1 Edara owo emi mbuọtidem esie misọñke idem ke otu mbufo, edi ekuneni eneni ye enye ke mme ekikere esie. 2 Mbuọtidem owo kiet onyime enye adia kpukpru ñkpọ, edi enyemi mbuọtidem esie ememde, adia ikọñ ikpọñ. 3 Owo emi adiade ñkpọ kiet ekededi okusin enye emi midiaha ke ndek, kpa ntre ñko enyemi adiade ikọñ ikpọñ okukpe enyemi adiade kpukpru ñkpọ ikpe koro Abasi enyime kpukpru mmọ. 4 Afo edi anie emi ekemede ndikpe eyen ufọk owo efen ikpe? Edi eteufọk esie enyene ndibiere mme enye ọsọñọ ada mme enye ọduọ. Ndien enye eyesọñọ ada koro eteufọk esie ekeme ndinam enye ọsọñọ ada.

5 Owo kiet ekere ete ke usen kiet asana akan kpukpru mme usen eken, edi owo eken ekere ete ke kpukpru usen edi ukem ukem. Owo kiet kiet enyene nditim mbiere ke esit esie. 6 Enyemi ekerede ete ke usen kiet ọfọn akan mme usen eken anam ntre ke ntak Ọbọñ. Enye emi atade unam anam ntre ke ubọñ Abasi, koro enye ọnọde Abasi ekọm ke ntak udia oro. Owo ekededi emi esinde ndidia ñkpọ kiet ekededi anam ntre esin ke ubọñ Abasi, ndien enye onyuñ ọnọ Abasi ekọm. 7 Ñnyin ndomokiet iduhọ uwem inọ idem ñnyin ikpọñ. Ñnyin ndomokiet inyuñ ikpaha inọ idem ñnyin ikpọñ; 8 edieke ñnyin idude uwem ñnyin idu uwem inọ Ọbọñ, ndien edieke ñnyin ikpade ñnyin ikpa inọ Ọbọñ. Ke ntre mme ñnyin idu ke uwem mme ikpakpa, ñnyin idi inyene Ọbọñ. 9 Koro Kraist akakpa onyuñ eset ke ñkpa oduk ke uwem man enye ekpedi Ọbọñ mme odu uwem ye mme akpaña ñkpa.

10 Ndien ntak emi afo asuade ọnọ eyen ete fo-o? Ntaha afo esinde eyen ete fo ke ndek-e? Kpukpru ñnyin iyeda ke iso Abasi, man Enye ekpe ikpe ñnyin. 11 Koro ewet ete, "Ọbọñ ọdọhọ ete, adaña nte Ami ndude uwem, kpukpru edọñ eyetọñọ enọ Mi, ndien kpukpru edeme eyedọhọ ete ke Ami ndi Abasi." 12 Owo ñnyin kiet kiet, ndien, eyenam ibat idem esie ọnọ Abasi.

13 Ke ntre eyak ñnyin itre ndibiom kiet eken ikpe. Utu ke oro, eyak ñnyin ibiere nditre ndinam ñkpọ kiet ekededi emi edinamde eyen ete ñnyin ọduọ oduk idiọkñkpọ.

14 Ebuana mi ye Ọbọñ Jisọs anam mi ndiọñọ nte ke ñkpọ ndomokiet ideheke ke idem esie; edi edieke owo enimde ke akpanikọ ete ke ñkpọ ekededi edehe, ke ntre ñkpọ oro akabade edi ndedehe ọnọ enye. 15 Edieke afo esinde eyen ete fo ke ukut oto ke se afo adiade, oro owut ete ke afo unamke aba ñkpọ ye enye ke ima. Ekuyak udia emi mbufo ediade edi ñkpọ nsobo ọnọ owo emi Kraist akakpade ọnọ. 16 Ekuyak mme owo etiñ idiọk ikọ edian se mbufo ekerede ete ke edi eti ñkpọ 17 Koro Obio Ubọñ Abasi idighe mbubehe edidia ye ediñwọñ ñkpọ, edi, edi edisana ido, emem, ye idara ke Edisana Spirit. 18 Ndien owo kiet ekededi emi anamde ñkpọ ọnọ Kraist ke utọ usuñ emi, enem Abasi esit, mme owo enyuñ ekpono enye. 19 Ke ntre, eyak ñnyin isin ifik inam ñkpọ emi adade emem edi ye ñkpọ emi ediñwamde kiet eken ndikọri.

20 Kubiat utom Abasi oto ke ntak udia. Ekeme ndidia kpukpru oruk udia, edi, edi idiọkñkpọ ndidia ñkpọ kiet ekededi emi edinamde owo efen ọduọ oduk idiọkñkpọ. 21 Nnen nnen ñkpọ ndinam edi nditre ndita unam, mme ndiñwọñ mmin, mme ndinam ñkpọ ekededi efen emi edinamde eyen ete fo ọduọ. 22 Ke ntre se ededi emi mbufo enimde ke akpanikọ ebaña mme ñkpọ emi, edip ke ufọt mbufo ye Abasi. Ọfọfọn ọnọ owo emi mibiomke idem esie ikpe oto ke se enye ọsọñọde nte ke ọfọn. 23 Edi owo ekededi emi enyenede eyighe abaña se enye adiade, oduk ke ubiomikpe edieke enye adiade udia oro, koro edidia esie itoho ke mbuọtidem; ndien ñkpọ kiet ekededi emi mitoho ke mbuọtidem, edi idiọkñkpọ.