1 "Akhumelhelhaka namilhohi, ama ntu o uthaphulha itora munlhokoni mwinyu, owoonihakani ithikineha ni cho ushangiha, 2 nkayaakhumelhelha thoko chenre awe chiyo, nkeera, ‘Nittwareke etu milhuku chikina ni uvara mitheko chaya, milhuku chihinapacha inyu uchuwelha’, 3 nhiiwelhelhe malhove a yoyo ntu o uthaphulha itora uyo, ukhalhawaya Apwiiya Nlhuku inyu anaatumia yayo wo nlhatu no ulhikachani wiira achuwelhe yakhalhaka nnowaattuna Apwiiya Nlhuku inyu, wo nrima winyu wonkhaye ni wo nnepa winyu wonkhaye. 4 Mwaattwareke ni waarumelhelha Apwiiya Nlhuku inyu, ni uvarechesha iamuri chaya ni wiiwelhelha nlhove naya, mwaathimicheke ni walhutaana. 5 Nansho yoyo namilhohi ama ntu o ulhamulha itora uyo eeviyeke. Ukhalhawaya heettuchiha attu ahaarumelhelhe Apwiiya Nlhuku inyu, okumihilheni ukhuma Umisri ni uwookholhani ukhuma mpottani, wiira nhiye iphiro yaalhehenre aya wiira nttware. Eeviyeke ukhalhawaya yeyo phi iphiro inohalha inyu uthamiha uwonya munlhokoni winyu.

6 "Yakhalhaka munninyu o nthunkwa nimoka, ama mwaamwaninyu mwanlhopwana ama mwanthiyana, ama ahanu inyu anaattuna inyu, ama ampwana inyu, anouthepiachani wo nivitho wiira, ‘Nngwee nathimiche milhuku chikina’ nhichuwenlhe inyu wala uchuwelhiya ni manyaapwiiya inyu, 7 ama milhuku chikina cha attu anaatamana inyu, ama milhuku cha attu anokhalha utayi, mpata mmoka wo ilhapo mpaka mpata nkina, 8 nhirumelhelhe wowo uthepiachiya uwo, wala nhiiwelhelhe ama umwoonelha ikiriri, wala nhinhiyerere wala umvitha wiira hooniye, 9 nansho mmwiiveke. Inyuva nkhalheke o uchokholha umwaata malhuku, ni attu akina onkhaye ayo attwareke. 10 Mmwaateke malhuku mpaka akhwe! Ukhalhawaya holhikacha uupurulhani nthame wa Apwiiya Nlhuku inyu, okumihilheni upottani Umisri. 11 Paahi vanohalha aya waatiya malhuku ni wiiviya vawo, attu o Israeli onkhaye anowiiwa ni woova, ni mena khanowonya thoko chiicho tho.

12 "Vanohalha inyu ukhalhacha mmawani unovahiya inyu ni Apwiiya Nlhuku inyu mmo, mweewakaru wiira, 13 ahaawo attu o uhikhalha marumbo munlhokoni mwinyu, anaathepiacha attu o vavawo, eeraka, ‘Nngwe nathimiche milhuku chikina,’ milhuku chihichuwenlhe inyu, 14 paahi mwaaviavieke ni ukoherera rata, yakhalhaka wo ikekhiaye ittu yo uhilhoka ihopangia munlhokoni mwinyu, 15 mwalhakalhiheke yeyo iwani iyo. Mweevakacheke wo uphanga attu o yeyo iwani iyo, ni wiivakacha ing'ope chaya wo uphanga chiicho. 16 Mwathothokaniheke ikerero chaya chonkhaye va ipuwa wo iwani iyo, ni upaha mooro ukhalha thoko isadaka yo upahiya vamooroni wa Apwiiya Nlhuku inyu, ni iwani iyo ikhalheke mathalha mahuku o uhimalha, ihithekiye tho. 17 Nhikelhe mwaakusha mmawannyu ittu iriyoothe ilhehenre aya Apwiiya Nlhuku wiira ipahiye vamooroni. Ukhalhawaya mwapangaka chiicho, Apwiiya Nlhuku anoohiya uthunalha waya chinene uwo, anowoonelhani ikiriri, ni uwunchererani chinene thoko chenre aya wo waalheha manyaapwiiya inyu, 18 mweewelhelhakaru nlhove na Apwiiya Nlhuku inyu nno, ni uvarechesha iamuri chaya chinouvahaakani lhelho chilha, ni upanga chittu chinothananiya umihoolho wa Apwiiya Nlhuku inyu.