1 ✝ज़ुंण प्रोहत, गूर, सैणैं, कार-करिंदै अर होर आम लोग बाबेल देशे राज़ै नबूकदनेसरै राज़धानी एरुशलेम नगरी का बाबेल देशा लै कैद करी निंयैं थिऐ, ज़ुंण तिन्‍नां मांझ़ै अज़ी ज़िऊंदै थिऐ बच़ै दै, मंऐं लिखी तिन्‍नां लै एक च़िठी। 2 अह च़िठी लिखी मंऐं तधू, ज़धू राज़धानी एरुशलेम नगरी का जकोनया राज़अ अर तेऊए ईज कैद करी बाबेल देशा लै निंयैं तिन्‍नां संघै तिन्‍नें कार-करिंदै, यहूदी सैणैं, लुहार, छदाण अर होर कारीगीर बी निंयैं कैद करी बाबेल देशे गलामी लै।✝ 3 अह च़िठी दैनी मंऐं शापाने शोहरू एलासा अर गमर्याह का ज़ुंण हिलकियो शोहरू थिअ। तिंयां दुहै छ़ाडै यहूदा मुल्खे राज़ै सिदकिया बाबेल देशे राज़ै नबूकदनेसरा सेटा।

4 तैहा च़िठी दी दैनअ मंऐं इहअ लिखी, "स्वर्गे सारी सैनो मालक बिधाता, ज़ुंण इज़राईलो परमेशर आसा, तेऊ दैनअ तिन्‍नां सोभी लै समाद ज़ुंण तेऊ एरुशलेम नगरी का बाबेल देशै पजैल़ै। सह बोला इहअ, 5 ‘आप्पू लै च़िणा तिधी घअर संघा बस्सा तेतै। आप्पू लै लाआ बाग-बगिच़ै संघा खाआ तेते फल़। 6 बैह करा संघा करा आजू लुआद पैईदा। आपणैं शोहरू-शोहरीए बी करा बैह ताकि तिन्‍नां का आजू खास्सी आद-लुआद होए। तम्हैं निं तेथ बाबेल देशै घटै लोल़ी, तम्हैं लोल़ी खास्सै हुऐ। 7 ज़हा नगरी दी मंऐं तम्हैं कैदी आसा छ़ाडै दै, तिन्‍नां नगरी लै करा काम कि तिंयां नगरी फल़े-फूले। तिन्‍नां नगरी लै करा मुंह बिधाता सेटा अरज़, किल्हैकि ज़ै तिंयां नगरी फल़े-फूले तेता करै हणअ तम्हां बी राज्ज़ी-मौज़ी रहणा लै।

8 "‘हुंह स्वर्गे सारी सैनो मालक बिधाता, इज़राईलो परमेशर दैआ तम्हां लै एही चतैनगी कि ज़ुंण तम्हां जैंदरी गूर आसा बस्सै दै, तिन्‍नें ज़ाणैं निं लागी नां इहअ दैई हणैं कि तिंयां तम्हां धोखै दी पाए। मणशाण झ़ैऊंणै आल़ै निं तम्हैं कबाता लोल़ी पाऐ, नां तिन्‍नें गल्‍ला शूणीं ज़ुंण तम्हां का धैनै-सुपने गल्‍ला खोज़ा। 9 तिंयां आसा तम्हां मेरै नाओंऐं ठगदै अर झ़ुठअ बोल्दै लागै दै। तिंयां निं मंऐं आथी छ़ाडै दै। अह गल्‍ल डाही मंऐं बिधाता बोली।’"

10 बिधाता बोला इहअ, "ज़ांऊं थारै बाबेल देशै गलामी दी सत्तर साला बितणी, तेखअ एछणअ हुंह तम्हां सेटा लै, तेखअ हणीं मेरी तम्हां लै दैनी दी भली ज़बान पूरी कि तम्हैं आणनैं मुंह घअरा लै बापस फरेऊई।✝ 11 ज़ुंण मंऐं थारै बारै सोठी आसा डाहअ द, तेते बारै ज़ाणा सिधअ हुंह, मेरी सोठ आसा थारै भलाईए तैणीं, सह निं थारी हान्‍नी करने आथी। मेरी सोठ हणीं एही ज़ेथ आजू तम्हां आशा रहे। 12 तेभै करनी तम्हां मुंह सेटा अरज़ अर मुंह हेरनी थारी शूणीं। 13 तेभै लागणै तम्हैं दिला का मुंह लोल़ै अर तम्हां जाणअ हुंह भेटी।✝ 14 हाँ, हुंह बोला भाल़, तम्हैं लागणै मुंह लोल़ै अर मुंह आणनैं तम्हैं गलामी का बापस काढी थारी आपणीं ज़ैगा लै। मुंह झाल़णैं तम्हैं संसारे हर देशा अर हर ज़ैगा का ज़ेथ मंऐं तम्हैं छिंगी आसा डाहै दै। तम्हैं झाल़णैं मुंह भिई ऐहा ई ज़ैगा ज़िधा का काढी मंऐं तम्हां गलामी दी दैनअ डेऊणैं। अह गल्‍ल डाही मंऐं बिधाता बोली।

15 "तम्हैं बोला इहअ, ‘बिधाता काढै तम्हां लै बाबेल देशै बी गूर।’ 16 पर बिधाता बोला तेऊ राज़ै लै इहअ ज़ुंण आझ़काला राज़ै दाबेदे ज़ैगा राज़गाद्दी दी आसा बेठअ द अर ऐहा नगरी बस्सै दै थारै भाई-बंधा लै ज़ुंण तम्हां संघै बाबेल देशा लै कैद करी नांईं निंयैं। 17 स्वर्गे सारी सैनो मालक बिधाता बोला इहअ, ‘तिन्‍नां मांझ़ै लाई मंऐं जुधे तलबार, नकाल़ अर नबिज़री बमारी पाई, मंऐं लाऐ तिंयां चिजै दै फेडू ज़िहै करी ज़ुंण खाणैं जोगी निं रहंदै। 18 मुंह करनअ जुध, नकाल़ अर नबिज़री बमारी करै तिन्‍नों पिछ़अ। संसारे सोभी देशा छ़ुटणअ तिन्‍नों हाल भाल़ी दर्छ़णअ। मुंह छिंगणैं तिंयां देशै-देशै अर लोग हणैं तिन्‍नां भाल़ी रहैन अर हक्‍कै-बक्‍कै। ज़ुंण हाल तिन्‍नों हणअ तेता भाल़ी पल़णीं लोगा बी डअर। लोग लागणै तिन्‍नां लै हास्सदै अर सुहांगा करदै अर तिन्‍नों नाअं काढणअ तिन्‍नां फिटक दैणा लै। 19 तिन्‍नां लै हणअ इहअ किल्हैकि तिन्‍नैं निं मेरै बैण शूणैं ज़ुंण हुंह आपणैं दास अर गूरा बाती तिन्‍नां लै कबल्‍लअ रहअ बोल्दअ लागी। तिंयां हुधूऐ मेरी गल्‍ला मनणै का।’

20 "तम्हैं सोभ ज़ुंण मंऐं एरुशलेम नगरी का बाबेल देशा लै कैद करी छ़ाडै, तम्हैं शूणां कि बिधाता तम्हां लै किज़ै बोला, 21 स्वर्गे सारी सैनो मालक बिधाता, इज़राईलो परमेशर बोला इहअ, ‘अहाब ज़ुंण कोलायो शोहरू आसा अर सिदकिया ज़ुंण मासेयो शोहरू आसा। तिंयां आसा मेरै नाओंऐं झ़ुठी गल्‍ला खोज़दै लागै दै। तिंयां दैणैं मुंह बाबेल देशे राज़ै नबूकदनेसरे हाथै सभाल़ी अर तेऊ पाणै तिंयां थारी आछी सम्हनै मारी। 22 ज़िहै बूरै हाल तिन्‍नें हणैं, आजू लणअ लोगा तिन्‍नों नाअं काढी कहा लै फिटक। ज़ेतरै लोग यहूदा का बाबेल देशा लै आसा निंयैं दै तिन्‍नां बी दैणअ कहा लै इहअ बोली फिटक, "थारै हाल लोल़ी तै बिधाता सिदकिया अर अहाबा ज़िहै किऐ। बाबेल देशे राज़ै भुज़ै तै तिंयां आगीए कूंडा जैंदरी।" 23 तिन्‍नें हणीं एही ई बूरी दशा किल्हैकि तिन्‍नां लै आसा इज़राईली जैंदरी घोर पाप करनैओ दोश। तिन्‍नैं किई आपणैं साथी-संघीए बेटल़ी संघै कंज़रैई अर मुंह बिधाते नाओंऐं रहै तिंयां लोगा का झ़ुठी गल्‍ला खोज़दै लागी। इहअ करने ज़ाज़त निं मंऐं तिन्‍नां लै आथी ती दैनी दी, ज़ुंण तिन्‍नैं किअ सह भाल़अ मंऐं आपणीं आछी अर तेतो शाजत आसा हुंह आप्पै। अह गल्‍ल डाही मंऐं बिधाता बोली।’

24,25 "स्वर्गे सारी सैने मालक बिधाता, इज़राईले परमेशरै दैनअ मुल्है मुखा नेहलामे शमयाह लै समाद ज़ुंणीं आपणीं बाखा एरुशलेम नगरीए परज़ा अर मासेये शोहरू सपन्याह प्रोहत अर होरी सोभी प्रोहता लै च़िठी दैनी लिखी। ऐहा च़िठी दी दैनअ शमयाहै सपन्याह प्रोहता लै इहअ लिखी:

26 "‘बिधाता बशैल़अ तूह जहोयादा प्रोहते ज़ैगा प्रोहत, तूह आसा बिधाते भबनै कारदार। तिन्‍नां बेगरै मणछा ढाकणैंओ आसा तेरअ फर्ज़ ज़ुंण इहअ दखाअ करा कि तिंयां आसा बिधाते गूर। तिन्‍नें हाथै-खूरै अर कैल़ै बान्ह लोहे शांघल़ी करै संघा डाह तिन्‍नां काठा दी पाक्‍कै टोक्‍की। 27 तंऐं अनातोत नगरीए जेरमयाह लै इहअ किल्है निं किअ? सह बी फिरा तम्हां जैंदरी इहअ बोल्दअ कि सह आसा बिधातो गूर! 28 सह रोक्‍कणअ आसा ज़रूरी किल्हैकि तेऊ दैनअ बाबेल देशै गलामी दी डेऊऐ दै यहूदी लै इहअ समाद, "आप्पू लै च़िणां तिधी घअर संघा बस्सा तेते! आप्पू लै लाआ तेथ बाग-बगिच़ै संघा खाआ तेतो फल़।"’

29 "सपन्याह प्रोहतै शणाऊंईं सह च़िठी मुंह सेटा पहल़ी करै। 30 तेखअ बोलअ बिधाता मुल्है इहअ, 31,32 जेरमयाह, बाबेल देशे गलामी लै कैद करी निंयैं दै सोभी लै दै नेहलाम नगरीए शमयाहे बारै मेरअ समाद, ‘मंऐं निं शमयाह आथी छ़ाडअ द, पर तेऊ खोज़अ तम्हां का इहअ कि सह आसा ज़िहअ गूर! तम्हैं डाहै तेऊ झ़ुठी गल्‍ले आसरै! मुंह दैणीं तेऊ अर तेऊए आद-लुआदा लै सज़ा। तम्हां मांझ़ै निं तेऊए आद-लुआद रहणीं ई आथी। सह निं तिन्‍नां भली गल्‍ला भाल़णा लै ज़िऊंदअ रहणअ ज़ुंण मंऐं आपणीं परज़ा लै आसा लाई दी दैई। किल्हैकि तेऊ फरेऊऐ लोग मुखा उंबल़ी बाखा। अह गल्‍ल डाही मंऐं बिधाता बोली।’"