1 Ubiomikpe iduhọ ke emi inọ mme mmọ emi edude ke ebuana ye Kraist Jisọs. 2 Koro ibet Spirit, emi adade uwem ebuana ye Kraist Jisọs ọsọk ñnyin, ama anam mi mbọhọ ibet idiọkñkpọ ye ñkpa. 3 Se ibet mikemeke ndinam, koro obukidem ememde, Abasi ama anam ke emi Enye okosiode Eyen Esie ọdọñ ke mbiet obukidem idiọkñkpọ man Enye edi uwa usio isop idiọkñkpọ. Ndien obiom idiọkñkpọ ikpe, ke idem anam idiọkñkpọ. 4 Abasi akanam ñkpọ emi, man ñnyin emi idude uwem nte Spirit oyomde, emi miduhọ uwem nte obukidem oyomde, ikpanam edinen ido ibet ọyọhọ ọyọhọ 5 Mme mmọ emi edude uwem nte obot idiọkñkpọ mmọ ọdọhọde mmọ edu, edi se obukidem oyomde ada ukara ke esit mmọ. Edi mmọ emi edude uwem nte Spirit ọdọhọde mmọ edu, esin esit mmọ ke se Spirit oyomde.

6 Ke ndiyak obot idiọkñkpọ akara esit fo ada ñkpa edi; ke ndiyak Spirit akara esit fo ada uwem ye emem edi. 7 Ke ntre owo akabade edi asua ye Abasi, kini obot idiọkñkpọ akarade esit; koro enye minimke ibet Abasi ndien ke ata akpanikọ enye ikemeke ndinim ibet Abasi. 8 Mme mmọ emi edide obot idiọkñkpọ akara esit mmọ ikemeke ndinem Abasi esit.

9 Edi mbufo iduhọ uwem nte obot idiọkñkpọ ọdọhọde mbufo edu, edu uwem nte Spirit ọdọhọde mbufo edu, edieke, ke akpanikọ, Spirit Abasi odude mbufo ke idem. Owo ekededi emi minyeneke Spirit Kraist idighe eke Kraist. 10 Edi edieke Kraist odude ke idem mbufo, okposuk edi emi ikpọkidem mbufo edikpade oto ke ntak idiọkñkpọ, Spirit mbufo eyedu uwem koro Kraist anamde mbufo enen ke iso Abasi. 11 Ndien edieke Spirit Abasi, emi akanamde Jisọs eset ke ñkpa, oduñde mbufo ke idem, Enye emi akanamde Kraist eset ke ñkpa eyenyuñ ọnọ uwem ke ikpọkidem mbufo emi edikpade oto ke Spirit Esie emi oduñde ke idem mbufo.

12 Ke ntre, nditọ ete mi, ñnyin idi mme akama isọn, edi ñnyin ikamake obukidem isọn ndidu uwem nte obot idiọkñkpọ oyomde. 13 Koro edieke mbufo edude uwem nte obot idiọkñkpọ oyomde, mbufo eyekpa, edieke mbufo edade Spirit ewot idiọk ubọkutom obot idiọkñkpọ mbufo, mbufo eyedu uwem. 14 Koro kpukpru mmọ emi Spirit Abasi adade usuñ, edi mmọ edi nditọ Abasi.

15 Koro Spirit emi Abasi ọkọnọde mbufo ikanamke mbufo edi ifin, emi akpanamde mbufo ekop ndik, utu ke oro, Spirit akam anam mbufo edi nditọ, emi otode ke odudu Spirit ñnyin ifiori ite, "Ete, Ete." 16 Spirit Abasi ke idem Esie adiana ye Spirit ñnyin, ndidi ntiense nte ke ñnyin idi nditọ Abasi. 17 Ndien sia ñnyin idide nditọ Esie, ñnyin iyenyene udeme ke edidiọñ emi Enye enimde ọnọ ikọt Esie; ndien ñnyin ñko iyenyene udeme ye Kraist ke se Abasi ekenimde ọnọ Enye, koro edieke ñnyin ibuanade ke ukut Kraist, ñnyin ñko iyenyene udeme ke ubọñ Esie.

18 Edi ami mmekere nte, ke ufen emi ñnyin ibọde idahaemi, idighe se ekemede ndida ndomo ye ubọñ emi ediyararede inọ ñnyin. 19 Koro kpukpru se Abasi obotde etie ke ọkpọsọñ udọñ, ebet ini emi Abasi ediyararede nditọ Esie. 20 Koro ema ebiom ofuri ekondo ikpe, mmọ enyuñ ekabade edi ikpuikpu ñkpọ, idighe ke edinyime esie, edi koro Abasi enyimede edi ntre. Kpa ye oro idorenyin emi ama odu, 21 nte ke usen kiet eyefak ofuri ekondo esio ke itie ufin ye mbiara esie, ndien esin enye ke itie eyenisọñ, ndibuana ke ubọñ emi enyenede nditọ Abasi.

22 Koro ñnyin imọfiọk ite tutu esim idahaemi ofuri ekondo ke emum mmum ke ubiak, nte ubiak ini uman. 23 Edi idighe ofuri ekondo ikpọñ, kpa ye ñnyin emi inyenede Spirit nte akpa enọ mfọn Abasi, ke inyuñ imum mmum ke esit idem ñnyin, kadaña emi ñnyin ikade iso nditie mbet Abasi ndinam ñnyin idi nditọ Esie, ndien afak ofuri ikpọkidem ñnyin.

24 Koro ekenyaña ñnyin eto ke idorenyin emi. Edi idorenyin emi ekutde ke enyin idighe idorenyin ke baba usuñ kiet. Anie edori enyin ke se enye ama okokokut? 25 Edi edieke ñnyin idoride enyin ke ñkpọ emi ñnyin mikwe, ñnyin iyebet ñkpọ oro ke ime.

26 Ndien kpa ke ukem usuñ emi, ke Spirit añwam ñnyin ke mmemidem ñnyin. Koro ñnyin mifiọkke nte ñnyin ikpọbọñde akam, edi Spirit ke idem esie ekpe Abasi ubọk ọnọ ñnyin, ke mmum emi ikọ inua mikemeke nditiñ. 27 Ndien Abasi emi okutde esit mme owo, ọdiọñọ se ekikere Spirit edide, koro Spirit anamde ñkpeubọk ọnọ ikọt Abasi, nte ekemde ye uduak Abasi. 28 Ñnyin imọfiọk ite ke kpukpru ñkpọ, Abasi anam utom ke ufọn mmọ emi emade Enye, mme mmọ emi Enye okotde nte ekemde ye uduak Esie.

29 Koro mme mmọ emi Abasi ekebemde iso emek, Enye ama ọkpọnọde mmọ ñko enim ndinyene mbiet Eyen Esie, man Eyen Esie ekpedi akpa Eyen ke otu ediwak nditọ ete eken. 30 Ndien ke ntre Abasi adianade mme mmọ emi Enye okotde enim; ndien mme mmọ emi Enye okotde ke Enye anam enen ye Enye; ndien mme mmọ emi Enye anamde enen ye Enye, ke Enye, abuana ubọñ Esie ye mmọ.

31 Nso ndien ke ñnyin ikeme nditiñ? Edieke Abasi adade ye ñnyin, anie ekeme ndibiọñọ ñnyin? 32 Enye emi mikedipke Eyen Esie, edi akawade enye ọnọ kpukpru owo, didie ke Enye ekpetre ndidian kpukpru ñkpọ ke Enye nnọ ñnyin ke ntat ubọk! 33 Anie owo edidori mme ndimek ikọt Abasi ikọ? Edi Abasi anam ikpe etebe mmọ.

34 Nte owo ndomokiet ekeme ndibiom mmọ ikpe? Kraist Jisọs edi Enyemi akakpade, ke editim ntiñ, Enye emi ekesetde ke ñkpa, etie ke ubọk nnasia Abasi, ndikpe Abasi ubọk ke ibuot ñnyin. 35 Anie ndien ekeme ndidiañade ñnyin ke ima Kraist? Nte afanikọñ ekeme ndidiañade ñnyin, mme nsọñọ ñkpọ, mme ukọbọ, mme biọñ, mme unana, mme ñkpọ ndik, mme ñkpa?

36 Nte ñwed Abasi etiñde ete, "Ñnyin idu ke ndik ñkpa kpukpru usen oto ke ntak mbufo; ebat ñnyin nte mme erọñ emi eyomde ndiwot." 37 Baba, edi ke kpukpru mme ñkpọ emi, ñnyin imeneñede itim inyene edikan oto ke Enye emi akamade ñnyin. 38 Koro mmetim nnim ke akpanikọ nte ñkpọ ndomokiet ikemeke ndidiañade ñnyin ke ima Esie. Ñkpa mme uwem, mme mme enjel, ye mme mbọñ, mme odudu, mme mme ñkpọ emi edude idahaemi, mme mme ñkpọ emi edidide, 39 mme ererimbot emi odude ke enyọñ, mme ererimbot enye emi odude ke isọñ, ñkpọ ndomokiet iduhọ ke kpukpru se ebotde, emi edikemede ndidiañade ñnyin ke ima. Abasi, emi edide eke ñnyin, oto Ọbọñ ñnyin Jisọs Kraist.