1 Abọọñ amaabo Moses ate, 2 "Tañ ikọ nọ nditọ Isrel bo ammọ ate: ‘Adieke awodeen me awonwaan ayemme adinam asaña-asaña akaaña adinịm idem amọ nnọọ Abọọñ nte Nasariin, 3 ammọ ana ebet ukọd ye mme ndañ ukọd mfen, inaaha ammọ enwọñ fineka e-enamma eto ukọd me ndañ ukọd. Inaaha ammọ enwọñ mmọọñ kreb me edia kreb me nsaad mfịd kreb. 4 Adaña nte ekpọnnọke ammọ enịm ke idak enwọñọ Nasariin, inaaha ammọ edia ñkpọ ndomokeed a-atooho inwañ fain, akpekọm ñkpasi me ikpọk.

5 " ‘Inaaha akadañ akpịkke ided ammọ, ke afịd ini a-ammọ ebaaha ke unwọñọ nte Nasariin. Ana ammọ enịm idem ammọ ke adisana tutu ini adinịm idem ammọ asaña-asaña nnọọ Abọọñ akweeñe; ana ammọ eyaak ided ammọ ada ntoro anyan.

6 " ‘Ke afịd ini a-ammọ enịmme idem ammọ asaña-asaña enọ Abọọñ, awo Nasariin inaaha asaña akpere akpo awo. 7 Akpọkọm ete, me eka, me ayịneka ammọ akpa, yak ammọ ekuusappa idem ke ntak ibon ado, sia idiọọñọ ammọ adinịm idem ammọ asaña-asaña nnọọ Abasi adoro ke iwuod ammọ. 8 Ke afịd ini a-ammọ enịmme idem ammọ enọ Abasi, e-enam ammọ esana enọ Abọọñ.

9 " ‘Adieke awo akpaaha adiyịk-adiyịk ke itie a-awo Nasariin abaaha, ke ntoro asappa ided iwuod ammọ a-adooho idiọọñọ adisio ammọ nnịm nnọọ Abọọñ, ana ammọ ekwat ided ammọ ke ayọhọ usen itiaba, usen adinam ammọ esana. 10 Ndin ke ayọhọ usen itiaita ana ammọ eben ibiom iba me ñyịn abomoñkuku iba esọk aku ke inuausʌñ atayad mbono. 11 Aku ana awa keed nte uwa idiọọkñkpọ* anyʌñ awa ayọhọ iba nte ufọfọb uwa nọ anam ñkpeubọk anọ Nasariin sia ammọ emaedue ke ammọ ediba ke itie akpo awo. Ana ammọ emaana enam ided ammọ asana kpa ke usen ado. 12 Ana ammọ emaana enịm idem ammọ asaña-asaña enọ Abọọñ kpa ke ukem ibad ini ado enyʌñ eben ñyịn edọñ isua keed nte uwa ndudue edi. Awo idiibatta mme usen edem sia ammọ emaesappa idem ke ini ekenịmme idem asaña-asaña enọ Abọọñ.

13 " ‘Mbed Nasariin ado ami ke ini edinịm idem ammọ asaña-asaña amaakweeñe. Ana eben ammọ edi inuausʌñ atayad mbono. 14 Do ke ammọ enie ediben mme enọ ammọ nnọọ Abọọñ: ñyịn akukịmedọñ isua keed, i-imiinieghe ndo nte ufọfọb uwa; ñyịn umanedọñ isua keed i-imiinieghe ndo nte uwa idiọọkñkpọ, ekamba akukịmedọñ i-imiinieghe ndo nte uwa ewuana, 15 edian mme enọ ñkpasi ye mme enọ ukọd, ye ayọhọ akpasa uyo e-enamma eto ataa eti ndomuyo se yiis imiisịnneke, ikpọ eboho uyo ewuaha adan ọlif ke esịd ye ñkeñe eboho uyo e-eyette adan ọlif.

16 " ‘Aku anie adikoono afịd mme ñkpọ ami nnọọ Abọọñ nte uwa idiọọkñkpọ ye ufọfọb uwa. 17 Aku anie adiben akpasa uyo se yiis imiisịneke anyʌñ awa ekamba akukịmedọñ nte uwa ewuana anọ Abọọñ, adian ye mme uwa ñkpasi ye uwa ukọd.

18 " ‘Ndin ke inuausʌñ atayad mbono, mme Nasariin ana ekwat ided ammọ esio nte ñkpọ idiọọñọ a-ammọ edinịm idem nnọọ Abọọñ. Ana ammọ ekoono ided ado esịn ke ikañ asakka ke idak akpokoro uwa ewuana.

19 " ‘Mme Nasariin emaekwat ided a-adooho ñkpọ idiọọñọ unịm idem nnọọ Abọọñ ima, aku ana asịn afara akukịmedọñ emaeketem ke ubọk Nasariin, adian ekamba ye etək uyo e-esioho ke akpasa, enam naña iba awo isịnne yiis. 20 Aku ayaadịppe mme ñkpọ ami ke iso Abọọñ nte ufọfʌñ uwa, ammọ edo ndisana enyʌñ enie aku, adian ye eba edọñ ekefʌññọ ye ifʌkkọ ekenọọhọ. Ke ado amaakweeñe mme Nasariin ekeme edinwọñ ukọd.

21 " ‘Mbed mme Nasariin ado ami, e-enamma enwọñọ enọ Abọọñ akeene adinịm idem asaña-asaña, dian ke ñkpọ akeedodo mfen a-ammọ ekanna adinọ. Ana ammọ esio akaaña a-ammọ ekenamma, akeene mbed Nasariin.’ "

22 Abọọñ amaabo Moses ate, 23 "Dọkkọ Erọn ye nditọ ideen amọ bo, ‘Naña ndufo ediidiọñ nditọ Isrel ado ami. Bo ammọ ate:

24 " ‘ "Yak Abọọñ idiọñ ndufo

anyʌñ ikpeme ndufo;

25 yak Abọọñ anam iso amọ ayamma inọ ndufo

anyʌñ afọn mfọn ye ndufo;

26 yak Abọọñ akanna iso amọ ise ndufo

anyʌñ inọ ndufo emem." ’

27 "Ndin ammọ eyaekoot anyịñ mmi edot nditọ Isrel ke idem, ndin ami ñyaadiọñ ammọ."