1 Se ami ntiñde edi akpanikọ, ntiñ koro ami ndi eke Kraist, anam nsuhu nsu. Esit mi emi edisana Spirit akarade ọsọñọ ete ke ami nsuhu nsu. 2 Ami mmenyene akamba mfuhọ, ye ubiak emi midoboke ke esit mi, abaña ikọt mi, ikpọkidem mi, ye iyip mi. 3 Ke ntak mmọ ami ñkpama ndidu ke idak isuñi Abasi, ndien ediañade mi ye Kraist. 4 Mmọ edi mme mmọ emi Abasi ekemekde, Enye ama anam mmọ edi mme nditọ Esie onyuñ abuana ubọñ Esie ye mmọ. Enye ama anam ediomi ye mmọ onyuñ ọnọ mmọ ibet, mmọ enyene ata ntuak ibuot akpanikọ, enyuñ ebọ mme eñwọñọ Abasi. 5 Mmọ eto ke ubon mme akpa ete emi ekekponode Abasi ndien Kraist okoto ke oruk mmọ ke obukidem. Yak Abasi emi akarade kpukpru ñkpọ, ọbọ itoro ke nsinsi. Amen.

6 Edi ami ndọhọke nte ke eñwọñọ Abasi okpu, koro idighe kpukpru nditọ Isrel edi mme mmọ emi Abasi emekde, 7 mme kpukpru se itode ubon Ebraham edi nditọ Abasi. Abasi ama ọdọhọ Ebraham ete, "Eyebat ubon Aisik nte okuo." 8 Emi ọwọrọ ete nditọ emi emanade ke usuñ obukidem, idighe nditọ Abasi, utu ke oro, nditọ emi emanade eto eñwọñọ Abasi, ke eda, nte ata ubon.

9 Koro emi edi ikọ eñwọñọ emi Abasi ọkọñwọñọde ete, "Ami ñyefiak ndi ke ini emi Ami ñkenimde ndien Sera eyenyene eyen eren." 10 Ikureke ke oro. Koro nditọ Ribeka mbiba ekedi ete kiet, kpa ete ñnyin Aisik. 11 Ndien ke ini nditọ iba emi mikemanake kaña, mikonyuñ inamke idiọkñkpọ ndomokiet mme eti, man uduak Abasi nte asañade ekekem ye edimek ọkpọsọñọ ada; 12 idighe ke utom; edi oto enye emi okotde, ema edọhọ Ribeka ete, "Akpan eyenuhọ ọnọ udọ." 13 Nte ñwed Abasi ọdọhọde ete, "Ami ñkama Jekọb, edi Ami ñkasua Isọ."

14 Nso ke ñnyin ididọhọ ndien? Nte Abasi inenke ke edinam Esie? Nsa ñnyin-o! 15 Koro Enye ama ọdọhọ Moses ete, "Ami ñyenyene mbọm nnọ owo emi mmade, ñyenyuñ ntua owo emi mmade mbọm." 16 Mmọdo ñkpọ emi inaha ke se owo oyomde, mme ke se owo anamde, edi oto ke mbọm Abasi ikpọñ.

17 Koro ñwed Abasi ọdọhọ Fero ete, "Ami ñkenim fi edi edidem kpa ke ntak emi, ndida fi ñwut odudu mi, ndinyuñ nnam ofuri ererimbot ediọñọ Enyiñ Mi." 18 Ntre ke Abasi enyene mbọm ye owo emi Enye amade, onyuñ ọsọñ esit ye owo emi enye amade ndisọñ esit. 19 Owo mbufo kiet eyedọhọ mi ete, "Edieke emi edide ntre, Abasi ekeme didie ndikut ndudue ke idem owo? Anie ekeme ndiñwana ye uduak Abasi?"

20 Edi afo edi anie ufan mi, emi ekemede ndiduñọde Abasi? Esio mbat ikemeke ndibup andibot enye ete, "Ntaha emi afo obotde mi ntem-e?" 21 Owo emi obotde esio enyene unen ndinam ye mbat emi enye adade obot esio nte enye amade, ke ndibot utọ esio iba ke ukem ebok mbat kiet oro, obot kiet ọnọ ndikama ke ini akpan ñkpọ, ndien enye eken ọnọ ini ekededi. 22 Emi edi ukem se Abasi akanamde. Enye okoyom ndiwut iyaresit Esie ñnyuñ nnam ediọñọ odudu Esie. Ke ntre Enye ama enyene ata ime ke ediyọ mme mmọ emi ekedide ntak iyaresit Esie, emi akanade nte esobo. 23 Ndien enye okoyom ñko ndiyarade uwak ubọñ Esie, emi Enye akañwañade ọnọ ñnyin emi idide mme ñkpọ mbọm Esie, mme ñnyin oro Enye ama eketim ñnyin idem ndinọ ubọñ Esie. 24 Koro ñnyin idi mme mmọ emi Enye okokotde, idighe ke otu mme Ju ikpọñ, edi ke otu mme mmọ emi midighe mme Ju ñko.

25 Emi edi se Enye eketiñde ke ñwed Osia, ete,

"Mme mmọ emi midighe okim,

Ami ñyekot mmọ ‘ikọt mi.’

Idut emi Ami meñkamaha, Ami ñyekot ‘Edima Mi.’ "

26 Ndien

"ke idem ebiet emi ekedọhọde mmọ, ete,

Mbufo idighe ikọt mi,

kpa do ke edikot mmọ nditọ oduuwem Abasi."

27 Edi Aisaya ofiori abaña Isrel ete:

"Okposuk edi nditọ Isrel ewakde nte ntan

emi odude ke mben inyañ, ke otu oro,

esisit ibat ñyọhọnsuhọ ke edinyaña;

28 Koro Ọbọñ eyesọp ndinam ọyọhọ ibat Esie ye ofuri ererimbot."

29 Edi ukem nte Aisaya ekebemde iso etiñ ete,

"Edieke Jihofa Abasi mikpeyakke ubon ñnyin ọsuhọ,

ñnyin ikpakabade itie nte Sọdọm, inyuñ ibiet Komora."

30 Nso ke ñnyin ikpetiñ ndien? Nte mme mmọ emi midighe mme Ju emi mikañwanake ndinam idem mmọ enen ke iso Abasi, ema enen ke iso Abasi oto ke mbuọtidem? 31 Ke ini mme ndimek ikọt Abasi emi ekeyomde ibet emi edinamde mmọ enen ye Abasi, ikekwe ibet oro. 32 Ndien ntak ekedide ntre-e? Koro se mmọ ekenamde ikodoroke ke mbuọtidem edi okodoro ke utom. Mmọ eketuak ukot eduọ ke "Itiat utuak ukot," 33 emi ñwed Abasi etiñde abaña ete:

"Sese, Ami mmenim itiat ke Sayọn, itiat emi edinamde mme owo etuak ukot,

ye itiat emi edinamde mmọ eduọñọ,

edi owo eke ọbuọtde idem ye Enye idikwe but."