1 Nditọ ete mi, udọñ esit mi ye akam mi ke iso Abasi edi nte Isrel ekpebọde edinyaña. 2 Ami mmekeme ndidi ntiense nnọ mmọ ke ifiopesit ukpono Abasi emi mmọ enyenede, edi ifiopesit mmọ isañake ye ifiọk akpanikọ. 3 Mmọ idiọñọke usuñ emi Abasi adade anam mme owo enen ye Enye, mmọ edomo ndisiak usuñ idem mmọ anam mmọ inyimeke ndisuhọrede idem mmọ nnọ usuñ emi Abasi anamde mme owo enen. 4 Koro Kraist ama ada ibet ekesim utit man otodo owo ekededi emi enimde ke akpanikọ, ekpenam enye enen ye Abasi.

5 Emi edi se Moses ekewetde abaña owo ndinen ye Abasi nto ke edinim ibet ete: "Owo ekededi emi anamde se ibet etemede, edida oro idu uwem." 6 Edi emi edi se etiñde ebaña owo ndinen ye Abasi nto ke mbuọtidem: "Kudọhọ ke esit fo ete, Anie edidọk ika ikoduk ke Enyọñ?" (Oro edi ndisuhọde Kraist itie). 7 Kunyuñ udọhọ ete, "Anie edisuhọde iduk ke ererimbot idak isọñ?" (Oro edi ndida Kraist nto ke ñkpa ñwọrọ ndi).

8 Se enye etiñde edi emi: "Ikọ Abasi ekpere fi, ke inua fo ye ke esit fo," enye oro edi ikọ mbuọtidem emi ñnyin ikwọrọde. 9 Edieke afo adade inua fo ọdọhọ ete, "Jisọs edi Ọbọñ," onyuñ enim ke akpanikọ ke esit fo ete ke Abasi ama anam Enye eset, afo eyebọhọ. 10 Koro ñnyin inim ke akpanikọ ke esit ñnyin, ndien enam ñnyin inen ye Abasi; inyuñ ida inua ñnyin itiñ, ibọ edinyaña. 11 Koro ñwed Abasi ọdọhọ ete, "Owo ekededi emi ọbuọtde idem ye Enye idikwe but." 12 Enye emi edi ñkpọ kpukpru owo, koro ukpuhọde iduhọ ke ufọt mme Ju ye mme mmọ emi midighe mme Ju. Abasi kiet edi Ọbọñ kpukpru owo, onyuñ eneñede ọdiọñ kpukpru mmọ emi ekotde Enye. 13 Kpa nte Ñwed Abasi ọdọhọde ete, "Owo ekededi emi esemede okot enyiñ Jihofa eyebọhọ."

14 Mmọ ekemedidie ndikot Enye emi mmọ minimke ke akpanikọ? Ndien mmọ ekemedidie ndinim Enye emi mmọ akananam mikopke ibaña ke akpanikọ? Ndien mmọ edisaña didie ikop kini emi owo mikwọrọke inọ mmọ? 15 Ọkwọrọ ikọ edikeme didie ndikwọrọ edieke owo midọñke enye aka? Kpa nte ñwed Abasi etiñde ete, "Ikpat mme mmọ emi edade eti mbuk edi eye didie!"

16 Edi idighe kpukpru mmọ ekenyime ndibọ Eti Mbuk emi. Aisaya ke idem esie etiñ ete, "Ọbọñ anie edinim etop ñnyin ke akpanikọ?" 17 Mmọdo mbuọtidem oto ke edikop etop Eti Mbuk, etop eti mbuk oto ke edikwọrọ Kraist.

18 Edi ami ñyom ndibup mbufo mbume nte, mme nte edi akpanikọ nte mmọ ikikopke etop Eti Mbuk? Ke akpanikọ, mmọ ema ekop, nte ñwed Abasi etiñde ete, "Uyom mme uyo mmọ ama ọwọrọ esim ofuri ekondo, ikọ mmọ onyuñ esim utit ererimbot." 19 Mfiak ntọñọ ntak mbup nte: Nte nditọ Isrel ikọdiọñọke ibaña? Moses ke idem esie edi akpa owo ndibọrọ mbume emi, "Ami ñyenam mbufo efibe mme mmọ emi midighe ata idut, ñyenyuñ nnam mbufo eyat esit ye idut emi edide mme ndisime." 20 Ndien Aisaya onyuñ etiñ ukouko, ete, "Mme mmọ emi mikoyomke mi ema ekut Mi; Ami ñkayarade idem mi nnọ mmọ emi mikebupke ibaña mi." 21 Edi kabaña Isrel, Enye ọdọhọ ete, "Ma nyanarede ubọk mi ke ofuri usen nnọ mbon nsọñibuot ye mme mbon ndutime."