Marcos 9

17 Owo kiet ke otu oro ama ọbọrọ ete, "Andikpep, ñkada eyen mi eren ndi emi ndedehe spirit omumde, anam enye ikemeke nditiñ ikọ. 18 Mma mbeñe mme mbet Fo nte ebin enye ndedehe spirit oro esio, edi mmọ ikekemeke."

19 Jisọs ama ọdọhọ mbet Esie ete, "O! Emana unana mbuọtidem, adaña didie ke ndifiak ndu ye mbufo, ndien mbufo enim Mi ke akpanikọ! Adaña didie ke ndinyene ime ye mbufo! Emen ekpri eyen eren oro esọk Mi."

20 Ntre mmọ ema eda eyen oro esọk Jisọs, ndien ke adañaemi enye okokutde Jisọs, ndedehe spirit oro ama atuak eyen oro ke idem ata ọkpọsọñ ọkpọsọñ, ndien enye ama ọduọ ke isọñ amiañare onyuñ ọkọk efot ke inua.

21 Jisọs ama obup ete eyen oro ete, "Ebighi adaña didie tọñọ ñkpọ emi ọkọtọñọ ndinam enye ntem?" Ndien enye ama ọbọrọ ete, "tọñọ ke ini emi enye ekedide ata ekpri eyen. 22 Kpukpru ini ndedehe spirit emi esinam enye ọduọ oduk ikañ mme mmọñ man owot enye. Tua ñnyin mbọm nyuñ nam ñkpọ ndiñwam ñnyin edieke Afo ekemede."

23 Jisọs ama ọdọhọ ete, "Edieke ekemede? Ñkpọ kiet ekededi ekeme nditibe nnọ owo ekededi emi enyenede mbuọtidem."

24 Ete esie idaha oro ama ọbọrọ ete, "Ami mmenyene mbuọtidem, O ñwam mi man ñnyene mbuọtidem emi okponde akan emi."

25 Ke ini Jisọs okokutde nte otu owo ekade iso nditọt, Enye ama asua ọnọ ndedehe spirit oro, onyuñ ọdọhọ ete, "Afo spirit imum ye inan, mmowuk fi nte wọrọ kpọñ eyen emi, ndien kuduk enye idem aba."

26 Ntem ke idiọk spirit oro akaduari ata ọkpọsọñ onyuñ osio enye ọduọk ndien ọwọrọ ọkpọñ enye, ndien eyen oro ana do suñ-ñ inyuñ isioroke uyo, ke enyin kpukpru owo eketie nte enye akpa, kpa nte mmọ eketiñde. 27 Edi Jisọs ama omum enye ke ubọk onyuñ añwam enye ndineñede nda ke ikpat esie mbiba, enye ama eneñede ada.