Jeremias 3

विश्वास घाती इज़राईल

1 बिधाता बोला इज़राईली लै इहअ, "ज़ै कुंण मणछ आपणीं बेटल़ी छ़ाडी दैआ,

तेऊ छ़ाडी सह बेटल़ी कहा होरी संघै बस्सदी,

तेखअ निं सह पैहलकअ मर्ध तैहा बापस आणी सकदअ।

ज़ै सह इहअ करे, तेता करै लागणीं सारी ज़ैगा छ़ोत!

पर तम्हैं इज़राईली आसा कंज़री बेटल़ी ज़िहै!

तम्हैं झ़ूरै होरी कई देअआ लै! तज़ी बी कै तम्हैं इहअ सोठा कि

तम्हैं सका मुंह सेटा फिरी एछी?✝3:1 बधा. 24:1-4

2 ओ इज़राईलीओ! उझै भाल़ा निखल़ी धारे च़ुंडी बाखा लै,

तम्हैं किअ मुंह संघै कंज़री बेटल़ी ज़िहअ विश्वास घात।

तम्हैं रहै बाते बाढै आपणैं लोभी न्हैल़ै बेशी।

तम्हैं रहै रेगीस्तानै मारने ताका रहै दै मणछा ज़िहै बेशी।

तम्हैं लाई सारै देशे ज़ैगा छ़ोत अर तम्हैं आसा कंज़री बेटल़ी ज़िहै पापी।

3 तैही निं सरग दैनअ हणैं, तैही निं भराल़ हुअ।

तम्हैं भाल़ा तज़ी बी कंज़री बेटल़ी ज़िहै, तम्हां निं थोल़ी ज़ेही शरम बी आथी!

4 ऐबै बोला तम्हैं मुल्है इहअ, ‘तूह आसा म्हारअ बाब!

तूह झ़ूरा हाम्हां लै होछ़ी उझै!

5 ताह निं सदा हाम्हां लै रोश्श करनै,

तूह जाणअ ज़रूर बिस्सरुई!’

इज़राईलीओ, तम्हैं बोलअ त इहअ ई, पर

तम्हैं रहै कबल्‍लै ज़िहअ थारअ दिल बोलअ तिहै कदुष्ट काम करदै लागी।"

इज़राईल अर यहूदा पल़णअ पछ़ताणअ

6 ज़धू यहूदा मुल्खो राज़अ जोशिया थिअ, तिन्‍नां धैल़ै बोलअ बिधाता मुल्है इहअ, "तंऐं भाल़अ बी कि इज़राईली परज़ा किज़ै किअ? तिन्‍नैं किअ मुल्है विश्वास घात। होरी देअए पूज़ा करी हुऐ तिंयां कंज़री बेटल़ी ज़िहै। तिंयां रहै उझै हर धारा अर हर हरै बूटा गोधै तिन्‍नां लै बल़ीदान करदै लागी।✝3:6 2 राज़. 22:1—23:30; 2 इति. 34:1—35:27 7 मंऐं सोठअ इहअ कि इना एतरी गल्‍ला करी बी जाणैं तिंयां मुंह सेटा लै बापस फिरी। पर तिन्‍नैं निं धख बी पिछ़ू भाल़अ! इज़राईलीए बैहण यहूदी बी किई तिन्‍नें ई नकल अर तिन्‍नैं बी किअ मुंह संघै विश्वास घात। 8 यहूदा भाल़अ कि मंऐं दैनअ इज़राईल छ़ाडी। मंऐं किऐ तिंयां दूर किल्हैकि इज़राईलै किअ मुल्है खास्सी बारी धोखअ। पर मुखा शुझुअ इहअ बी कि इज़राईले बैहण यहूदा बी निं मेरअ अदर करदी। तिंयां बी निं मुल्है शुचै-पाक्‍कै रहै। तिंयां बी निखल़ै होरी देअआ संघै कंज़रैई करदै। 9 एतरअ हई बी निं इज़राईला शरम आई! तिन्‍नैं लाई सारै देशा लै छ़ोत, तिन्‍नैं किई पात्थर अर डाल़ा-बूटा पूज़ी कंज़रैई। 10 एतरअ, हुअ, तेखअ करा इज़राईले कंज़री बैहण यहूदा मुंह सेटा बापस फिरनेओ दखाअ, दिला का निं सह मुंह संघै आथी! अह गल्‍ल डाही मंऐं बिधाता बोली।"

आजू इज़राईला लै आशा

11 तेखअ बोलअ बिधाता मुल्है इहअ, "इज़राईल अर यहूदा निं मुल्है शुचै-पाक्‍कै रहै। पर इज़राईल निं तेतरअ विश्वास घाती थिअ ज़ेतरअ यहूदा थिअ। 12 तूह डेऊ संघा खोज़ मेरै एऊ समादा उतरा*3:12 उतरा इधी उतरा बाखो मतलब आसा सिरीया ज़िधी सामरी नगरी हारनै बाद 722 ईसा आजी इज़राईली गलामी दी थिऐ निंयैं दै बाखा बस्सै दै लोगा का। तूह बोलै तिन्‍नां लै इहअ,

‘विश्वास घाती इज़राईलीओ, मुंह सेटा लै एछा बापस फिरी।

हुंह आसा झणैल़ू अर हुंह निं तम्हां लै रोश्श करदअ,

हुंह निं सदा तम्हां का रुश्शी रहणअ।

13 तम्हैं मना सिधअ इहअ कि तम्हैं किई गलती

तम्हैं किअ आपणैं परमेशर बिधाता लै द्रोह।

तम्हैं मना ऐहा गल्‍ला कि तम्हैं झ़ूरै बडै-बडै हर हरै डाल़ा बूटा हेठै होरी देअआ लै

अर तम्हैं निं ज़िहअ मंऐं बोलअ तिहअ किअ आथी।

अह गल्‍ल डाही मंऐं बिधाता बोली।

14 विश्वास घाती लोगो, मुंह सेटा लै एछा फिरी,

तम्हैं आसा मेरै अर हुंह बिधाता आसा थारअ मालक।

मुंह छ़ांटणैं तम्हैं हर नगरी का एक-एक,

हर टोली का छ़ांटणैं मुंह तम्हां मांझ़ै दूई-दूई।

तम्हैं आणनैं मुंह सियोन धारा लै बापस फरेऊई।

15 तम्हां प्रैंदै राज़ करनै आल़ै डाहणैं मुंह इहै ज़ुंण मेरअ हुकम मना।

तिन्‍नां करनअ तम्हां प्रैंदै अक्ल अर समझ़ डाही राज़।’

16 "तेऊ ज़मानै हणैं तम्हैं एऊ देशै खास्सै, तेखअ निं लोगा मेरै करारे मणशूए बारै गल्‍ला करनी। तिन्‍नां निं एते बारै सोठणअ आथी अर नां तिन्‍नां एते आद डाहणीं, तिन्‍नां निं एते ज़रुरत ई पल़णीं अर नां तिन्‍नां इहअ होर बणाणअं। 17 ज़ेभै इहअ बगत एछणअ, तेभै बोल़णअ लोगा एरुशलेम नगरी लै, ‘बिधाते गाद्दी’ अर तिधी एछणैं सोभ देश मुंह सेटा माथै टेक्‍कदै। तेखअ निं तिन्‍नां तिहअ करनअ ज़िहअ तिन्‍नों कदुष्ट अर हठू दिल बोला। 18 इज़राईल अर यहूदा हणैं कठा। तिंयां एछणैं उतरा बाखा देशा*3:18 उतरा बाखा देशा मतलब सिरीया अर बाबेल देश ज़िधा लै इज़राईल अर यहूदा मुल्खे लोग गलामी दी थिऐ निंयैं दै, सामरी नगरी हुई ती 722 ईसा आजी बरैबाद अर एरुशलेम नगरी 586 ईसा आजी, का तैहा ज़ैगा लै फिरी ज़ुंण मंऐं पैहलकै ज़मानै थारै दादा-बाबा लै दैनी ती कि तिंयां सदा ऐहा ज़ैगे मालक होए।"

परमेशरे लोगे कंज़रैई

19 बिधाता बोला इहअ,

"इज़राईलीओ, मुंह मनणै तै तम्हैं आपणैं होछ़ै लान्हैं ज़िहै,

मुंह दैणअ त थारै दिल लोभणैं आल़अ देश तम्हां लै ज़ुंण

ज़ैगा सारै संसारै सोभी का बित्ती आसा।

हुंह च़ाहा त इहअ कि तम्हैं मुल्है आपणअ बाब बोले

अर तम्हैं कधि मुखा दूर नां डेओए।✝3:19 1 पत. 1:3-7

20 पर तम्हैं इज़राईली हुऐ कंज़री बेटल़ी ज़िहै

तम्हैं निं मुल्है शुचै-पाक्‍कै रहै।

अह गल्‍ल डाही मंऐं बिधाता बोली।"

21 उझै निखल़ी धारा लागी लेर-पकार शुण्हदी,

ईंयां आसा इज़राईली ज़ोरै-ज़ोरै लेरा लाई ढाहा लांदै लागै दै!

किल्हैकि तिन्‍नैं किअ सारी ज़िन्दगी पाप अर

ऐबै आसा तिंयां आपणैं परमेशर बिधाता बिस्सरुई गऐ दै!

22 ज़ेतरै तम्हैं बिधाता छ़ाडी होर्ता बाखा डेऊऐ, तम्हैं एछा बिधाता सेटा लै फिरी,

तेऊ करनै तम्हैं नरोगै अर तेऊ दैणैं तम्हैं शुचै-पाक्‍कै बणाईं।

तम्हैं बोला इहअ, "हाँ, हाम्हैं च़ाल्‍लै बिधाता सेटा एछी

किल्हैकि सह आसा म्हारअ परमेशर बिधाता।

23 म्हारी उझै धारा देअआ-देबीए पूज़ा करनी हुई बृथा।

इज़राईली लै छ़ुटकारअ एछा सिधअ म्हारै परमेशर बिधाता का।

24 पर ज़ुंण नशर्म बाल देअए पूज़ा हाम्हैं किई,

तेता करै हुई म्हारै डागै-चैणें हेल़्ही, शोहरू-शोहरी

अर तिन्‍नां सोभी गल्‍ले हान्‍नी ज़ेता लै पैहलकै ज़मानै

म्हारै दादै-बाबै खास्सी मैन्थ किई ती।

25 हाम्हां हुअ शर्मिंदै नशर्म हई धरनीं लाम्मै पल़णअ अर

बेइज़ती लोल़ी हाम्हैं ढोपै!

हाम्हैं अर म्हारै दाद-बाब रहै सदा

म्हारै परमेशर बिधाता लै पाप करदै लागी।

हाम्हैं निं कधि तेऊए गल्‍ला मनी!"