1 "Mwiiwelhelheke mwaatti attu o Israeli! Lhelho va nhaatameria ulhapuwa mwoolhoko wo Uyorodani, nrwee mwakhalhelhe ilhapo ya attu o makosho molhupalhe o machiri uupwahani mwaattiva. Iwani chaya chulhupalhe cho urukureriya ni ingome cho urekama mpaka wiirimu. 2 Attu ayo wowo, o urekamacha ni o machiri, Aanaki thoko chinochuwelha inyu, ni chinre inyu wo wiiwa, attu vaakohanacha aya wo wiira, ‘Mpani nohalha weemelha umihoolho waya yayo attu ayo?’ 3 Nchuwelheke lhelho wiira, Apwiiya Nlhuku inyu unouholhelhani thoko mooro unopaha miri. Yayo anowaalhakalhiha yayo attu ayo ni waakottolha mwoonaka, paahi etu nnokowoomolhacha ni weevakacha wo nkwaha mmoka, thoko chinre ya wo ulhehani.

4 "Apwiiya Nlhuku inyu, amalhihaka woomolhacha yayo attu ayo umihoolho winyu, nhiwe mweera mmamirimani mwinyu wiira, ‘Wo nlhatu no ukhalha wihu makhalhelho oombone, phi ittu etu Apwiiya Nlhuku ahoniwiiha uno wiira nikhalhelhe ilha ilhapo ilha’. Mena, Apwiiya Nlhuku oomolhanche mwaatti mwoonaka, ukhalhawaya yayo attu ayo o uwonya. 5 Nnokhalhelha ilhapo aya kuhii wo nlhatu no ukhalha attu o nrima woombone ama o mirima chorera, nansho Apwiiya Nlhuku inyu, anoomolhacha yayo attu ayo mwoonaka ukhalhawaya attu o uwonya, ni anothanana ushungerera nlhove naahimmie aya wa manyaapwiiya inyu Aburahimu, Naisaka ni Nayakhobo. 6 Paahi etu, nchuwelheke wiira Apwiiya Nlhuku inyu, khanouvahani ilhapo yorera ilha wiira nkhalhelhe, ukhalhawaya nhophwanelhiya chiicho. Mena, mwaatti attu o itiyamaru.

7 "Muupuwelheke ni nhilhiyalhe chenre inyu wo waathunalhiha Apwiiya Nlhuku inyu, uthakoni ulhe. Toka nihuku naathamme inyu Umisri, mpaka nihuku naaphilhe inyu va vakittu va, mwaatti nhokhalha mwaarukuwanachaka Apwiiya Nlhuku. 8 Ata umwaakoni Uhorebu uwo, mwahaathunalhiha Apwiiya Nlhuku, ni ayo ahothunalha chinene, mpaka nkayaathanana ulhakalhihani. 9 Vaawenlhe aka umwaakoni upocherani ivibau cho malhuku chaalhepiye iamuri chaalhehenre aya Apwiiya Nlhuku wa inyu mwaatti, kahokhalha wowo mahuku makhumi ncheshe, uthana ni uhiyu, wo uhilhia wala uwuria ittu iriyoothe. 10 Yamalhekeru, Apwiiya Nlhuku ahokivaha ivibau piilhi cho malhuku chaalhempe aya Apwiiya Nlhuku anene wo moono aya, chaalhepiye malhove onkhaye ohimenrieni ayani Apwiiya Nlhuku umwaakoni ukhuma umooroni toka nihuku no nkutano nne. 11 Eiyo, baada yo yayo mahuku makhumi ncheshe ayo, uthana ni uhiyu, Apwiiya Nlhuku ahokivaha ivibau piilhi cho malhuku chiyo, chaalhempe aya iamuri.

12 "Paahi, Apwiiya Nlhuku ahokiirelha wiira, ‘Nthameke, mwaakuvieke nkhuruweke vathi mwaako vawo, ukhalhawaya attu inyu mwaathamihilhe inyu Umisri ahopanga ittu yo unanara. Ahohiya phiyaru iphiro kaalhehenre aka wiira attware, ahokooroshacha isinyago yo uhaniya.’

13 "Tho, Apwiiya Nlhuku ahokiirelha wiira, ‘Kihoona alha attu alha, ukhalha attu o itiyamaru chinene, 14 nkihiyeke etu kaalhakalhihe, kifute nchina naya velhaponi, ni mii kinoupangani inyuva ukhalha nikosho nulhupalhe, ni no machiri waapwaha yayo.’

15 "Paahi, kahorukunuwa, nkakaakhuruwa ukhuma umwaakoni, kinakushilhe ivibau piilhi cho malhuku chilhe, ni uyo mooro waari upharelhaka umwaakoni. 16 Kahoweha, nkakaashanga woona wiira wo uhipicha nhohiya iphiro nlheheriye inyu ni Apwiiya Nlhuku inyu, ukhalhawaya tayari nheekoroshelha isinyago yo mwaang'ope o uhaniya. 17 Paahi etu, kahothesha ivibau piilhi chilhe nkakaarihelha vathi, nkakonthacha umihoolho winyu. 18 Nkakaarupa makukhu vathi umihoolho wa Apwiiya Nlhuku, thoko chaapannge aka mpacho vawo, wo mahuku makhumi ncheshe uthana ni uhiyu, wo uhilhia mena uwuria ittu iriyoothe. Kaapannge chiicho wo nlhatu no uwonya waapangilhe inyu umihoolho wa Apwiiya Nlhuku, nkamwaathunalhiha. 19 Kahoova wiira urushiya ni ichuku ya Apwiiya Nlhuku uwannyu mwaatti, yaanolhakalhihani, nansho Apwiiya Nlhuku ahokiiwelheha tho yoyo nkwaha uyo. 20 Ni tho, Apwiiya Nlhuku ahothunalha chinene wo nlhatu ni Naharuni no ukoorosha isinyago yo mwaang'ope o idhahabu, athananaka weeva. Nansho tho, yeyo ikatema kahaalhapelhelha Naharuni, ni ayo Apwiiya Nlhuku ahokiiwelhelha. 21 Kahokusha ittu yo unanara ilhe, yaani isinyago yo mwaang'ope mwankoroshilhe inyu ilhe, ni upaha vamooroni. Nkakaanyakathacha ni ushiriria, ni ukhalha thoko ntukurukhu no ushilhia, nkakaarihelha ntukurukhu nno munshepani, nshepa naakhoolha vathi umwaakoni.

22 "Tho, mwahaathunalhiha Apwiiya Nlhuku inyu, Utabera ulhe, Umasa ni Ukibroth Hataava. 23 Ni Apwiiya Nlhuku vorummeni aya ukhuma Ukadesh Barnea yeeraka, ‘Nrweeke mwakhalhelhe ilhapo kuvahilheakani,’ mwahokhotacha. Khamwaarumelhenlhe wala wiiwelhelha malhove ohimenrieni aya alhe. 24 Nhokhalha attu o itiyamaru, nhineewelhelha Apwiiya Nlhuku toka nihuku nochuwenlheakani mwaatti nne.

25 "Paahi etu, kahorupa makukhu umihoolho wa Apwiiya Nlhuku mahuku makhumi ncheshe ayo, uthana ni uhiyu, ukhalhawaya Apwiiya Nlhuku aari aneenre wiira anoulhakalhihani mwaattiva. 26 Kahaalhepelha Apwiiya Nlhuku kiiraka, ‘Inyu Apwiiya Nlhuku, yalha phi attu mwookhonlhe inyu ni waakumiha ilhapo yo Umisri wo wooria ni wo machiri inyu molhupalhe, paahi etu nhaalhakalhihe attu inyu. 27 Mwoopuwelhacheke akarumiya inyu, Aburahimu, Naisaka ni Nayakhobo, mena nhilhohe itiyamaru aya, uhilhoka waya ni uwonya wa alha attu alha. 28 Mwapangaka chiicho, attu o Umisri, ilhapo inithamihilhe inyu ulhe anowiira, Apwiiya Nlhuku aathaminhe wiira eevakachere uthakoni, ukhalhawaya khoonrie waapiiha ilhapo yaalhenhe aya, ni ukhalhawaya khanaattuna. 29 Ukhalhawaya, alha phi attu inyu, attu mwaathamihilhe inyu ukhuma Umisri, wo wooria ni wo machiri inyu molhupalhe.’