1 Ami mbup ndien ntem nte, mme Abasi esin ikọt Esie? Idighe ntre. Ami ke idem mi ndi eyen Isrel, nto ke ubon Ebraham, ye ekpuk Benjamin.

2 Abasi isinke ikọt Esie emi Enye ekemekde toto ke editọñọ. Mbufo emefiọk se ñwed Abasi etiñde abaña Elaiya, nte enye ọkọtọtde nditọ Isrel ọnọ Abasi kabaña ido uwem mmọ? 3 Ete, "Ọbọñ, mmọ ewot mme Asiak Uduak Fo, enyuñ ewuri mme itie uwa fo, edi ami ikpọñ nsuhọ, mmọ ke enyuñ eñwana ndiwot mi."

4 Nso uto ibọrọ ke Abasi ọkọnọ enye? "Ami mọsuhọ tọsin owo itiaba nnim nnọ idem mi, mme mmọ emi mituakke ibuot inọ abasi Baal emi edide abasi nsu." 5 Anam kpa ke ukem usuñ oro, enyene esisit ibat owo emi Abasi emekde mfin emi, oto ke mbọm Esie. 6 Edimek Esie ebe ke mbọm Esie, itoho ke se mmọ enamde, koro edieke edimek emi Abasi emekde owo okpotode ke se owo anamde, ọwọrọ mbọm Esie ikpedighe aba ata nnen nnen mbọm.

7 Nso ndien? Nditọ Isrel ikekwe se mmọ ekeyomde. Ekedi ekpri otu owo emi Abasi emekde ekekut, utọñ mme mmọ eken ekesuhọde ema edọñọ inan enọ ikọ Abasi. 8 Nte ñwed Abasi etiñde ete,

"Abasi ama anam esit mmọ ye ekikere mmọ ebit,

tutu esim mfin emi mmọ ikemeke ndikut usuñ ke enyin mmọ,

mme ndikop ikọ ke utọñ mmọ."

9 Defid onyuñ ọdọhọ ete,

"Yak emum mmọ enyuñ eyiri mmọ ke afia ke itie usọrọ mmọ,

yak mmọ eduọñọ, yak mmọ enyuñ ebọ ufen.

10 Yak enyin mmọ ekim, man mmọ ekukut usuñ,

ndien enam mmọ enuhọ ke idak afanikọñ mmọ kpukpru ini."

11 Ami mọtọñọ ntak mbup: nte mmọ eketuak ukot, man mmọ eduọ, nte mmọ midikemeke aba ndidaha nda? Baba-o, idighe ntre, akakam edi ke ntak idiọkñkpọ mmọ, anam edinyaña edi ebine mme mmọ emi midighe mme Ju, man enam mme Ju efibe. 12 Edi idiọkñkpọ mme Ju ama ada ata ekese edidiọñ ọsọk ererimbot, unana mmọ ke Spirit onyuñ ada ata ekese edidiọñ ọsọk mme mmọ emi midighe mme Ju. Edidiọñ edikpon adaña didie kini edidade mme Ju ekem ibat idian!

13 Ami ntiñ ikọ idahaemi ye mbufo mme mmọ emi midighe mme Ju adaña ini nte ami ndide Ọbọsuru nnọ mmọ emi midighe mme Ju, ami ñyetiñ ase ke utom mi, 14 mme ñyekeme ndinam mme mmọ emi edide oruk mi enyene ufup man ñnyuñ ñkeme ndinyaña ndusuk mmọ. 15 Koro ke ini ekesinde mmọ, ema enam ererimbot ufan ye Abasi. Editie didie ndien ke ini edifiakde ida mmọ? Edidi uwem ọnọ mme akpañkpa. 16 Edieke ubak ñkañ kiet uyo emi ewade nte akpa mbuñwum mfri asanade, ofuri ebok uyo asana kpasuk ntre; edieke oruñ eto asanade, mme ñkọk ñko enyuñ esana.

17 Ema ewak ndusuk ñkọk emi odude ke eto ata ọlif efep, enyuñ emen ñkọk eto ọlif ikọt eyiri ke eto ata ọlif. Mbufo mme mmọ emi midighe mme Ju, etie nte eto ọlif ikọt ndien ke emi mbufo emenyene ebuana ke nsọñidem ye ata uwem emi edide eke mme Ju.

18 Ke ntre, mbufo inyeneke ndisin mme mmọ oro esibede nte ñkọk efep ke ndek. Ekeme didie nditañ idem? Ke ini afo edide ñkọk, idighe afo omum oruñ akama, edi, oruñ omum fi akama.

19 Edi afo eyedọhọ ete, "Ekesibe mme ñkọk oro esio man enọ mi ifet," 20 Emi edi akpanikọ. Ekesibe mmọ mme Ju esio koro mmọ mikenimke Abasi ke akpanikọ, ndien mbufo edu do koro mbufo enimde Abasi ke akpanikọ. Ekutañ idem, edi esuhọde idem, enyene esit ekọm enyuñ etiñ enyin. 21 Abasi ikefenke mme Ju emi eketiede nte mme ata ñkọk; mbufo ekere ndien ete ke enye eyefen mbufo?

22 Mi ndien ke ñnyin ikut nte Abasi ọfọnde ido, ye nte Abasi ọsọñde ido. Enye ọsọñ ido ye mme mmọ emi eduọde, edi ọfọn ido ye mbufo edieke mbufo ekade iso emum mfọnido Esie ekama. Ke midighe ntre eyesibe mbufo ñko efep. 23 Ama edi mme Ju, edieke mmọ ekpọñde unana mbuọtidem mmọ, eyefiak emen mmọ edian ke ebiet emi ekewakde mmọ esio koro Abasi ekeme nditọñọ ntak mmen mmọ ndian ke itie mmọ.

24 Mbufo mme mmọ emi midighe mme Ju etie nte ñkọk eto sokoro ikọt emi ekesibede esio, emi midighe ata sokoro, ndien emen edian ke eto ata sokoro, mme Ju etie nte ata eto sokoro, ndien edidi ata mmemmem ñkpọ Abasi ndimen mme ñkọk eto oro ekesibede mfep, mfiak ndian ke eto emi mmọ eketode.

25 Nditọ ete mi, enyene ndedibe akpanikọ emi ñyomde mbufo efiọk ebaña. Emi eyenam mbufo etre ndikere ete ke mmimọ imifiọk ñkpọ eti eti. Edi ntem: Isrel idisọñke ibuot ke nsinsi, edi eyebighi tutu ibat mme mmọ emi midighe Ju edi etiene Abasi. 26 Ndien emi edi nte edisañade inyaña ofuri Isrel. Nte ñwed Abasi etiñde, ete, "Andinyaña eyeto ke Sayọn edi, Enye eyesio kpukpru idiọk ido ke ubon Jekọb efep.

27 Ami ñyenam ediomi emi ye mmọ, ke mma mbọ mmọ mme idiọkñkpọ."

28 Oto koro mmọ esinde Eti Mbuk emi, mme Ju edi asua ye Abasi oto ke ntak mbufo mme mmọ emi midighe mme Ju. Edi ke ntak edimek emi Abasi ekemekde mmọ, mmọ edi mme ufan Esie ke ntak mme ete ete mmọ. 29 Abasi ikemeke nditọñọ ntak mbọ mme enọ ye ikọt Esie; mme Enye ndifiak edem ke mme eñwọñọ Esie. 30 Ama edi mbufo mme mmọ emi midighe mme Ju, mbufo ema esọñ ibuot ye Abasi ke ini emi ekebede, edi idaha emi mbufo emebọ mbọm Abasi koro mme Ju ekesọñde ibuot. 31 Ke ukem usuñ oro, idahaemi mme Ju esọñ ibuot ye Abasi oto ke ntak mbọm emi mbufo ekebọde, man oto do mmọ ñko ebọ mbọm Abasi idahaemi. 32 Koro Abasi ama anam kpukpru owo eduk ufin nsọñibuot, man otodo Enye atua ofuri ubon owo mbọm.

33 Inyene Abasi awak didie, ọniọñ ye ifiọk Esie ọtuñọ didie! Anie ekeme nditim ntiñ se Enye ama ekebiere? Anie ekeme ndifiọk usuñ Esie? 34 Nte ñwed Abasi ọdọhọde ete, "Anie owo ọdiọñọ ekikere Ọbọñ? Anie owo ekeme ndinọ Enye item?" 35 "Anie owo edi owo emi akananam ọnọde Abasi ñkpọ ndomokiet? Man oto ke oro Abasi ọkpọnọ enye usiene?" 36 Koro edi Enye okobot kpukpru ñkpọ ndien kpukpru ñkpọ edu uwem eto Enye, enyuñ enyene Enye. Ubọñ enyene Abasi ke nsinsi! Amen.