1 Mbufo emefiọk se ami ñyomde nditiñ mbaña nditọ ete, koro kpukpru mbufo emenyene ifiọk ebaña ibet. Ibet akara owo kadaña ini emi enye odude uwem. 2 Yak nnam uwutñkpọ nnọ mbufo, ke ini eyen añwan ọdọde ebe, ibet ndọ ọbọp enye adian ye ebe esie kadaña emi ebe esie odude uwem. Edi edieke ebe esie akpade, enye ọwọrọ ufin ibet emi ọbọpde enye adian ye ebe esie. 3 Ke ntem edieke enye ọdọde owo efen ke ini ebe esie osuk odude ke uwem, enyene ndikot enye esin efibe; edi edieke ebe esie akpade enye ọwọrọ ufin ibet, ndien edieke enye ọdọde owo efen, enye idighe aba esin efibe.

4 Mmọdo nditọ ete, nte onyuñ edide ye mbufo edi oro. Mbufo ñko ema ekpaña, ke ñkañ ibet, koro mbufo edi ndido ke ikpọkidem Kraist; ndien idahaemi mbufo eyedi Esie, kpa Enye emi ekesetde ke ñkpa, man ñnyin ikposioño nti mfri inọ Abasi. 5 Koro ke ini ñnyin ikodude uwem ñnyin nte obukidem ñnyin okoyomde, mme idiọk udọñ idiọkñkpọ emi etode ke ibet ekenam utom ke idem ñnyin, ndien ñnyin ikosioño mfri ñkpa. 6 Edi ke emi, ñnyin imọwọrọ ke ufin ibet, koro ñnyin ikakpa kabaña mme ñkpọ oro ekesinde ñnyin ke ufin. Ñnyin inamke ñkpọ aba itiene akani usuñ ediwewet ibet, edi inam ke obufa usuñ Spirit.

7 Nso ke ñnyin ikpetiñ ndien? Mme nte ibet ke idem esie edi idiọkñkpọ? Baba, idighe ntre, koro ekedi ibet akanam mi ndiọñọ se idiọkñkpọ edide. Ami ñkpọdiọñọke se edisin esit ke ñkpọ owo ọwọrọde, edieke ibet mikpetiñke, ete, "Kusin esit ke ñkpọ owo." 8 Edi idiọkñkpọ asaña ke idak ibet enyene ifet ndinam esit mi ọyọhọ ye kpukpru oruk idiọkitọñ, koro idiọkñkpọ inyeneke uwem, ke ibet miduhọ.

9 Enyene ini emi ami ñkodude uwem unana ibet; edi ke ini emi ibet ama ekedi, idiọkñkpọ akabade edi oduuwem ñkpọ, 10 ndien ami ñkpa. Ndien ibet emi akanade nte ada uwem edi, akabade ada ñkpa edi. 11 Koro idiọkñkpọ asaña ke ibet okut ifet abiaña mi; ndien oto ke ibet, idiọkñkpọ ndien emen mi esin ke ñkpa. 12 Ke ntem, ibet ke idem esie edi edisana, ewuhọ onyuñ asana, enen onyuñ ọfọn.

13 Mme nte emi ọwọrọ ete, se ifọnde akabade ada ñkpa ọsọk mi? Idighe ntre, edi ekedi idiọkñkpọ akada ñkpa ọsọk mi; ke edidibe ke se ifọnde, idiọkñkpọ ama ada ñkpa ọsọk mi man oto do eyararede se idiọkñkpọ edide ke akpanikọ; ndien oto ke ibet eyararede ewut ete ke idiọkñkpọ edi oburobut ñkpọ. 14 Ke ntem, ibet ọfọn edi akam edi ami ñnyene mfina, ke ntak ekenyamde mi nte ofin ke idak idiọkñkpọ.

15 Mme ido mi itimke iñwaña mi, koro ami nnamke se ami ñkpamade ndinam, utu ke oro ami ñkabade nnam se nsuade 16 Ke ini ami nnamde se ami meñkeyomke ndinam, emi owut ete ami menyime nte ibet enen. 17 Ke ntre idighe aba ami nnam mme ñkpọ emi, akam edi idiọkñkpọ emi oduñde mi ke idem anam.

18 Ami mọfiọk nte baba eti ñkpọ ndomokiet iduhọ ke idem mi; oro edi, ke obukidem mi. Koro okposuk edi emi udọñ edinam eti ñkpọ odude mi ke idem, ukeme edinam iduhọ. 19 Koro ami nnamke eti ñkpọ emi ọdọñde mi ndinam; utu ke oro, ami nnam idiọkñkpọ emi midọñke mi ndinam. 20 Edieke ami nnamde se midọñke mi ndinam, oro ọwọrọ ete idighe aba ami nnam ñkpọ akam edi idiọkñkpọ emi oduñde mi ke idem anam ñkpọ oro.

21 Anam, ami ñkut nte ke ibet ke ananam utom: koro ke ini emi ami ñyomde ndinam se ifọnde, se idiọkde enyene ndidi se ami mmekde. 22 Idara odu ke ọwọñesit mi abaña ibet Abasi. 23 Edi ami ñkut ibet efen anamde utom ke idem mi, ibet enyemi añwanade ye ibet enyemi esit mi enyimede. Enye anam mi ndi owo ñkpọkọbi nnọ ibet idiọkñkpọ emi anamde utom ke idem mi. 24 Nso utọ owo unana inemesit ke ami ndi! Anie owo edinyaña mi isio ke ikpọkidem emi adade mi aka ñkpa? 25 Yak ekọm enyene Abasi, emi afakde mi oto ke Ọbọñ ñnyin Jisọs Kraist! Ke editim ntiñ, emi edi se itibede ye ami: ke idem mi, ami ñkeme ndisuk ibuot nnọ ibet Abasi ke ekikere mi, kadaña emi obot mi nte owo osukde ibuot ọnọ ibet idiọkñkpọ.