1 Nso ke ñnyin iditiñ ndien? Nte ñnyin ikposuk ika iso iyire ndinam idiọkñkpọ man mfọn Abasi etetim awak? 2 Inaha edi ntre. Ñnyin ima ikpa inọ idiọkñkpọ, didie ndien ke ñnyin ikposuk ika iso idu uwem ke esit? 3 Koro ke akpanikọ mbufo emefiọk emi ete, ke ini ñnyin ikanade babtisim iduk ke ebuana ye Kraist Jisọs, ñnyin ikana babtisim iduk ke ebuana ñkpa Esie. 4 Ke edina babtisim ema ebuk ñnyin ye Enye, ndien ñnyin ima ibuana ke ñkpa Esie, man otodo, kpa nte ekemenerede Kraist esio ke ñkpa oto ke utibe odudu Ete, kpa ntre ñko ñnyin ikpodu obufa uwem.

5 Koro edieke ñnyin idide kiet ye Enye ke mbiet ñkpa Esie, ke ukem usuñ oro ke ñnyin ididi kiet ye Enye ke mbiet ediset Esie. 6 Ñnyin imọfiọk ite ke emekọñ akani owo emi ñnyin ikedide edian ke etoñkpa ye Kraist, man ebiat odudu idiọkñkpọ ke ikpọkidem ñnyin, man otodo ñnyin ikudi aba ifin inọ idiọkñkpọ. 7 Koro ke ini owo akpade enam enye ọbọhọ odudu idiọkñkpọ. 8 Ndien edieke ñnyin ikpade ye Kraist, ñnyin imenim ke akpanikọ ite ke ñnyin iyedu uwem ye Enye. 9 Koro ñnyin imọfiọk ite ke Kraist ama eset ke ñkpa, Enye idikpaha aba, ñkpa inyeneke odudu aba ke idem Esie. 10 Koro ñkpa emi Enye akakpade, Enye akakpa ọnọ idiọkñkpọ, okonyuñ edi ini kiet kpọt, uwem emi Enye odude idahaemi, Enye odu ọnọ Abasi. 11 Kpa ke ukem usuñ oro, mbufo enyene ndibat idem mbufo nte mme mmọ emi ekpade enọ idiọkñkpọ edi edude uwem enọ Abasi, ke ebuana ye Kraist Jisọs.

12 Ekuyak idiọkñkpọ ada ubọñ aba ke ikpọkidem mbufo emi edikpade emi akpanamde mbufo esuk ibuot enọ mme idiọk udọñ obukidem mbufo. 13 Ekuyak ndido idem mbufo ndomokiet enọ idiọkñkpọ, nte ñkpọ utom oburobut ido, edi ekam eyak idem mbufo enọ Abasi nte mme mmọ emi ema ekewọñọ ke ñkpa eduk ke uwem; ndien eyak ofuri mbak ikpọkidem mbufo enọ Enye nte ñkpọ utom edinen ido. 14 Idiọkñkpọ inyeneke aba ndikara mbufo, koro mbufo idughe aba ke idak ibet, edi edu ke idak mfọn Abasi.

15 Nso efen? Nte ana ñnyin inam idiọkñkpọ sia ñnyin miduhọ aba ke idak ibet edi idude ke idak mfọn Abasi? Ñwaña nsa o!

16 Ke akpanikọ mbufo emefiọk ete ke ini mbufo eyakde idem mbufo enọ owo nte ofin, ndisuk ibuot nnọ enye, mbufo edi ofin eteufọk emi mbufo esukde ibuot enọ ke akpanikọ, mme ndisuk ibuot nnọ idiọkñkpọ emi ọsuñọde ke ñkpa, mme ndisuk ibuot nnọ Abasi, emi edinamde ñnyin inen ke iso Esie. 17 Edi yak ekọm enyene Abasi, koro okposuk edi emi mbufo ekedide ifin enọ idiọkñkpọ emekabade esuk ibuot ke ofuri esit mbufo enọ akpanikọ emi odude ke ukpepñkpọ emi mbufo ekebọde. 18 Ema esioño mbufo ke ufin idiọkñkpọ ndien mbufo emekabade edi ifin edinen ido.

19 Ntiñ nte owo ekpetiñde ikọ, ke ntak mmemidem mbufo ke obukidem. Kpa nte mbufo ekeyakde ofuri idem mbufo enọ nte ofin mbubiam ido, ye oburobut ido, ke ndida nnam ukwañ ido, ke ukem usuñ oro mbufo enyene ndiyak ofuri idem mbufo nte ifin edinen ido, nnọ ke ndida nnam se isanade.

20 Kini emi mbufo ekedide ifin idiọkñkpọ, mbufo ikọduhọ ke idak ukara edinen ido. 21 Nso idi udori mbufo ke ndinam mme ñkpọ oro mbufo ekopde but idahaemi? Utit mme ñkpọ emi edi ñkpa. 22 Edi ke emi, ema enam mbufo ewọñọ ke ufin idiọkñkpọ, emenyuñ ekabade edi ifin Abasi; ndien udori emi Enye ọnọde mbufo edi edisana uwem ye nsinsi uwem. 23 Koro ñkpọ eyenutom idiọkñkpọ edi ñkpa, edi enọ mfọn Abasi edi nsinsi uwem ke Kraist Jisọs Ọbọñ ñnyin.