1 Alha phi malhove o malhehano a Apwiiya Nlhuku aalhehenre aya ashinna Musa wiira apange ni attu o Israeli wiilhaponi Umoabu, wuncherera malhehano a Apwiiya Nlhuku apannganne aya umwaakoni Usinai alhe.

2 Ashinna Musa aheehana vamoka attu o Israeli onkhaye nkayeerelha wiira, "Mwahoona mwaashinene Apwiiya Nlhuku chaapangenlhe aya amwene o Umisri, attu aya o ipilhi, akarumiya aya ni ilhapo aya yonkhaye. 3 Mwaahona mariro molhupalhe, ithikineha ni cho ushangiha chaapannge aya. 4 Nansho mpaka lhelho nna Apwiiya Nlhuku kouvanheni irusho yo uchuwelha, miitho o woona, mena maaru o wiiwa! 5 Wo iyaakha makhumi ncheshe, mii kahouholhelhani uthakoni, ikuwo chinyu chaawara inyu khachathalhilhe mena iratu chinyu khachathakhanlhe. 6 Khamwalhilhie nkatte mena uwuria idivai, ama yo uhapalha iriyoothe ilhe, nchuwelhe wiira Apwiiya Nlhuku phi Nlhuku inyu.

7 "Ni vaaphilhe inyu va vakittu va, amwene Nasihoni o Uheshboni ni amwene Naogu o Ubashani ahowaacha uwaatakanani ni hii, nansho nahaakottolha, 8 nkanaakusha ilhapo aya, ni waakawelha attu o makosho a Narobeni, ni Nagadi, ni inusu ikina nikosho ni Namanase ikhalhe nhakhu aya. 9 Paahi etu, mwiishungeke wiira nvarelhelhe malhove onkhaye o malhehano alha, wiira nvarehiye munthekoni mwinyu mwonkhaye.

10 "Lhelho nna, mwattiva onkhaye nheemelha umihoolho wa Apwiiya Nlhuku inyu: Ahoolhelhi o makosho, ashulhupalhe inyu, attu inyu o ipilhi, 11 achishaana inyu ni manyaahanu inyu, alheto anokhalha mmilhokoni mwinyu, anorema ikhuni ni urikelhani maashi. 12 Lhelho nrii va wiira mweeshe malhehano alha, anopanga aya Apwiiya Nlhuku inyu lhelho alha, nrumelhelhe 13 wiira ahimiecheshe ukhalha attu aya, ni ayo akhalhe Nlhuku inyu, thoko chaalhupenlhe aya manyaapwiiya inyu, Aburahimu, Naisaka, ni Nayakhobo. 14 Ni mena akineesha malhehano alha lhelho wo nlhatu winyu vekhayaru, ni uromolha malhavo aya, ni wala akineesha wo nlhatu no alhe ari vamoka ni hii lhelho, umihoolho wa Apwiiya Nlhuku, Nlhuku ihu, 15 nansho tho, wa attu ahiri vamoka ni hii lhelho va.

16 "Nhochuwelha chenre ihu wo ukhalha wiilhaponi Umisri, ni chenre ihu wo uvira mwiilhaponi mwa attu akina mpaka nkanaaphiya va. 17 Mwahoona isinyago chaya cho urushiha, milhuku cho miri ni cho malhuku, cho isiliva ni cho idhahabu. 18 Mwiishungeke wiira hikhalhe nlhopwana, nthiyana, ama attu o unupani winyu, ama o nikosho nirinoothe nineemelha va lhelho, ninohalha waahiya Apwiiya Nlhuku inyu, urwaa ukaviherani milhuku cho ilhapo chikina. Yelha ittu ilha inookhalha thoko mithithari chinohalha umelha ni uyara maphepu o uwawa, o uhapalha. 19 Yakhalhaka baada yo wiiwa malhove o malhehano alhupelhihiye inyu alha, ntu nkeerumelhelha mwaneneru munrimani mwawe, ni wiichona wiira ri salama, nansho nkaattwara itiyamaru awe mwaneneru, yeyo ittu iyo inowarimeelhiha attu onkhaye, attu o uhilhoka ni attu oombone. 20 Apwiiya Nlhuku khanonhiyerera yoyo ntu uyo, ni urushiya wa Apwiiya Nlhuku ni ihache aya chinoopharelha vachulhu wa yoyo ntu uyo, ulhaviya wonkhaye ulhephiye nkitabuni mu unommweelha, ni Apwiiya Nlhuku anonlhakalhiha kabisa yoyo ntu uyo. 21 Apwiiya Nlhuku anonhaulha ni umpanga yoyo ittu yo ulhikaaniheriya mmilhokoni mwo makosho onkhaye o attu o Israeli, wiira apatte mareta wo ulhikaana ni ulhaviya wonkhaye wo malhehano ulhepiye nkitabuni ulha.

22 "Mwi iyari chinyu chinowa, achishaana inyu ni alheto o ukhuma ilhapo cho utayi, anowa woona Apwiiya Nlhuku chenre aya wo uwiiha mareta ni uhuva mwiilhaponi mu. 23 Ilhapo yonkhaye inoochara uka ni maakha, nkayaavia mooro ni uhikhalha ni ittu, khiiwo imbeyu inohalha waalhiya ni umelha ittu iriyoothe. Phi thoko chaari aya ikatema Apwiiya Nlhuku vaarimelhinhe aya iwani cho Usodoma ni Ugomora, Uadima ni Useboimu, wo urushiya waya chinene. 24 Eiyo, attu o ilhapo chonkhaye chinowa cheera, ‘Nlhatuni, Apwiiya Nlhuku no waapangelha chiicho attu o ilha ilhapo ilha? Wu urushiya waya wo uthepa wu unotangachani?’ 25 Ni waakhulha waya unowa ukhalha wo wiira, ‘Ukhalhawaya ahohiya malhehano a Apwiiya Nlhuku, Nlhuku a manyaapwiiya aya, aapannge aya vaakumihilhe aya ukhuma ilhapo yo Umisri, 26 nkaarwa ukaviherani ni uthimicha milhuku chikina, chahaachuwenlhe aya mpacho vawo, mena Apwiiya Nlhuku khaavahilhe. 27 Vavawo etu, urushiya wa Apwiiya Nlhuku wahopharelha vachulhu wa attu o ilha ilhapo ilha, ni uwiiha malhavo onkhaye alhepiye nhina ilha ikitabu ilha. 28 Ni ayo Apwiiya Nlhuku, wo urushiya ni uthunalha waya chinene, ahaathamihacha ukhuma wiilhaponi waya nkaarihelha wiilhaponi ukina thoko chiri aya lhelho va.’

29 "Chittu chivithiye phi cha Apwiiya Nlhuku inyu, nansho alhe apatakunlhe aya alhe phi awihu, ni achishaana ihu wo mahuku o uhimalha, wiira nipangeke malhove onkhaye o malhehero aya alha."