1 Mmọdo sia ema ekenam ñnyin inen ke iso Abasi oto ke mbuọtidem, ñnyin imenyene emem ye Abasi oto ke Ọbọñ ñnyin Jisọs Kraist. 2 Koro ke ntak mbuọtidem, Enye ama ada ñnyin oduk ke akwa itie mfọn Abasi emi ñnyin idude ke esit idahaemi, ndien ñnyin imadara ke idorenyin edibuana ubọñ Abasi.

3 Ñnyin inyuñ idara ñko ke mme afanikọñ ñnyin, koro ñnyin imọfiọk ite ke afanikọñ aman ime, 4 ndien ime ada unyime Abasi edi, ndien unyime Esie anam idorenyin odu. 5 Ndien idorenyin emi idikpuhu ñnyin, koro Abasi ama añwaña ima Esie esin ke esit ñnyin oto ke Edisana Spirit emi Enye ọkọnọde ñnyin.

6 Koro ke idem ini emi ñnyin ikedide mmeme, ke ekem ini Abasi, Kraist amakpa ke ibuot mme idiọk owo. 7 Ke akpanikọ edi ata ọkpọsọñ ñkpọ owo ndikpa ke ibuot edinen owo okposuk edi oro owo ekeme ndinyime ndikpa ke ibuot eti owo. 8 Edi Abasi etim ayarade owut ñnyin, utọ akwa ima emi enye amade ñnyin; ekedi ke idem ini emi ñnyin ikosuk idide mme anam idiọk, ke Kraist akakpa ọnọ ñnyin. 9 Oto ke ñkpa Esie enam ñnyin inen ye Abasi, nte Enye eyekpu ndifak ñnyin nsio ke iyaresit Abasi? 10 Ñnyin ikedi mme asua Abasi, edi enye ama anam ñnyin idi mme ufan Esie oto ke ñkpa Eyen Esie. Ke emi ñnyin ima ikedi mme ufan Esie, ñnyin imenyene idorenyin edinyaña oto ke uwem Eyen Esie. 11 Edi ikureke ke oro, ñnyin imadara ke Abasi, ito Ọbọñ ñnyin Jisọs Kraist, emi otode ke Enye ñnyin inyene emem ye Abasi idahaemi.

12 Kpa nte idiọkñkpọ okotode owo kiet oduk ererimbot, ndien ñkpa onyuñ oto ke idiọkñkpọ oro oduk, kpa ke usuñ emi ñkpa ama ebe esim kpukpru owo, koro kpukpru owo ema enam idiọkñkpọ. 13 Koro idiọkñkpọ ama ododu ke ererimbot mbemiso enọ ibet; edi ke ibet miduhọ, edibiat ibet idiọkñkpọ iduhọ. 14 Edi ñkpa ama ada ubọñ ọtọñọde ke ini Adam tutu esim ini Moses, tutu esim idem mme mmọ emi mikanamke mbiet idiọkñkpọ emi Adam akanamde, ke ndineni uyo Abasi. Adam ekedi mbiet owo emi ekenyenede ndidi. 15 Edi mmọ mbiba idighe ukem ukem, koro enọ mfọn Abasi itiene nte idiọkñkpọ Adam. Edi akpanikọ, nte ke idiọkñkpọ owo kiet emi ama ada ñkpa ọsọk ata ediwak owo. Edi mfọn Abasi etim okpon akan, kpa ntre ñko ye enọ mfọn Esie emi Enye ọnọde ediwak owo oto ke mfọn owo kiet emi, Jisọs Kraist.

16 Idiọkñkpọ Adam kiet akada isop ñkpa ọsọk ediwak owo, ke ini Kraist emende kpukpru mme idiọkñkpọ efep ke mfọn, onyuñ ọnọ mfọnmma uwem ke itie mmọ. 17 Edi akpanikọ, nte ke okoto ke idiọkñkpọ owo kiet, ñkpa ọtọñọ ndida ubọñ, ke ntak owo kiet oro. Edi se owo kiet emi, Jisọs Kraist anamde okpon akan. Kpukpru mmọ emi ebọde uwak mfọn Abasi ye enọ edisana ido Esie ke mfọn eyekara ke uwem eto Kraist. 18 Kpa nte okotode ke idiọkñkpọ owo kiet, ebiom kpukpru owo ikpe, kpa ntre ñko oto ke utom edinen ido kiet, enam kpukpru owo ebọhọ, enyuñ enọ mmọ uwem. 19 Koro nte ekedade nsọñibuot owo kiet enam ediwak owo ekabade edi mme anam idiọkñkpọ kpa ntre ñko eyeto ke nsukibuot owo kiet, ediwak owo enen iso ye Abasi.

20 Ekenọ ibet man otodo ndudue awak, edi ebiet emi idiọkñkpọ awakde, do ke mfọn Abasi etetim awak akan. 21 Nte idiọkñkpọ adade ubọñ ke ñkpa, kpa ntre ñko ke mfọn Abasi ada ubọñ oto ke edinen ido, emi adade ñnyin usuñ esim nsinsi uwem emi otode Ọbọñ ñnyin Jisọs Kraist.