1 Kpukpru owo enyene ndisuk ibuot mmọ nnọ ukara, koro ukara ndomokiet iduhọ ke mibọhọke oto ke edinyime Abasi. Ndien mme ukara emi edude edi Abasi enim mmọ do. 2 Owo ekededi emi ọsọñde ibuot ye ukara emi odude, ọsọñ ibuot ye se Abasi ekenimde; ndien owo ekededi emi anamde ntre eyeda ubiomikpe Abasi ọnọ idem esie. 3 Koro ikanaha nte mme anam eti ido ebak mme akara ukara, edi ana mme mmọ emi enamde idiọkñkpọ enyene ndikop ndik. Nte afo amama ndidu ke unana ndik ye mme akara ukara? Ke ntre, nam se ifọnde, ndien enye eyetoro fi. 4 Koro enye edi isuñutom Abasi emi anamde ñkpọ esin ke ufọn fo. Edi edieke afo anamde idiọkñkpọ, bak enye, koro enye enyene odudu ndimia owo ufen ke ofuri akpanikọ. Enye edi isuñutom Abasi emi akamade ufen ndimia mme mmọ emi edide mme anam idiọkñkpọ 5 Ke ntak emi ana mbufo esuk ibuot enọ ukara, idighe ke ntak ndik ufen ikpọñ, edi nte otode ke isọñ esit mbufo.

6 Emi ñko edi ntak emi mbufo ekpede utib enọ ukara, koro ukara enamde utom enọ Abasi kadaña emi mmọ eyakde ofuri ini mmọ enam mme utom ukara. 7 Ekpe ndien kpukpru se mbufo ekamade mmọ, edieke afo akamade isọn taksi, kpe taksi emi ekpede ke inyene, kpe; edieke edide ukpono, nnọ ukpono; edieke edide uku, nọ uku. 8 Ekukama owo baba kiet isọn, ñkukure isọn emi mbufo ekpekamade owo edi ima ndima kiet eken. Owo ekededi emi amade owo nte enye, enim ibet. 9 Mme ibet emi, "Kusin efibe; kuwot owo; kuyip inọ; kusin esit ke ñkpọ owo," kpukpru emi ye mme ibet eken ebọp mmọ esin ke ibet kiet emi, "Ma mbọhoiduñ fo nte amade idem fo." 10 Owo ekededi emi amade mbọhọiduñ esie ikemeke ndinam enye idiọkñkpọ. Ndima ima edi ndinim ofuri mbet.

11 Mbufo enyene ndinam emi, koro mbufo ediọñọde utọ ini emi ñnyin idude ke esit. Ini edikem emi mbufo enyenede ndidemede ke idap. Koro ini emi edinyañade ñnyin ekpere akan ini emi ñnyin ikenimde ke akpanikọ. 12 Okoneyo ekpere ndibe mma, usiere edidi ama. Eyak ñnyin itre ndinam mme ñkpọ emi enamde ke idak ekim, ndien imen mme ñkpọ ekọñ uñwana ibọbọ ke idem ñnyin. 13 Eyak ñnyin inam ñkpọ nte ọfọnde, nte mme mmọ emi edude ke uñwana usen; ukpammin okudu, use okudu, uwem esuene okudu, eñwan mme ufup okudu. 14 Edi esine Ọbọñ Jisọs Kraist nte ọfọñidem ekọñ, ekukpañ utọñ enọ idiọk udọñ obukidem ndinam uduak esie.