1 Ufan mi, nte afo omobiom mme mmọ efen ikpe? Ke ntem afo unyeneke se afo etiñde ndida ñnyaña idem, koro edieke afo obiomde mme mmọ efen ikpe, edi afo anam ukemukem ñkpọ oro mmọ enamde, afo omobiom idem fo ikpe. 2 Ñnyin imọfiọk ite ke Abasi enen ke ini Enye obiomde mme mmọ emi enamde utọ ñkpọ eke etiede ntem ikpe. 3 Edi afo ufan mi, emi obiomde mme mmọ emi enamde oruk ñkpọ emi ikpe, ndien afo onyuñ anam kpasuk se mmọ enamde, mme nte afo ekere ete ke imọ iyebọhọ ubiomikpe Abasi? 4 Mme nte afo esin uwak mfọnido, ye ime, ye ediyọ Esie ke ndek, edi ufiọkke ete ke mfọnido Abasi edi ndinam fi akabade esit?

5 Edi oto ke ntak nsọñibuot ye unana edikabade esit mbufo, mbufo ke ekọ iyaresit enim enọ idem mbufo ke usen iyaresit Abasi, ke ini emi ediyararede nnen nnen ubiere ikpe Esie. 6 Abasi eyenọ owo kiet kiet utib nte asañade ekekem ye se enye anamde. 7 Enye eyeyak nsinsi uwem ọnọ mmọ emi eyirede ke edinam eti ido enyuñ eyom ubọñ ye ukpono ye uwem emi midibiarake. 8 Edi iyaresit ye ifuresit Abasi eyetiene mme mmọ emi edide ibuk, emi esinde se inende, enyuñ etienede se idiọkde. 9 Ufen ye ndutuhọ eyetiene kpukpru owo emi enamde se idiọkde: eyetiene mme Ju ke akpa itie, onyuñ etiene mme mmọ emi midighe mme Ju; 10 edi ubọñ ye ukpono ye emem eyetiene kpukpru owo emi enamde se ifọnde: eyetiene mme Ju ke akpa itie, ndien etiene mme mmọ emi midighe mme Ju. 11 Koro Abasi miteñeke baba owo ndomokiet enyin.

12 Kpukpru mmọ emi enamde idiọkñkpọ nte mme anana ibet, eyetak nte mme anana ibet, edi kpukpru mmọ emi enamde idiọkñkpọ ke idak ibet, eyeda ibet ekpe ikpe ye mmọ. 13 Koro idighe edikop ibet anam owo enen ke iso Abasi, edi edinam se ibet etemede anam owo enen ke iso Abasi. 14 Ke akpanikọ, ke ini mme mmọ emi midighe mme Ju emi minyeneke ibet, enamde ke uduak esit mmọ se ibet etemede, mmọ enam ibet enọ idem mmọ, okposuk edi emi mmọ minyeneke ibet. 15 Edinam mmọ owut ete ke ewet se ibet etemede esin ke esit mmọ. Esit mmọ ñko onyuñ owut nte ke emi edi ntre, sia ekikere esit mmọ ñko esibiomde mmọ ikọ ke ubak ini, ndien ke ubak ini ñko onyuñ odorode mmọ uyo. 16 Do nte asañade ekekem ye Eti Mbuk emi ami ñkwọrọde, emi edi nte ñkpọ editiede ke usen oro kini Abasi edikpede ikpe ke mme ndedibe ekikere esit owo ito Jisọs Kraist.

17 Edieke mbufo ekotde idem mbufo Ju, edieke mbufo ebuọtde idem ke ibet, enyuñ ebure mbure ebaña Abasi mbufo, 18 edieke mbufo ediọñọde uduak Abasi eto ke ibet, enyuñ ekeme nditiñ se inende, 19 edieke mbufo eyuhọde nte ke mmimọ imekeme ndida mme nnan usuñ, ndien enyuñ edi uñwana enọ mme mmọ emi etiede ke ekim, 20 edieke mbufo ekemede ndikpep mbio ndisime ñkpọ ñnyuñ nnọ mme anana ifiọk item koro ibet mbufo esinede kpukpru ifiọk ye akpanikọ, 21 ntaha mbufo emi ekpepde mme mmọ efen mikpepke idem mbufo-e? Mbufo emi ekwọrọde ete owo ekuyip inọ, nte mbufo ñko iyipke? 22 Mbufo emi edọhọde ete, yak mme owo ekusin efibe, nte mbufo inyuñ isinke efibe? Mbufo emi ebatde ndem nte mbubiam ñkpọ, nte mbufo iwaha itie ukpono mmọ?

23 Mbufo emi enamde inua ebaña ibet, nte mbufo imiomke Abasi ke edibiat ibet? 24 Ñwed Abasi ọdọhọ ete, "Edi ke ntak ndudue mbufo mme Ju, mme mmọ emi midighe mme Ju etiñ oburobut ikọ edian enyiñ Abasi."

25 Edieke mbufo enimde ibet, edina mbobi mbufo enyene udori; edi edieke mbufo ebiatde ibet, etie ukem ukem nte owo ikpenimke mbufo mbobi. 26 Edieke owo emi minaha mbobi anamde se ibet etemede, nte Abasi ididaha enye nte ana mbobi? 27 Owo emi minaha mbobi ke obukidem edi enimde ibet Abasi, eyebiom mbufo ikpe okposuk edi emi mbufo enyenede ibet emi ewetdewet, enyuñ enade mbobi nte mme abiat ibet.

28 Owo idighe Ju edieke enye edide ke enyọñidem kpọt, edina mbobi inyuñ idighe ke edisibe ikpọkidem ikpọñ. 29 Baba, ata Ju edi owo ekededi emi esit esie enende ye Abasi: koro Abasi iyomke mme mmọ emi esibede ikpọkidem mmọ ke ata edina mbobi ikpọkidem, edi Enye oyom mme mmọ emi ekabarede esit. Owo ekededi emi enyenede utọ ukpuhọde oro ke uwem esie eyebọ itoro esie oto Abasi, edieke enye mibọhọ ito owo.