1 Yamalheke, ashinna Musa nkaathepa woolhumana attu o Israeli onkhaye, 2 nkeerelhacha wiira, "Mii vano kihoolhuvalha, ki ntu o iyaakha imia imoka ni makhumi meelhi, vano akirina machiri o uvara ntheko. Tho, Apwiiya Nlhuku ahokihimeria wiira akinolhapuwa mwoolhoko wo Uyorodani. 3 Apwiiya Nlhuku inyu anouhoolhelhani ni ukottolha ilhapo chinokhalha wowo, wiira mwakhalheke mwiilhaponi mwaya. Nayoshua anookhalha nhoolhelhi inyu thoko chihimmie aya Apwiiya Nlhuku. 4 Apwiiya Nlhuku anoorimeelhihacha chechiyo ilhapo chiyo thoko chaakottonlhe Nasihoni ni Naogu, mamwene a Uamori, ni ilhapo aya. 5 Apwiiya Nlhuku anouvahani ukottolha vachulhu waya, ni nnokowaapangelha thoko chinre aka wo ulheherani. 6 Mwiilhipiheke ni ukhalha ni machiri, mena nhoovache ama woopopihiya ni yayo manyaattu ayo, ukhalhawaya Apwiiya Nlhuku inyu anoweeta vamoka ni inyu mwaatti. Yayo khanohiya ukaviherani ni mena khanourihani."

7 Yamalheke, ashinna Musa nkayeehana Nayoshua, nkayaahimiacha umihoolho wa attu o Israeli onkhaye ni weerelha wiira, "Mwiilhipiheke, nkhalheke o machiri, ukhalhawaya inyuva phi nohalha waaholhelha attu alha urwaa ukhalhelhani wiilhaponi Apwiiya Nlhuku weerenlhe aya manyapwiiya aya wiira anowaavaha, ni inyuva mwaavaheke ikhalheke yawaya. 8 Apwiiya Nlhuku phi nouhoolhelhani, yayo anookhalha vamoka ni inyu mwaatti, yayo khanohiya ukaviherani ni mena khanourihani. Paahi etu, nhoove wala nhikhwe nrima."

9 Paahi, ashinna Musa aholhepa malhehero ayo, nkaavaha opochera ishaani o nikosho ni Alawi aari ni ntheko wo ukusha Nsanduku no Malhehano a Apwiiya Nlhuku, ni ashulhupalhe onkhaye o Israeli. 10 Yamalheke, nkayaalhehera ahimiaka wiira, "Kila iyaakha yo saba, iyaakha yo ufutiya milhatu, mwaashomelheke attu ikatema yo isikukuu yo marapatta. 11 Yeyo iyaakha iyo, attu o Israeli vanowa aya umihoolho wa Apwiiya Nlhuku, vakittu vanohalha aya uthanlha, mmweeke mwaashomelha attu onkhaye o Israeli alha malhehero alha. 12 Mwaathukumaniheke attu, manyaalhopwana ni manyaathiyana, achishaana ni alheto anokhalhacha wiilhaponi winyu, wiira kila mmoka eeweke malhove alha, ni wiittucha waathimicha Apwiiya Nlhuku inyu, ni uvarechesha malhove o malhehero alha. 13 Wo wiira chiicho, ayari aya ahinapacha wiiwa malhehero a Apwiiya Nlhuku inyu, eewe ni wiittucha waathimicha Apwiiya Nlhuku inyu, ikatema yonkhaye nnokhalha inyu wiilhaponi unorwaa inyu ukhalha ukhopelhelhe wo mwoolhoko wo Uyorodani."

14 Paahi, Apwiiya Nlhuku nkayeerelha ashinna Musa wiira, "Nihuku ninyu no ukhwa nihaatameria. Mweehaneke Nayoshua, mmweeke vamoka uri Nihema Nitakatifu wiira kaavahe malhehero." Paahi, ashinna Musa ni Nayoshua nkayaarwaa waari Nihema Nitakatifu, 15 ni Apwiiya Nlhuku nkayaakhumelhelha mwommo, unipotoni no nihute anari aneemenlhe unlhakoni wo Nihema.

16 Apwiiya Nlhuku nkayeerelha ashinna Musa wiira, "Nhomwaatameria vano nookhwa, ni baada yo ukhwa winyu, attu anookihiya ni wuntha malhehano kaalhehananne aka, anookihiya ni urwaa uthimicha milhuku chikina cho ilhapo inorwaa aya ukhalhelha iyo. 17 Vavawo urushiya waka unowa waapharelha vachulhu waya nenno nihuku nno, ni mii kinowaahiya ni uvitha ikhove aka utayi, ni ayo anorimeelhihiya. Chittu cho uhilhoka chinchi, ni uhuvihiya chinowakelhelha mpaka vanohalha aya uchuwelha wiira uhilhoka uwo unaapatta ukhalhawaya Nlhuku aya khaawo mmilhokoni mwaya. 18 Wo ikekhiaye kinowaavitha ikhove aka, ukhalhawaya ahopanga chittu cho uhilhoka ni urukunuwelha milhuku chikina.

19 "Vano etu nlhepeke nna nchipo nna, mweettuchiheke attu o Israeli wiira ukhalhe phi ittu yo uhimiechesha waka vachulhu waya. 20 Vanohalha aka waarweeha wiilhaponi unolhoka ulhima ni uhuwa mihuwo, thoko kaalhupenlhe aka manyapwiiya inyu uwo, ni ayo nkayaalhia nkayaawona ni uneneva, anowa aarukunuwelha milhuku chikina ni uthimicha, anookikhotacha ni wuntha malhehano aka. 21 Vanohalha aya upatta mariro menchi ni uhuvihiya, nchipo nna ninoohimiechesha, kwaani khanowa aalhiyalhiya ni iyari chaya. Ukhalhawaya ata vano, kihinaya waarweeha wiilhaponi kaalhupenlhe aka waavaha, kihochuwelha chittu chinoopuwelha aya wiira apangache."

22 Paahi ashinna Musa aholhepa nenno nchipo nno, ni nenno nihuku nkayeettuchiha attu o Israeli.

23 Yamalheke, Apwiiya Nlhuku nkayeerelha Nayoshua, anaaya Nanuni, wiira, "Mwiilhipiheke, nkhalheke o machiri, ukhalhawaya nnowaaholhelha attu o Israeli wiilhaponi waalhupenlhe aka waavaha, ni mii kinookhalha vamoka ni inyuva."

24 Ashinna Musa amalhiheke ulhepa malhove o Malhehero toka uchokholhelha mpaka umalhelha, 25 aheerelha Alawi yaari ni ntheko wo ukusha Nsanduku no Malhehano na Apwiiya Nlhuku nne wiira, 26 "Nkusheke ikitabu yo Malhehero ilha, mweesheke vakhiviru ni Nsanduku no Malhehano na Apwiiya Nlhuku inyu, wiira ikhalhe ittu yo uhimiechesha uwaachani mwaatti ni attu o Israeli onkhaye. 27 Ukhalhawaya kihochuwelha mwaatti chiri inyu attu o urukunuwacha ni o uvaanyiha. Yakhalhaka nhaakhotta Apwiiya Nlhuku ikatema kiriaka nkumi vamoka ni inyu va, inohalha ukhalha chani vanohalha aka ukhwa vawo? 28 Mwaathukumanihacheke umihoolho waka ashulhupalhe onkhaye o makosho inyu ni ahoolhelhi inyu, wiira eewe malhove anoolhumacha aka alha, ni chiyo irimu ni ilhapo chihimiecheshe vachulhu waya. 29 Ukhalhawaya kihochuwelha wiira baada yo ukhwa waka nnookhalha attu o uwonya, ni uhiya iphiro kulhehenreakani wiira nttwareke. Ni mahuku anowa ayo nnookelhiya ni mariro, wo nlhatu no upanga chittu cho uhilhoka umihoolho wa Apwiiya ni waathunalhiha wo mitheko chinyu."

30 Yamalheke, ashinna Musa ahohokolhelhacha malhove o nchipo nno umihoolho wa attu onkhaye o Israeli aathukumanne.