1 Ñwed emi oto Pọl asañautom Jisọs Kraist, emi Abasi okokotde ete edi mbet, onyuñ adiañarede enye enim ndikwọrọ Eti Mbuk Esie. 2 Eti Mbuk emi Abasi ọkọñwọñọde ke anyan ini emi ekebede oto ke inua mme asiak uduak Esie, ke edisana ñwed Abasi. 3 Eti Mbuk emi abaña Eyen Esie, Ọbọñ ñnyin Jisọs Kraist ke emana obukidem, Enye akamana oto ke ubon Defid, 4 emi ekenamde Enye edi Eyen Abasi oto ke odudu Edisana Spirit, ye ke ediset ke ñkpa Esie, kpa Jisọs Kraist Ọbọñ ñnyin. 5 Oto ke Enye ye ke ntak Enyiñ Esie, ñnyin ima ibọ mfọn ndidi mme mbet Esie ndikot kpukpru owo ke kpukpru idut esuk ibuot enọ Enye oto ke mbuọtidem. 6 Mbufo ñko enyuñ edu ke otu mme mmọ emi ekekotde ete mbufo edidi ikọt Jisọs Kraist, 7 anam ami ñwet ñwed nnọ esọk kpukpru mbufo emi edude ke Rom, mbufo emi Abasi amade, onyuñ okotde ete edi edidi mme ndisana ikọt Esie. Yak Abasi ete ñnyin ye Ọbọñ ñnyin Jisọs Kraist ọnọ mbufo mfọn ye emem.

8 Ke akpa itie, mmọkọm Abasi mi ke Jisọs Kraist mbaña kpukpru mbufo, koro ofuri ererimbot ke ekop ebaña etop mbuọtidem mbufo. 9 Abasi, emi ndade ofuri esit mi nnam ñkpọ nnọ Enye ke ndikwọrọ Eti Mbuk Eyen Esie, edi ntiense mi, nte ami ntide mbufo 10 kpukpru ini emi mbọñde akam. Ami mbeñe nte yak Abasi ke mfọn Esie, ọnọ mi ukeme ndidi ndise mbufo. 11 Koro mmenyene ata udọñ ndikut mbufo, man oto do mbuana mme enọ Spirit ye mbufo, ndinam mbufo esọñ idem. 12 Se ami ntiñde ọwọrọ ete, ami ye mbufo ikpenyene uñwam ini kiet, ami ñnyene uñwam nto mbuọtidem mbufo, mbufo ñko enyuñ enyene uñwam eto mbuọtidem mi.

13 Mbufo enyene nditi emi nditọ ete mi, ete ke mmanduak ndidi ndise mbufo ke ediwak ini, edi ñkpọ ọbiọñọ mi kpukpru ini ndinam ntre. Ami ñyom ndinyene mme mmọ emi ekabarede esit ke otu mbufo ñko, kpa nte ami ñnyenede ke otu mme mmọ emi midighe ubon mme Ju. 14 Ami mmakama kpukpru owo isọn, mbio ntatenyin ye mmọ emi midighe mbio ntatenyin, mme ọfiọk ñwed ye mme mmọ emi mifiọkke ñwed. 15 Ke ntre ami mmokop udọñ ndikwọrọ Eti Mbuk emi ñko nnọ mbufo emi edude ke Rom.

16 Ami ñkopke but mbaña Eti mbuk Kraist, koro enye edide odudu Abasi ndinyaña kpukpru mmọ emi enimde ke akpanikọ, ebem iso enọ mme Ju, enyuñ enọ mme mmọ emi midighe ubon mme Ju. 17 Eti Mbuk emi ayarade usuñ nte Abasi anamde mme owo enen ye Enye, oto ke mbuọtidem, tọñọ ke editọñọ tutu esim utit. Nte ñwed Abasi ọdọhọde ete, "Enye emi enamde enen ye Abasi, edidu uwem oto ke mbuọtidem."

18 Koro iyaresit Abasi ayarade oto ke enyọñ esim kpukpru mme anana ndik Abasi ye oburobut mme owo, emi edade mme oburobut ido mmọ efik akpanikọ. 19 Koro se mme owo ekemede ndifiok mbaña Abasi añwaña mmọ nte ọfọnde, sia Abasi ke idem esie anam añwaña. 20 Tọñọ, nte Abasi okobot ererimbot, nsinsi odudu Esie ye obot Esie nte Abasi, okposuk edi emi owo mikwe ke enyin, esuk ededu do enọ esit owo ndikut nto ke mme ñkpọ emi Enye akanamde. Ntak edi oro mme utọ mmọ oro minyeneke se edade enyaña idem.

21 Mmọ ediọñọ Abasi, edi mmọ esin ndinọ Enye ukpono emi enyenede Enye nte Abasi, mme ndinọ Enye ekọm, edi utu ke oro, ekikere esit mmọ akabade ọwọrọ ata ndisime, ndien esit mmọ emi anade ukpọk ọyọhọ ye ekim. 22 Okposuk edi emi mmọ edọhọde ete mmimọ idi mme ọfiọkñkpọ owo edi mmọ ekabade edi mme ndisime, 23 ndien emen ubọñ Abasi emi midikpaha ke nsinsi ekpuhọ ye mbiet mme ñkpọ emi enamde ke mbiet owo emi edikpade, ye mbiet mme inuen, ye eke mme unam ikọt ye eke mme unam emi enyọnide nyọni.

24 Ke ntak emi mmọ esimede ntem, Abasi amayak mmọ ọnọ mme idiọk udọñ esit mmọ ndika iso ke use ye mme mbiara edu uwem emi asabarede ikpọkidem mmọ. 25 Utu ke mmọ enim ke akpanikọ se mmọ ekediọñọde nte ke edi akpanikọ emi otukde Abasi, mmọ ekabade emek ndinim nsu ke akpanikọ. Ke ntre mmọ etuak ibuot enọ se Abasi akanamde, edi esin ndituak ibuot nnọ mfọnmma Abasi emi okobotde mme ñkpọ emi.

26 Ke ntak emi mme owo enamde ntem, Abasi asana mmọ ayak ọnọ idiọk udọñ. Kpa ye iban mmọ, ekabade eda iferi mmọ esin ke edinam emi midighe nnen nnen. 27 Kpa ntre ñko irenowo inyeneke aba udọñ ndinyene ebuana ye iban, ekabade ekop ufiop ufiop udọñ ye eke mmọ irenowo. Eren owo anam ñkpọ obut ye eke mmọ eren, ndien mmọ ebọ ufen emi ekemde ye idiọk edinam mmọ.

28 Koro mmọ esinde ndikere ke esit mmọ mbaña ifiọk akpanikọ emi abañade Abasi, Abasi asana mmọ ayak ọnọ mbiara udọñ esit mmọ, anam mmọ enam mme ñkpọ emi mmọ mikpanamke. 29 Uwem mmọ ọyọhọ ye nsionsio ukwañido ye idiọk itọñ, ye usua, ye isinenyin, ye uwot owo, ye eñwan, ye nsu ye idiọkesit, ye ibaña edem. 30 Mmọ etiñ idiọk ikọ edian kiet eken, esua Abasi, esọñ enyin, etañ idem, ebure mbure; edi mme nta ke unam idiọkñkpọ; mmọ esọñ ibuot ye ete ye eka mmọ; 31 mmọ inyeneke ifiọk, inyeneke mbuọtidem, inyeneke ima, mme ndikop owo mbọm. 32 Okposuk edi nte mmọ ediọñọde ete ke mbet Abasi ọdọhọ ete, mme mmọ emi edude uwem ke utọ usuñ emi edot ñkpa, mmọ ikaha iso ndinam mme ñkpọ emi ke idem mmọ ikpọñ edi mmọ enyuñ eñwam mme mmọ efen ndinam mme ñkpọ emi ñko.