, kpa naña abọọñ ñnyịn atañ."

28 Ndin Moses amaanọ uyio abaña ammọ anọ Eliasa aku ye Yọsua ayịn Nọn ye mme adaiwuod ekpək ubon Isrel. 29 Moses amaabo ammọ, "Adieke nditọ Kad ye nditọ Rubịn, afịd ideen se ikibọbọ mbọbọ ibeeñe idem ekọñ, ekaañake Yọdan ye ndufo ke iso Abọọñ, ndin ke ini edatta isọñ enie ke iso mfo, ana afo anọ ammọ isọñ Kilied nte udeeme ammọ. 30 Ado adieke ammọ idiikamake ñkpọekọñ ikaaña ye ndufo, ana ammọ ebọ udeeme ammọ ye ndufo ke abio Kenan."

31 Mme nditọ Kad ye nditọ Rubịn emaebọọrọ, "Nditọufọk mfo eyaenam se Abọọñ atañ. 32 Ñnyịn iyaikaaña ke iso Abọọñ idʌk Kenan ye mbọbọekọñ, ado inie a-ñnyịn idiibọ adiiba ke edem Yọdan umi."

33 Ndin Moses amaanọ nditọ Kad, nditọ Rubịn ye keed ke mbakka iba esiin Manase ayịn Yosef abioubọọñ Sihọn adidem mbon Amọọ ye abioubọọñ Ọk adidem Basan, afịd isọñ ye mme abio ye ñkanñkʌk ammọ.

34 Nditọ Kad emaebọp Dibon, Atarọd, Arowa, 35 Atrọd Sofan, Yasa, Yokbeha, 36 Bed Nimra ye Bed Haran nte mme abio e-enieghe ndibene, enyʌñ ebọp mme aba enọ ufene ammọ. 37 Ndin nditọ Rubịn emaemaana ebọp Hesbọn Eliele ye Kiriataim, 38 kpa ye Nebo ye Baal Mọọn (emaekpuuño mme anyịñ ami) ye Sibma. Ammọ emaenọ mme abio a-ammọ ekebọppọ mme anyịñ.

39 Ubon Makia ayịn Manase emaekaiya Kilied, emaekan anye enyʌñ ebịn mbon Amọọ e-ekebaaha do esio. 40 Ke ntoro Moses amaayaak Kilied anọ nditọ Makia, ubon Manase, ndin ammọ edʌñọ do. 41 Yai, a-akedooho awo ubon Manase, amaabọ mme itie idʌñ ammọ anyʌñ akoot Hafọd Yai. 42 Ñko Noba amaabọ Kenad ye ñkanñkʌk amọ anyʌñ akoot anye adian anyịñ amọ.