1 इज़राईली भेटी खास्सी साला तैणीं जुधा का शांती अर बिधाता डाहै तिंयां फेर होरी देशा का बच़ाऊई। ज़ैहसू बी गअ त ऐबै खास्सअ प्रोढअ हई। 2 खिरी शादै ज़ैहसू इज़राईली सैणैं, पांच़ अर बाकी सैणैं संघा बोलअ इहअ, "ऐबै हुअ हुंह खास्सअ प्रोढअ। 3 तम्हैं आसा आपणीं आछी भाल़अ द कि बिधाता थारी तैणीं इना पराई ज़ातीए लोगा संघै किज़ै किअ। तम्हां बाखा लल़णैं आल़अ आसा सह ई परमेशर बिधाता। 4 पुर्बा बाखा जरदण नदी ओर्ही पछ़म मांझ़ समुंदरा तैणीं ज़ेतरै देश मंऐं ज़िती हेरै, सह सारी ज़ैगा दैनी मंऐं थारै सोभी गोत्रा लै बांडी। ज़ेतरै देश ज़ितणैं रहै, तिन्‍नें ज़ैगा बी डाही मंऐं तम्हां लै बिधाता सम्हनै परच़ी पाई बांडी।

5 "थारै परमेशर बिधाता करनै तिंयां ज़बरी तम्हां आजू का ओर्ही-पोर्ही, अर तेऊ काढणैं तिंयां लोग तिन्‍नां देशा का आप्पै पोर्ही। ताकि तिन्‍नें ज़ैगा तम्हैं मालक होए, ज़ेते बिधाता करार आसा किई दी। 6 पर तम्हैं डाहै हेरै आपणअ धैन, मोसा गूरे बधाने कताबा दी ज़ेतरी गल्‍ला आसा लिखी दी, तिन्‍नां मनै सोभी तेही ई। तेथ निं धख भूल-च़ूक बी करी। 7 ज़ुंण तम्हां मांझ़ै ईंयां पराई ज़ाती रही गई इना लोगा संघै निं साझ़ू हई*, नां इने देअआ पूज़दै लागी, नां तिन्‍नें मुहुर्ती आजू अरज़ करी अर नां तिन्‍नें देबते नाओंऐं सोह खाई।✝ 8 ज़िहै तम्हैं आझ़ तैणीं बिधाता लै शुचै-पाक्‍कै रहै, आजू बी लोल़ी तम्हैं तिहै ई रहै।

9 "बिधाता काढै बडै-बडै बलबान देश तम्हां पुजणैं का आजी तिन्‍नें ज़ैगा का पोर्ही अर आझ़ निं कुंण इहअ रहअ ज़ुंण थारअ मकाबलअ करी सके। 10 तम्हां मांझ़ै सका एक ज़ण्हअ बी होरीए हज़ार मणछा दरल़ाऊई किल्हैकि म्हारअ परमेशर बिधाता हआ जुधा लै हाम्हां बाखा आप्पै, ज़ेही तेऊ ज़बान आसा दैनी दी।✝ 11 तैही डाहै धैन हेरे, तम्हैं झ़ूरनअ परमेशर आपणैं बिधाता लै पठी।✝

12 "पर ज़ै तम्हैं बिधाता लै शुचै-पाक्‍कै नांईं रहे अर तम्हां मांझ़ै रही दी तिन्‍नां ज़ाती संघै साझ़ू हई, तिन्‍नां मणछा संघै बैहूई स्‍नोधअ ज़ोल़े, 13 तै समझ़ै तम्हैं ऐहा गल्‍ला पाक्‍की कि तेखअ निं थारअ परमेशर बिधाता तिन्‍नां पराई ज़ातीए लोग तम्हां जैंदरा का पोर्ही काढणैं। तिंयां लोग हणैं तम्हां लै आछी छ़िंडणैं आल़ै झ़ाकल़ अर कुछी खुभै दै कांडै ज़िहै। तिंयां हणैं कबल्‍लै तम्हां लै आजू बी फाही। खिरी हणैं तम्हैं ऐहा रज़दी-पज़दी ज़ैगा खतम ज़ुंण तम्हां लै थारै परमेशर बिधाता आसा दैनी दी।

14 "ऐबै जाणअ हुंह छ़ेक्‍कै मरी, ज़िहअ सोभी मणछा खिरी मरनअ लागा। तम्हैं सोभै ज़ाणा ऐहा गल्‍ला आप्पू कि थारै परमेशर बिधाता हाम्हां लै ज़ुंण गल्‍ला बोली ती, तेता मांझ़ै निं एक गल्‍ल बी एही छ़ुटी ज़ुंण पूरी निं हुई। ज़ुंण बी बिधाता ज़बान दैनी ती, तिंयां गल्‍ला किई तेऊ सोभ पूरी।

15 "ज़ेही म्हारै परमेशर बिधाते हाम्हां लै बोली दी हर भलाईए गल्‍ला पूरी हुई, तेही ई हणीं तम्हां लै पल़णै आल़ी आफ़ता बी पूरी अर तम्हैं हणैं तेखअ ऐहा रज़दी-पज़दी ज़ैगा का खतम ज़ुंण बिधाता तम्हां लै आसा दैनी दी।✝ 16 ज़ै तम्हैं तैहा करारा दी टेक्‍की नांईं रहे ज़ेतो परमेशर थारै बिधाता हुकम आसा किअ द, अर ज़ै तम्हैं होरी देअआ पूज़े या च़ाकरी करे, तेखअ पल़णअ बिधातो कोप तम्हां लै अर तम्हैं हणैं तेखअ एऊ रज़दै-पज़दै देशा का छ़ेक्‍कै खतम ज़ुंण तम्हां लै थारै बिधाता आसा दैनअ द।"